ރާއްޖެ އަށް އައި ފަތުރުވެރިންގެ އަދަދު %12 އަށް އިތުރުވެއްޖެ

2024 ވަނަ އަހަރުގެ ފުރަތަމަ މަހު، ރާއްޖެ އައި ފަތުރުވެރިންގެ އަދަދު، މިދިޔަ އަހަރުގެ މި މުއްދަތުގައި އައި ފަތުރުވެރިންގެ އަދަދަށްވުރެ 12 އިންސައްތަ އިތުރުވެއްޖެ އެވެ.

ފަތުރުވެރިކަމާއި ބެހޭ ވުޒާރާގެ ތަފާސްހިސާބުތަކުން ދައްކާ ގޮތުން މި އަހަރުގެ މިހާތަނަށް ރާއްޖެ އަށް 174,400 ފަތުރުވެރިން އައިސްފައިވެ އެވެ. މިއީ އެވްރެޖުކޮށް ދުވާލަކު 6,229 ފަތުރުވެރިންނެވެ.

މިދިޔަ އަހަރުގެ މި މުއްދަތުގައި  ރާއްޖެއަށް އައިސްފައިވަނީ 155,851 ފަތުރުވެރިންނެވެ. އެހެންކަމުން މިއީ މިއީ މިދިޔަ އަހަރާ އަޅާބަލާއިރު ގާތްގަނޑަކަށް 20،000 ފަތުރުވެރިންގެ އިތުރުވުމެކެވެ.

މިމަހު ރާއްޖެއަށް އެންމެ ގިނަ ފަތުރުވެރިން އައިސްފައިވަނީ ޖެނުއަރީ 27 ވީ ހޮނިހިރު ދުވަހުއެވެ. އެދުވަހު ރާއްޖެއަށް 7,799 ފަތުރުވެރިން ވަނީ ޒިޔާރަތް ކޮށްފައެވެ.

މި އަހަރުގެ މިހާހިސާބަށް އެންމެ ގިނަ ފަތުރުވެރިން ރާއްޖެ އައި ގައުމަކީ ރަޝިއާއެވެ. މިގޮތުން އެ ގައުމުން ވަނީ 18,561 ފަތުރުވެރިން ރާއްޖެ އައިސްފައެވެ. ދެވަނަގައި އަށް 18,111 ފަތުރުވެރިންނާއި އެކު އިޓަލީ އޮތް އިރު، ތިން ވަނަގައި ކުރިން އޮތް އިނގިރޭސިވިލާތް ފަހަތަށް ޖައްސާލުމަށް ފަހު އެ މަގާމް ހޯދާފައި ވަނީ ޗައިނާ އިންނެވެ. މިގޮތުން ޗައިނާ އިން 16,529  ފަތުރުވެރިން ރާއްޖެއަށް ވަނީ އައިސްފައެވެ.

ލިސްޓުގެ ހަތަރު ވަނައިގައި 14,588 ފަތުރުވެރިންނާއި އެކު އިނގިރޭސި ވިލާތް އޮތް އިރު، މިދިޔަ އަހަރު ލިސްޓުގެ ދެވަނައިގައި އޮތް އިންޑިއާ މިހާރު އޮތީ ފަސް ވަނައިގައެވެ. އެ ގައުމުން މި އަހަރުގެ މިހާހިސާބަށް އައިސްފައިވަނީ 13,989 ފަތުރުވެރިންނެވެ.

މި އަހަރުގެ އަމާޒަކީ ރާއްޖެއަށް ދެ މިލިއަން ފަތުރުވެރިން ގެނައުން ކަމަށް ފަތުރުވެރިކަމާއި ބެހޭ ވުޒާރާއިން ބުނެއެވެ.