ކުރިއަށް އޮތްތަނުގައި، އިންތިޚާބު ތަކުގައި ބޮޑަށް ބޭނުންކުރާނީ އީ-ފާސް: ފުއާދު

އިންތިޚާބު ތަކުގައި މިހާރުވެސް އީ-ފާސް ނުވަތަ އީ-އައިޑީ ކާޑު ބޭނުންކުރަމުންދާ ކަމަށާ، ކުރިއަށް އޮތް ތަނުގައިވެސް ބޮޑަށް ބޭނުން ކުރާނީ އީފާސް ކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިނިވަން މުވައްސަސާތަކާއި ބެހޭ ކޮމިޓީގައި، ހެންވޭރު ހުޅަނގު ދާއިރާގެ މެންބަރު އަލީ އިބްރާހީމް ވަނީ އިންތިޚާބު ތަކުގައި އަތުގައި އޮންނަ އައިޑީ ކާޑުގެ ބަދަލުގައި، އީފާސް މެދުވެރިކޮށް ވޯޓުލާ މީހުންނަށް ވޯޓުލުމުގެ ކަންކަން ކުރިއަށް ގެމްދިޔުމާއި ގުޅޭ ގޮތުން ސުވާލު ކުރައްވާފައެވެ.

އެ ސުވާލަށް ޖަވާބު ދެއްވަމުން، އީސީގެ ރައީސް ފުއާދު ވިދާޅުވީ، ރީ ރެޖިސްޓްރޭޝަންގެ މަސައްކަތުގައި މިހާރުވެސް އީފާސް ބޭނުންކުރަމުންދާ ކަމަށެވެ.

އީފާސް މިހާރުވެސް އަޅުގަނޑުމެން ބޭނުން ކުރަމުން މިދަނީ ރީ ރެޖިސްޓްރޭޝަންގެ ކަންކަމުގައި. ޚާއްސަކޮށް ރާްއްޖެއިން ބޭރުގައި ތިބި މީހުން ރީ ރެޖިސްޓަރ ކުރުމަށްޓަކައި. އެހެންވީމާ އީފާސް އަކީ ކުރިއަށް އޮތް ތަނުގައި އަޅުގަނޑުމެން ބޮޑަށް ބޭނުންކުރާނެ އެއްޗެއް. އެއީ އިތުބާރު ހުރި ރެޖިސްޓަރޭޝަން ސިސްޓަމަކަށް ވާތީވެ.

ފުއާދު ތައުފީގު

އީފާހަކީ 2012 އަހަރުން ފެށިގެން ނޭޝަނަލް ސެންޓަރ ފޮރ އިންފޮމޭޝަން ޓެކްނޮލޮޖީން ތަރައްގީކޮށް ބަލަހައްޓަމުން އަންނަ، ސަރުކާރާއި ދައުލަތުގެ އޮންލައިން 61 ޕޯޓަލެއް މެދުވެރިކޮށް ފޯރުކޮށްދޭ 460ށްވުރެ ގިނަ ޚިދުމަތް ލިބިގަތުމަށް، 137،000ށްވުރެ ގިނަ މީހުން ބޭނުންކުރަމުންދާ، ސަރުކާރުގެ ޑިޖިޓަލް އައިޑެންޓިޓީގެ ނިޒާމެވެ. 2022ގައި 5.1 މިލިއަން ފަހަރު އެކިއެކި ޚިދުމަތްތައް ހޯދުމަށް މި ނިޒާމް ވަނީ ބޭނުންކޮށްފައެވެ.

އެއީ ސަރުކާރާއި ދައުލަތުގެ ބައެއް މުއައްސަސާތަކުން އޮންލައިންކޮށް ފޯރުކޮށްދޭ ޚިދުމަތްތައް ފޯރުކޮށްދިނުމުގައި، ހިދުމަތް ހޯދާފަރާތް ޑިޖިޓަލްކޮށް ކަށަވަރުކުރުމަށް ބޭނުންކުރަމުން އަންނަ ޑިޖިޓަލް އައިޑެންޓިޓީގެ ނިޒާމެވެ.