"ބިބީ" ގެ ފަހު ޝޯތައް އޮލިމްޕަހުގައި ފަށައިފި

އޮލިމްޕަހުގައި މިހާރު ދައްކަމުންދާ ހޮރޯ/ކޮމެޑީ ފިލް "ބިބީ" ގެ ފަހު ޝޯތައް ފަށައިފިއެވެ.

ވޮއިސްއަށް މައުލޫމާތު ހިއްސާކުރަމުން ބިބީގެ ޕްރޮޑިއުސަރު، މުހައްމަދު އަލީ (މޮގަ) ބުނީ، އޮލިމްޕަހުގައި ބިބީ ގެ ފަހު ޝޯތައް ފަށައިގެން ކުރިއަށްދާކަމަށެވެ. ފަހު ޝޯ ދެއްކުމަށް ނިންމާފައިވަނީ، މިމަހުގެ 20 ވަނަ ދުވަހުގެ ރެއެވެ.

ބިބީގެ އެންމެފަހު ޝޯ 20 ވަނަ ދުވަހަށް ތާވަލްކުރަންޖެހުނީ އޭގެ ފަހުން އޮލިމްޕަސް ލިބެން ނެތުމުންނެވެ. ބިބީ ޕްރިމިއާކޮށްފައިވަނީ މިހިނގާ އޮކްޓޯބަރުމަހުގެ 7 ވަނަ ދުވަހުގެ ރެއެވެ.

ފިލްމްގެ ރިވިއުތަކަށް ބަލާއިރު، ގިނަ ބަޔަކު ބުނެފައިވަނީ މި ފިލްމަކީ ދިވެހި ސިނަމާއަކުން މިހާތަނަށް ފެނުނު އެންމެ ތަފާތު ފިލްމު ކަމަށެވެ. އެގޮތުން ފިލްމްގެ ވާހަކަ އަދި ޑައިރެކްޝަނުގެ ފުރިހަމަ ކަމުގެ ވާހަކަ މި ފިލްމު ބެލި ގިނަ ފަރާތްތަކަކުން ވަނީ ދައްކާފައެވެ.

ބިބީ ޕްރޮޑިއުސް ކޮށްފައިވަނީ އާއިޝަތު ފުއާދު އަދި މުހައްމަދު އަލީ (މޮގަ) އެވެ. މި ފިލްމް ލިޔެ ޑައިރެކްޓްކޮށްފައިވަނީ ޝަހުދާ މަހުމޫދެވެ. މިއީ އޭނާގެ ލިޔެ ޑައިރެކެޓްކުރި ފުރަތަމަ ފީޗާ ފިލްމެވެ.

ފިލްމުގެ މެއިން ކާސްޓުންގެ ގޮތުގައި ފެނިގެން ގޮސްފައިވަނީ، މިހާރު ސިނަމާގައި އެންމެ ނަންހިނގާ އެކްޓަރު ޝަރަފު އަބްދުﷲ އާއި މަރިޔަމް މަޖުދާ (މަޖޫ) އެވެ. މި ފިލްމުން ތަޖުރިބާކާރު ފިލްމީތަރި ޝީލާ ނަޖީބުގެ އިތުރުން އިތުރު ތައާރަފަކަށް ބޭނުންނުވާ، އަހުމަދު ސައީދު، މަލީހާ ރަޒާން ރާމިޒުވެސް ފެނިގެންދިޔައެވެ. އަދި ހާއްސަ ފެނިލުމެއްގެ ގޮތުން ދިވެހި އެތައް ފިލްމަކުން ފެނިގެންދިޔަ ކުޅަދާނަ އެކްޓަރު އިސްމާއީލް ވަޖީހުވެސް މި ފިލްމުން ފެނިގެންދިޔައެވެ.

ބިބީގެ ޓިކެޓް އޮލިމްޕަހުން މިހާރު ވިއްކަމުންދާއިރު، ޑާކްރެއިނުން ވަނީ އޮލިމްޕަހަށް ނުގޮސްވެސް ޓިކެޓް ގަނެވޭނޭ އިންތިޒާމް ހަމަޖައްސާފައެވެ. "ބިބީ" ގެ ހޮޓްލައިން ނަމްބަރު 9911229 އަށް ވައިބާ /ވަޓްސްއަޕް މެދުވެރިކޮށް މެސެޖް ކޮށްލުމުން ބޭނުންވާ ޝީޓެއް ޓިކެޓް ނެގުމަށް، އޮންލައިނުކޮށް ޓިކެޓަށް ފައިސާ ދައްކާލެވޭނެއެވެ.