ޑޯމިޓަރީ ގާއިމުކުރުމާއި ގުޅޭ ޕްރޮޕޯސަލެއް ލިބުނުނަމަވެސް އެއްބަސްވުމެއްގައި ސޮއިއެއް ނުކުރޭ: ވަޒީރު އިހްސާން

ރާއްޖޭގައި އުޅޭ ބިދޭސީންނަށް ތިބެވޭނެ އިންތިޒާމް ހަމަޖެހިފައިވާ ޑޯމިޓަރީއެއް ގާއިމުކުރުމާއި ގުޅޭ ގޮތުން ބޭރު ކުންފުންޏެއްގެ ޕްރޮޕޯސަލް ލިބުނު ނަމަވެސް، އެކަމާއި ގުޅޭ އެއްބަސްވުމެއްގައި ސޮއި ކޮށްފައިނުވާ ކަމަށް ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު އަލީ އިހުސާން ވިދާޅުވެއްޖެއެވެ.

މިއަދު ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާއިން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު އިހުސާން ވިދާޅުވީ، ބިދޭސީންނަށް ރާއްޖޭގައި ޑޯމިޓަރީތަކެއް ގާއިމުކުރުމަކީ ސަރުކާރުގެ ވިސްނުމެއް ކަމަށެވެ.

އިހުސާން ވިދާޅުވީ، މިއަހަރުގެ މާޗު މަހުގެ 1 ވަނަ ދުވަހު އެ ވުޒާރާއަށް މެލޭޝިއާގެ އަލްޓައިޒް އިން ޑިޖިޓަލް ނޭޝަނަލް އިންޓަގްރޭޓަޑް މައިގްރަންޓް ވޯކާސް ޑޯމިޓޮރީގެ ނަމުގައި އަންސޮލިސިޓެޑް ޕްރޮޕޯސަލެއްގެ ހުށަހަޅާފައިވާ ކަމަށެވެ. އެއީ ބިދޭސީން މަސައްކަތްތެރިން ހާއްސަކޮށް އަންސްކިލްޑް ލޭބަރސް ކެޓަގަރީގައި ހިމެނޭ ބިދޭސީންނަށް އެކޮމޮޑޭޝަން ބްލޮކްތަކެއް އެޅުމާއި ގުޅޭ ޕްރޮޖެކްޓެއް ކަމަށެވެ.

މި ޕްރޮޖެކްޓަށް އެކުންފުނިން ހަރަދުކުރާ ގޮތަށް ރާއްޖޭގައި މިކަން ކޮށްދޭނެ ކަމަށް އެމީހުން ބުނެފައިވާ ކަމަށާއި، މިހާތަނަށް އެމީހުން ހަދާފައިވާ ހިސާބުތަކުން މާލެ ސަރަހައްދުގައި ގާތްގަނޑަކަށް ލައްކައެއްހާ ބިދޭސީން އުޅޭތީ، މާލެ ސަރަހައްދުގައި 1 ލައްކަ މީހުންގެ އެކޮމޮޑޭޝަން ބްލޮކް މި ޕްރޮޖެކްޓްގެ ތެރެއިން އަޅާނެ ވާހަކަ ބުނެފައިވާ ކަމަށް ވެސް ވަޒީރު ވިދާޅުވިއެވެ. ވަޒީރު އިހުސާން ވިދާޅުވީ އޭގެ ތެރޭގައި މާލެ އާއި ތިލަފުއްޓާއި ހުޅުމާލޭގެ ދެފިޔަވަހި ހިމެނޭ ކަމަށެވެ.

އިހުސާން ވިދާޅުވީ،މިކަން ކުރާނީ އެތަނުގައި ތިބޭ ބިދޭސީންނަށް އެކިކަހަލަ ހިދުމަތްތައް ފޯރުކޮށްދޭގޮތަށް، ސަރުކާރުން ނަގާބިމެއްގައި އެއިންނަ ކުއްޔެއް ނަގައިގެންކަމަށާއި، އެކަމަޑޭޝަން ގައި ތިބޭ ކޮންމެ ބިދޭސީ އަކަށް ބޮލަކަށް 120 ޑޮލަރު ކޮންމެ މަހަކު ޗާޖް ކުރާގޮތަށް އެމީހުން ހުށަހަޅާފައިވާ ޕްރޮޕޯޒަލްގައި ހިމަނާފައިވާ ކަމަށެވެ.

