ވައްކަން ކުރިކަމަށް ތުހުމަތުކޮށް މަގުމަތީގައި ޝަރީއަތްކޮށްފި

އއ ތޮއްޑޫގައި ވައްކަންކުރި ކަމުގެ ތުހުމަތުގައި ޒުވާނަކަށް އަނިޔާކޮށް، މަގުމަތިން ޝަރީއަތްކޮށް ނިންމައިފިއެވެ.

ތޮއްޑޫގައި ޒުވާނަކަށް އަނިޔާކޮށް އެމަންޒަރު ވީޑިއޯ ކުރުމަށްފަހު މީސް މީޑިއާގައި ވަނީ އާންމުކޮށްފައެވެ. އެވީޑިއޯ އިން ފެންނަ ގޮތުގައި ގްރޫޕަކުން ޒުވާނަކަށް ހަމަލާދީ މޫނުމަތި ފަޅާލާފައި ވެއެވެ. އަދި އޭނާގެ ގައިގައި ތަޅައި އަނިޔާކޮށް ބިންމައްޗަށް ވެއްޓުމުން ޒުވާނާ ރޮމުންދާއިރު ކައިރީގައި ތިބި ބަޔަކު ދަނީ އޭނާއަށް އިންޒާރު ދެމުންނެވެ. އަދި އޭނާ ބަރަހަނާކޮށްފައި ބަނދަރު ސަރަހައްދުގައި ވެސް ބަހައްޓާ މަންޒަރު ފެނެއެވެ.

އެނގިފައިވާ ގޮތުގައި އަނިޔާ ލިބުނު ޒުވާނަކީ އެހެން ރަށެއްގެ މަސް ދޯންޏަކުން އެރަށަށް ދިޔަ ޒުވާނެކެވެ. އޭނާއަށް އަނިޔާ ދިނީ ރޭ ދަންވަރު ރަށުތެރެއަށް އަރައި ސައިކަލުގެ މަޑިތައް ހަލާކުކޮށް، މަޑިދަށުން ވައްކަން ކުރި ކަމަށް ބުނެއެވެ.

ފުލުހުން ބުނީ ތޮއްޑޫގައި މީހަކަށް އަނިޔާދިން މައްސަލައެއް ރިޕޯޓްކޮށްފައި ނުވާކަމަށެވެ. ނަމަވެސް މީސް މީޑިއާގައި ދައުރުވަމުންދާ ވީޑިއޯގެ މައްސަލަ ބަލަމުންދާކަމަށެވެ.

ފަހަކަށް އައިސް ވައްކަންކުރުމާއި ކުޑަ ކުދިންނަށް ޖިންސީ ގޯނާ ކުރާ މައްސަލައިގައި ރައްޔިތުންގެ ތެރެއިން ބަޔަކު ނުކުމެ އެކަމުގައި ތުހުމަތު ކުރެވޭ މީހާއަށް ދަނީ ބޮޑެތި އަނިޔާތައް ދެމުންނެވެ. ބައެއް ފަރާތްތަކުން ފުލުހުންނަށް ރިޕޯޓްކޮށް ތުހުމަތު ކުރެވޭ މީހާ ހަވާލުކުރަނީ ބޮޑެތި އަނިޔާތައް ދިނުމަށްފަހު އެވެ.

އެކަމާއި ގުޅިގެން ފުލުހުން ވަނީ ކުށުގެ ތުހުމަތު ކުރެވޭ މީހުންނަށް މަގުމަތިން އަނިޔާ ނުކުރުމަށް އިލްތިމާސްކޮށްފައެވެ.