ލަންކާގެ ހައިކޮމިޝަނަރު އެމް. ރިޒްވީ، ފުވައްމުލަކު އަޙްމަދު ޢަލީ ދީދީ ކްރިކެޓް ދަނޑަށް ޒިޔާރަތްކުރައްވައިފި

ސްރީލަންކާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ހައިކޮމިޝަނަރު އެމް. ރިޒްވީ ޙަސަން، ފުވައްމުލައް ސިޓީއަށް ކުރެއްވި ރަސްމީ ދަތުރުފުޅުގެ ތެރެއިން އެ ސިޓީގެ އަޙްމަދު ޢަލީ ދީދީ ކްރިކެޓް ދަނޑަށް ޒިޔާރަތްކުރައްވައިފިއެވެ.

މި ޒިޔާރަތުގައި ހައިކޮމިޝަނަރުގެ އަރިހުގައި ފުވައްމުލައް ސިޓީގެ މޭޔަރު އިސްމާޢީލް ރަފީޤު ބައިވެރިވެވަޑައިގެންނެވިއެވެ. މި ދަތުރުފުޅަކީ ފުވައްމުލައް ސިޓީގައި ހުރި ކުޅިވަރުގެ ވަޞީލަތްތައް ބައްލަވާލެއްވުމަށާއި، ޚާއްޞަކޮށް ޒުވާނުންގެ މެދުގައި ކްރިކެޓް ކުޅިވަރު އިތުރަށް ފުޅާކޮށް ކުރިއެރުވުމާ ގުޅޭގޮތުން ދެފަރާތުގެ ދެމެދުގައި މަޝްވަރާކުރެއްވުމަށް ލިބިގެންދިޔަ މުހިންމު ފުރުޞަތެއްކަމަށް ސަފީރު ވަނީ ވިދާޅުވެފައެވެ.

ދަނޑަށް ކުރެއްވި ޒިޔާރަތުގައި ވާހަކަފުޅު ދައްކަވަމުން ހައިކޮމިޝަނަރު އެމް. ރިޒްވީ ވަނީ ފުވައްމުލަކުގައި ކްރިކެޓް ކުޅިވަރަށް އޮތް ބޮޑު ޝައުޤުވެރިކަން ފާހަގަކުރައްވާފައެވެ. އަދި ރަށު ފެންވަރުގައި މިފަދަ ކުޅިވަރުތައް ތަރައްޤީކޮށް، ޒުވާނުންނަކީ ދުޅަހެޔޮ، ކުޅިވަރަށް ލޯބިކުރާ ބަޔަކަށް ހެދުމަށްޓަކައި އެހީތެރިކަމާއި އެއްބާރުލުން ފޯރުކޮށްދިނުމުގެ މުހިންމުކަމުގެ މައްޗަށް އެމަނިކުފާނު އަލިއަޅުއްވާލެއްވިއެވެ.

ފުވައްމުލައް ސިޓީއަކީ ރާއްޖޭގައި ފާހަގަކޮށްލެވޭ ފަދަ މޮޅެތި ކްރިކެޓް ކުޅުންތެރިންތަކެއް އުފެދެމުން އަންނަ ރަށެއްކަން ފާހަގަކޮށްލެވެއެވެ. ފުވައްމުލައްސިޓީގައި ގާއިމްކޮށްފައިވާ ކްރިކެޓް ދަނޑަކީ، މާލެއިން ބޭރުގައި ތަރައްޤީކުރި ބައިނަލްއަޤްވާމީ ފެންވަރުގެ ފުރަތަމަ ކުރިކެޓް ދަނޑެވެ. މި ދަނޑު ބިނާކޮށްފައިވަނީ 2011 ވަނަ އަހަރުގެ ތެރޭގައެވެ.