"އެނގިވަޑައިގަންނަވާނެ މިހާރުވެސް ރާއްޖޭގައި އާއްމުގޮތެއްގައި، ބިދޭސީ މަސައްކަތްތެރިއެއްގެ އެކޮމޮޑޭޝަން ޗާޖެއްގެ ގޮތުގައި ނުވަތަ މުސާރައިގެ ތެރެއަށްލާފަ އެކޮމޮޑޭޝަނަށްޓަކައި ދޭނެ އެވްރެޖްކޮށް 1،500 ރުފިޔާއާއި 2،000 ރުފިޔާއާއި ދޭތެރޭގެ އަދަދެއް. ކޮންމެ ބިދޭސީއަކަށް ވެސް. މަދުވެގެން. އެހެންވީމަ އެމީހުން ޕްރޮޕޯޒަލް އަޅުގަނޑުމެންނާއި ހިސާބަށް ފޮނުއިރުގައި ބޭސްލައިން އަކަށް ވެސް ބަލާފައި މީނީ މި އަދަދު ކަމަށް އެމީހުން އަޅުގަނޑުމެންނަށް މައުލޫމާތު ދިނީ."

އިހުސާން ވިދާޅުވިއެވެ.

ހަމައެއާއިއެކު، އެތަނުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި، ވުޒާރާގެ ސިސްޓަމްތަކަށް ވެސް އިންޓަގްރޭޓް ކުރެވިފައި ހުރި އެތަނުގެ ބިދޭސީންގެ މައުލޫމާތު ހިމެނޭ ބަޔޮމެޓްރިކަލީ ވެރިފައިޑް ސޮފްޓްވެއާ އެއްވެސް މީގެ ތެރެއިން ފޯރުކޮށްދޭނެ ކަމަށް ވެސް އެކުންފުނިން ބުނި ކަމަށް ވަޒީރު ވިދާޅުވިއެވެ.

މިއާއިއެކު، ވަޒީރު ވިދާޅުވީ، މިއީ ސަރުކާރުންވެސް ކުރަން ބޭނުންވާ ކަމަކަށްވާތީ މި ޕްރޮޕޯސަލް އިވޭލުއޭޓް ކުރަން އިކޮނޮމިކް މިނިސްޓްރީގެ ދަށުން ހިންގާ އިންވެސްޓް މޯލްޑިވްސް އަށް މޭމަހުގެ 13 ވަނަ ދުވަހު ފޮނުވި ކަމަށާއި، 9 ޖޫންގައި އިންވެސްޓް މޯލްޑިވްސް އިން ރައީސް އޮފީހަށް ފޮނުވައި، އެއާއި ޖެހިގެން އައި ހަފްތާގައި ބޭއްވުނު އިކޮނޮމިކް ކައުންސިލްގެ މީޓިންގައި މި ޕްރޮޖެކްޓަށް "އިން ޕްރިންސިޕަލް" އެއްބަސްވާކަމަށް ނިންމާފައިވާ ކަމަށެވެ.

އެއާއެކު 10 ޖުލައިގައި އިކޮނޮމިކް ކައުންސިލްގެ މި ނިންމުން އެ ކުންފުންޏަށް ފޮނުވާފައިވާ ކަމަށާއި، މިކަން ކުރަން ބޭނުންވާ ކަމަށް އަންގައި، އެއްބަސްވުމަކާއި ހިސާބަށް ދިޔުމަށްޓަކައި އެ ކުންފުނީގެ އެންމެ ފަހުގެ ހުށަހެޅުންތައް ހުށަހެޅުމަށް އެދުނު ކަމަށް ވަޒީރު ވިދާޅުވިއެވެ.

މި މަޝްރޫއުއާއި ގުޅޭ ވާހަކަތައް އައިސްފައިވާ ހިސާބަކީ މިއީ ކަމަށާއި، ސަރުކާރުން މިކަމާއި ގުޅޭ ގޮތެއް ނުނިންމާ ކަން ފާހަގަކުރައްވަމުން ވަޒީރު ވިދާޅުވީ، މިކަމާއި ގުޅޭ އެއްބަސްވުމެއްގައި ސޮއިވެސް ކޮށްފައިނުވާ ކަމަށެވެ.

ވަޒީރު އިހުސާން ވިދާޅުވީ، މި މަޝްރޫއުއާއި ގުޅޭ އެއްބަސްވުމެއް ހަދާކަމަށްވާނަމަ، އެހިސާބަށް ދާނީ އެމީހުންގެ ހުށަހެޅުންތައް ލިބުމުން އޭތި އިކޮނޮމިކް ކައުންސިލްއަށް ހުށަހަޅައި، އެކަންކަމަށް އެ ކައުންސިލުން އެއްބަސްވާނަމަ ކަމަށެވެ.