ނ.އަތޮޅުގެ ހުރިހާ ރަށެއްގައި އޭޓީއެމް ހިދުމަތް ފޯރުކޮށްދެވިއްޖެ: ބީއެމްއެލް

އަދުގެ ސަރުކާރުގެ ސިޔާސަތުގެ ތެރެއިން ނ.އަތޮޅުގެ މީހުން ދިރިއުޅޭ ހުރިހާ ރަށެއްގައި އޭޓީއެމުގެ ހިދުމަތް ފޯރުކޮށްދެވިއްޖެކަމަށް ބޭންކް އޮފް މޯލްޑިވްސްއިން ބުނެފިއެވެ.

ރާއްޖޭގެ މީހުން ދިރިއުޅޭ ހުރިހާ ރަށެއްގައި އޭޓިއެމްގެ ހިދުމަތް ދިނުމަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސިޔާސަތުގެ ތެރޭގައި ހިމެނޭ މުހިއްމު މަސައްކަތެކެވެ. ބީއެމްއެލުން ބުނީ، ނ އަތޮޅުގައި އޭޓީއެމުގެ ހިދުމަތް މިހާތަނަށް ނުދެވި ހުރި 7 ރަށަށް މިއަދުގެ ނިޔަލަށް އެ ހިދުމަތް ފޯރުކޮށްދެވިފައިވާކަމަށެވެ. އެ ރަށްތަކަކީ، ޅޮހި، ހެނބަދޫ، ލަންދޫ، ކުޑަފަރީ، މާޅެންދޫ، މަގޫދޫ އަދި ފޮއްދުއެވެ. ބީއެމްއެލުން ބުނީ މިއީ ރާއްޖޭގެ އެކި ކަންކޮޅުތަކަށް ބޭންކްގެ ހިދުމަތް ފޯރުކޮށްދިނުމަށް ކުރަމުްނގެންދާ މަސައްކަތްތަކަށް ލިބުނު ފަހުރުވެރި ކާމިޔާބެއްކަމަށެވެ.

މިކަމާ ގުޅިގެން އިކޮނޮމިކް މިނިސްޓަރު މުހައްމަދު ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސުލްޖުމްޙޫރިއްޔާ ޑރ. މުޙައްމަދު މުޢިއްޒުގެ އޭޓީއެމް އަދި ބޭންކިންގެ ޚިދުމަތް ނ އަތޮޅުގެ ރައްޔިތުންނަށް ފޯރުކޮއްދެއްވުމުގެ ވަޢުދު މިއަަދު ފުރިހަމަވެފައިވާކަމަށެވެ. މިނިސްޓަރު ވިދާޅުވީ ހަމައެއާއިއެކު ހއ.އަތޮޅާއި ދ.އަތޮޅުގެވެސް މީހުންދިރިއުޅޭ ކޮއްމެރަށެެއްގައި މިހާރު އޭޓީއެމްގެ ޚިދުމަތް މިހާރު ލިބިެންހުއްނާނެ ކަމަށެވެ.

ބީއެމްއެލް އިން ބުނީ މުޅި ރާއްޖެ ހިމެނޭ ބޭންކިން ވިއުގައާއެކު 20 އަތޮޅެއްގައި 39 ބްރާންޗު އަދި 114 ސެލްފް ސާވިސް ބޭންކިން ސެންޓަރ، އަދި 172 އޭޓީއެމް މިހާރު ބެހެއްޓިފައިވާކަމަށެވެ.

މީހުން ދިރިއުޅޭ ހުރިހާ ރަށެއްގައި އޭޓީއެމް ބެހެއްޓުމުގެ ހިދުމަތް އިފްތިތާހުކުރުން އޮތީ މިދިޔަ އަހަރު ނޮވެމްބަރުމަހުގެ 7 ވަނަ ދުވަހުއެވެ.