އޮޕަރޭޝަން ކުރަނގި: މިހާތަނަށް 25،000 އަށްވުރެ ގިނަ ބިދޭސީންގެ މައުލޫމާތު ނަގައިފި

ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާއިން ކުރިއަށްގެންދާ "އޮޕަރޭޝަން ކުރަނގި" ގެ ދަށުން މިހާތަނަށް 25،000 އަށްވުރެ ގިނަ ބިދޭސީންގެ މައުލޫމާތު ނަގާފައިވާކަމަށް އެވުޒާރާގެ ވަޒީރު އަލީ އިހުސާން ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ވަޒީރު އިހުސާން ވިދާޅުވީ، އިއްޔެ އަކީ މާލެ ސަރަހައްދުގެ ޕްރައިވެޓް ސެކްޓަރ އަދި އާއްމު ތަންތަނުގައި ފުޅާކޮށް "އޮޕަރޭޝަން ކުރަނގި" ފެށުނު ދުވަސްކަމަށާއި، އިއްޔެ ކުރެވުނު މަސައްކަތުން 1،455 ބިދޭސީން މަސައްކަތްތެރިންގެ 10 އިނގިލީގެ ނިޝާނާއި ފޭޝިއަލް ރިކޮގްނިޝަނަށް ބޭނުންވާ ފޮޓޯ ނެގި ޑޭޓާ ބޭސް އަޕްޑޭޓް ކުރެވިފައިކަމަށެވެ.

މިދިޔަ އަހަރުގެ ނޮވެންބަރު މަހުގެ 17 ވަނަ ދުވަހު ރައީސް ޑރ.މުޙައްމަދު މުޢިއްޒު ގައުމާއި މުޚާތަބު ކުރައްވަމުން، މި އޮޕަރޭޝަންގެ ދަށުން 10،000 ބިދޭސީންގެ ބަޔޯމެޓްރިކް ޑާޓާ ނަގާފައިވާކަމަށް ވިދާޅުވިކަން ފާހަގަކުރައްވަމުން ވަޒީރު އިހުސާން ވިދާޅުވީ، އޭގެ ފަހުން މިދިޔަ 2 މަސްދުވަހުގެ ތެރޭގައި އިތުރު 15،000 އަށްވުރެ ގިނަ ބިދޭސީންގެ މައުލޫމާތު ނެގިފައިވާކަމަށެވެ.

މިއާއިއެކު މި އޮޕަރޭޝަންގައި މިއަދާއި ހަމައަށް ޖުމްލަ 25,483 ބިދޭސީންގެ މައުލޫމާތު ނެގިފައިވާކަމަށް ވަޒީރު އިހުސާން ވިދާޅުވިއެވެ.

ވަޒީރު އިހުސާން ވިދާޅުވީ، ރައީސް ޑރ.މުޢިއްޒުގެ ވައުދުފުޅާއި އެއްގޮތަށް ރާއްޖޭގައި ގަވާއިދާއި ޚިލާފަށް އުޅެމުންދާ ބިދޭސީންގެ މައްސަލައަށް ދާއިމީ ހައްލެއް ހޯދުމަށް 3 އަހަރުގެ ޕްލޭނެއްގެ ދަށުން ކުރެވެމުންދާ މި މަސައްކަތް 2027 ވަނަ އަހަރުގެ އޭޕްރިލް މަހު ނިންމާލެވޭނެކަމަށެވެ.

މިއާއިއެކު ވަޒީރު ވަނީ މި އޮޕަރޭޝަންގައި އެ ވުޒާރާގެ ފޮރިން ލޭބަރ ޑިޕާޓްމެންޓް، އިމިގްރޭޝަން، ޕޮލިސް އަދި މުޅި ހޯމް ސެކްޓަރ ގެ މުއައްޒަފުންނާއި ކައުންސިލް ތަކުން ކުރާ ބުރަ މަސައްކަތް ފާހަގަކުރައްވައި، އެކަމަށް ޝުކުރު އަދާކުރައްވާފައެވެ.