މަސްދަޅުކޭސް ހޯދުމަށް ފްލެޓްތަކުން މީހުންތައް ނިކުމެ، ދިގު ކިއޫއެއް!

ސަރުކާރުގެ ފަރާތުން އާންމުންނަށް މިރޭ މަސްދަޅު ދޫކުރަން ފެށުމާއެކު މަސްދަޅުކޭސް ހޯދުމަށް ގިނަ އަދަދެއްގެ ރައްޔިތުން ނިކުމެ ދިގު ކިއޫއެއް ދަމާލައިފިއެވެ.

ސަރުކާރުން ނިންމާފައިވަނީ މިފަހަރުގެ ރަމަޟާންމަހަށް ކޮންމެ ގޭބިސީއަކަށް މަސްދަޅުކޭހެއް ދިނުމަށެވެ. ސަރުކާރުގެ އެ ވައުދު ފުއްދުމުގެ ގޮތުން މާލެ ސަރަހައްދުގައި މަސްދަޅުކޭސް ބަހަން ފަށާފައިވަނީ މިރެއެވެ.

މަސްދަޅުކޭސް ބަހަން ފެށުމާއެކު އެންމެ ބޮޑު ކިއުއެއް ދަމާލާފައިވަނީ ހުޅުމާލެ ފޭސްދޭއް ހިޔާ ސަރަހައްދުގައެވެ. ހިޔާ ސަރަހައްދުގައި މަސްދަޅުކޭސް ދޫކުރަނީ ޓަވަރު 10 ގައި މީގެކުރިން ޒުވާނުން ކުޅިވަރުތައް ކުޅުމަށް ހެދި ޔުނިޓުންނެވެ.

މަސްދަޅުކޭސް ހޯދުމަށް 10 ވަނަ ޓަވަރާ ހިސާބުން ދަމާލި ކިއު ގޮސް ޓަވަރު 12 ގެ ބަސް ސްޓޭޝަނާ ހިސާބުން ނިމޭއިރު، ކިއުގައި މީހުން ގިނެވެގެން ކިއުއަށް އަރަން ބޭނުންވިނަމަވެސް ނާރައި ތިބި މީހުންވެސް ގިނަކަން ފާހަގަކޮށްލެވެއެވެ.

މާލޭ ސަރަހައްދުގައި މަސްދަޅުކޭސް ބަހަން ނިންމިފައިވާ ސަރަހައްދުތައް:

- މާލޭގައި: މިފްކޯ އޮފީސް ކޮމްޕައުންޑް އަދި ހެންވޭރު އެމްޓީސީސީ ސޯމިލް

- ވިލިމާލޭގައި: ވެމްކޯ ސައިޓް

- ހުޅުމާލެ ފޭސް-1 ގައި: އުމަރު ޒާހިރު ބިލްޑިންގ

- ހުޅުމާލެ ފޭސް-2 ގައި: ހިޔާ ފްލެޓް ޓަވަރ 10 ގެ ޔޫތު ސެންޓަރު

އެސްޓީއޯއިން ބުނީ ރަމަޟާން މަހަށް ގޭބީސީތަކަށް ސަރުކާރުން ހަދިޔާކުރާ މަސްދަޅުކޭސް މިރެއިން ފެށިގެން މިމަހުގެ 27 ވަނަ ދުވަހުގެރޭ ނިޔަލަށް ކުރިއަށްދާނެ ކަމަށެވެ. މަސްދަޅު ދޫކުރުން މާދަމައަށް މެދުކަނދާލިނަމަވެސް ހޮނިހިރުދުވަހުން ފެށިގެން އަނެއްކާވެސް ބަހަން ފަށާނޭކަމަށް އެސްޓީއޯއިން ބުންޏެވެ.

މަސްދަޅުކޭސް ދޫކުރުމަށް ނިންމާފައިވަނީ ގޭބީސީއެއްގެ ކަރަންޓް ބިލްގެ އެންމެ ފަހު ތިން މަހުގެ ބިލްގެ ތެރެއިން ކަރަންޓް މީޓަރު އެނގޭނެ ފަދަ ލިޔުމެއް ގެނައުމުންނެވެ. ހަމަ އެއާއެކު، ބަލާ އަންނަ މީހެއްގެ އައިޑީކާޑު ބޭނުންވާނެ އެވެ. މަސްދަޅު ކޭސް ދޫކުރާނީ ހަމައެކަނި ދިވެހީންނަށެވެ.