ހަރުކަށި ފިކުރަކީ ކޮބައިކަމާއި އެ ފިކުރުގެ މީހުން ދެނެގަންނާާނެގޮތް އެކަށައަޅައިފި

ނޭޝަނަލް ކައުންޓަރ ޓެރަރިޒަމް ސެންޓަރގެ ފަރާތުން ހަރުކަށި ފިކުރު މާނަކުރާގޮތް ހާމަކޮށްފިއެވެ.

މިކަން ހާާމަކޮށް އެ ސެންޓަރުން މިރޭ ވަނީ ބަޔާނެއް އާންމުކޮށްފައެވެ.

އެންސީޓީސީން ބުނިގޮތުގައި ހަރުކަށި ފިކުރަކީ ގާނޫނު އަސާސީގެ ރޫހާއި ގާނޫނީ ހަމަތަކާއި، އާންމު އިޖުތިމާއީ އުސޫލުތަކަށް ބަހާއި އަމަލުން އިންކާރުކޮށް، އެކަންކަމާ ދެކޮޅަށް ވަކާލާތު ކުރުމާއި ހަރުކަށިވެ، އަނިޔާވެރިވުމާއި އިހާނެތިކޮށް ހިތުމުގެ ފިކުރު ކަމަށެވެ.

އެގޮތުން އެތަނެއްގެ ސަގާފަތާއި، ޒަމާންވީ އާދަކާދަތަކާއި، ހަމަތަކާއި އުސޫލުތަކުގެ މައްޗަށް ބިނާވެގެންވާ ސާފު ސީދާ މަގުން އެއްކިބާވެ އަދި އެތަނެއްގައި އޮންނަ ގާނޫނާއި ގަވާއިދުތަކާއި އުސޫލުތަކުގެ އިންތަކުން ބޭރުވެ ތިބެ، އެބައެއްގެ ފިކުރަށް ތަބާވާ މީހުން ފިޔަވައި އެހެން މުސްލިމުންނަކީ މުސްލިމުން ނޫންކަމަށް ބުނެ، އެގޮތަށް ދެއްކުމަށް މަސައްކަތްކޮށް، ރައްޔިތުންގެ މުދަލުން ވައްކަން ކުރުމާއި ފޭރުމަކީ ހުއްދަ ކަމެއް ކަމަށް ބުނެ އެކަމަށް ވަކާލާތުކޮށް، މީސްތަކުންނަށް އިހާނެތިކޮށް ހިތާ އަނިޔާވެރިވެ، މީހުންގެ ފުރާނަޔާއި މުދަލަށް ގެއްލުން ދިނުމަކީ ލާޒިމް ކަމެއް ކަމަށް ދައްކުވައިދީ، އެކަންކަން އެގޮތަށް ކުރުމަށް ހިތްވަރުދީ އެކަންކަން އެގޮތަށް ކުރުމަކީ ހަރުކަށި ފިކުރުކަމަށް ވަނީ ބުނެފައެވެ.

މީގެ އިތުުރުން އެ ސެންޓަރުން ވަނީ ހަރުކަށި ފިކުރުގެ މީހުން ދެނެގަންނާނެގޮތް އެކަށައަޅައި ހާމަކޮށްފައެެވެ. އެގޮތުން އެއީ އެބައިމީހުން ފިޔަވައި އެހެން ފަރާތްތަކަކީ ތާޣޫތުން ކަމަށް ނިންމައި، މުސްލިމުން ނޫންކަމަށްބުނެ، އެގޮތަށް ދެއްކުމަށް މަސައްކަތްކޮށް ރައްޔިތުންގެ މުދަލުން ވައްކަން ކުރުމާއި ފޭރުމަކީ ހުއްދަަކަމެއްކަމަށްބުނެ، މީސްތަކުންނަށް އިހާނެތިކޮށް ހިތާ އަނިޔާވެރިވުމާއި މީހުންގެ މުދަލާއި ފުރާނައަަށް ގެއްލުން ދިނުމަކީ ލާޒިމްކަމެއްކަމަށް ބުނެ، އެކަންކުުރުމަށް ހިތްވަރުދީ އެކަން އެގޮތަށް ކުރާ މީހުންކަމަށް ވަނީ ބުނެފައެވެ.

އެންސީޓީސީން ބުނިގޮތުގައި ހަރުކަށި ފިކުރުގެ މީހުންނަށް ދިވެހި ދައުލަތަކީ ކުފުރުގެ ދައުލަތެކެވެ. އަދި އެފަރާތްތަކަކީ ދިވެހި ގައުމިއްޔަތު އިންކާރުކުރާ މީހުންނެވެ.

މީގެ އިތުރުން ރާއްޖޭގެ ގާނޫނު އަސާސީއަކީ ބާތިލް އެއްޗެއް ކަމަށް ބުނެ، އެކަން އެގޮތަށް ދެއްކުމަށް ވަކާލާތުކޮށް، ރާއްޖޭގެ އެންމެހާ ގާނޫނުތަކާ ގަވާއިދުތަކާ އުސޫލުތަކާ ހިލާފުވެ، ދިވެހި ސަގާފަތާ ޒަމަންވީ އާދަކާދަތަކަށް އިންކާރުކޮށް ދިވެހި މުޖުތަމައުގެ އެއްބައިވަންތަކަން ގެއްލުވާލައި، މުޖުތަމައު ބައިބައިކުރަން މަސައްކަތް ކުރާ މީހުންނަކީވެސް ހަރުކަށި ފިކުރުގެ މީހުންކަމަށް ވަނީ ބުނެފައެވެ.

އެގޮތުން އެފަރާތްތަކުން ގައުމީ ދިދަ އާއި ދައުލަތުގެ ނިޝާނާއި، ގައުމީ ސަލާމް ބަލައިނުގަނެ، ސްކޫލްތަކުގެ ގައުމީ މަންހަޖު ބަލައިނުގަނެ، ދަރިން ސްކޫލަށް ހާޒިރުނުކޮށް ހަރުކަށި ފިކުރަށް މަގުފަހިވާ ގޮތަށް ވަކާލާތު ކުރާނަމަ އެއީ ހަރުކަށި ފިކުރުގެ ފަރާތެއްކަމަށް ވަނީ ކަަނޑައަޅާފައެވެ.

އަދި ބައިނަލްއަގްވާމީ ސިއްހީ މިންގަނޑުތަކުން ކުދިން މަހްރޫމް ކުރުވައި، ރާއްޖޭގެ އަންނަން އޮތް ޖީލަށް ނުރައްކާވާފަދަ ފަނާކުރަނިވި ވިސްނުން ކުރިއަރުވާ ފެތުރުމާއި އިންސާނީ ހައްގުތަކަށް ބެލުމެއް ނެތި އަންހެނުންނާއި ކުޑަކުދިން ނިކަމެތިކޮށް، ކައިވެނި ކުރުވިކަމަށް ބުނެ ތުއްތު ކުދިންނަށް ޖިންސީ ގޯނާކުރުމަކީވެސް ހަރުކަށި ފިކުރުކަމަށް އެ ސެންޓަރުން ބުނެއެވެ.