ގަވާއިދާ ހިލާފަށް އުޅޭ ބިދޭސީންގެ އަދަދު 100,000 އިން 2,933 އަށް މަދުކުރެވިއްޖެ: އިޙްސާން

ގަވާއިދާ ހިލާފަށް އުޅޭ ބިދޭސީންގެ އަދަދު 2 އަހަރު ތެރޭގައި 100,000 އިން 2,933 އަށް މަދުކުރެވިއްޖެކަމަށް މިނިސްޓަރ އޮފް ހޯމްލޭންޑް ސެކިއުރިޓީ، ލޭބަރ އެންޑް ޓެކްނޯލޮޖީ، އަލީ އިޙްސާން ވިދާޅުވެއްޖެއެވެ.

މިނިސްޓަރު އިޙްސާން މިހެން ވިދާޅުވެފައިވަނީ، މިއަދު އެ މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.

މިނިސްޓަރު ވިދާޅުވީ، ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކުރިއަށްގެންދާ "އޮޕަރޭޝަން ކުރަނގި" ގެ ދަށުން މިހާތަނަށް 206,000 ބިދޭސީންގެ ފިންގަރޕްރިންޓް ނަގާފައިވާ ކަމަށެވެ.

އަދި މި އޮޕަރޭޝަން ފެށިއިރު ރާއްޖޭގައި ގަވާއިދާ ހިލާފަށް އުޅޭ 148,417 ބިދޭސީން ތިބި ނަމަވެސް، މިހާރު އެ އަދަދު ވަނީ 2,933 އަށް ދަށްކުރެވިފައެވެ. މިއީ ވޭތުވެދިޔަ ދެ އަހަރުގެ ތެރޭގައި ކުރެވުނު މަސައްކަތުން ލިބުނު ބޮޑު ކުރިއެރުމެއްކަން މިނިސްޓަރު ފާހަގަކުރެއްވިއެވެ.

މިގޮތުން، އޭރު އަޅުގަނޑުމެން މި މަސައްކަތްތައް ފެށިއިރުގަ ދިވެހިރާއްޖެގަ ވޯކް ޕާމިޓް ފީއެއް ނުދައްކާ އަދި ވިސާއެއް ނެތި، މި ދެ ކެޓަގެރީއިން ކޮންމެސް އެކައްޗެއް ހަމަނުވާ ޖުމްލަ ކޮށް ބުނަންޔާ، ގަވާއިދާއި އެއްގޮތް ވާ ގޮތުގެ މަތިން ނޫން ގޮތައް ރާއްޖޭގައި އުޅެމުންދާކަމަށް އެވަގުތަށް ލިބިފަ ހުރި މައުލޫމާތަކައް ބަލާއިރުގަ 148،417 މީހުން ހިމެނޭ.

މިނިސްޓަރު ވިދާޅުވިއެވެ.

މިނިސްޓަރު ދެއްވި ތަފާސްހިސާބުތަކަށް ބަލާއިރު، މި މަސައްކަތް ފެށިއިރު ރާއްޖޭގައި ގަވާއިދާ އެއްގޮތަށް އުޅެމުންދިޔައީ ބިދޭސީންގެ އެންމެ 28.97 އިންސައްތައެވެ. ނަމަވެސް، ފާއިތުވި ދެ އަހަރުގެ ތެރޭގައި ސަރުކާރުން ކުރި މަސައްކަތްތަކާއެކު، ގަވާއިދާ އެއްގޮތަށް އުޅޭ ބިދޭސީންގެ ނިސްބަތް މިހާރު ވަނީ 62 އިންސައްތައަށް އިތުރުވެފައެވެ.

މިނިސްޓަރު އިހްސާން އިތުރަށް ވިދާޅުވީ، އޮޕަރޭޝަން ކުރަނގީގެ ތިންވަނަ ފިޔަވަހި އަންނަ މެއި މަހުގެ 2 ވަނަ ދުވަހު ފެށުމަށް ހަމަޖެހިފައިވާ ކަމަށެވެ. މި ފިޔަވަހީގެ އަމާޒަކީ ކުރިއަށް އޮތް އެއް އަހަރު ދުވަހުގެ ތެރޭގައި، މިހާރު ރާއްޖޭގައި ތިބި ގަވާއިދާ ހިލާފު ބިދޭސީން ހޯދައި، ހައްޔަރުކޮށް، އަދި ޑީޕޯޓްކޮށް ނިންމުމެވެ.

މެއި 2 ގެ ފަހުން ވިސާ ނެތި ނުވަތަ ދައްކަންޖެހޭ ފީތައް ނުދައްކާ އުޅެނިކޮށް އަތުލައިގަނެވޭ ބިދޭސީން ވަގުތުން ޑީޕޯޓް ކުރެވޭނެ ކަމުގެ އިންޒާރުވެސް މިނިސްޓަރު ވަނީ ދެއްވާފައެވެ.

މޭ 2، 2026 އިން ފެށިގެން ފީ ނުދައްކާ އެއްވެސް ވަރަކަށް އުޅެނިކޮށް އަޅުގަނޑުމެންގެ ލޯ އެންފޯސްމެންޓާ ދިމާވާ ކޮންމެ ބިދޭސީއަކީވެސް އިމީޑިއެޓްލީ ރާއްޖޭއިން ޑީޕޯޓް ކުރެވިގެންދާނެ ފަރާތެއް. ދެންމެ ދެންނެވުނު 62% ގެ އިތުރުން މިތިބި ހުރިހާ އެންމެންނަކީ، މެ ދެންނެވި އެންފޯސްމެންޓަށް ލައިއަބަލް ވާނެ ފަރާތްތައް.

މިނިސްޓަރު ވިދާޅުވިއެވެ.

ބިދޭސީން ގެންގުޅޭ ފަރާތްތަކަށް އިލްތިމާސްކުރަމުން މިނިސްޓަރު ވިދާޅުވީ، އެންފޯސްމަންޓް މަސައްކަތްތައް ފެށި، ބިދޭސީއަކު ހައްޔަރުކުރުމަށްފަހު، އެމްޕްލޯޔަރު އެދިގެންވެސް އެމީހަކު ދޫކޮށްލުން ފަސޭހައެއް ނުވާނެ ކަމަށެވެ. ނަމަވެސް، ސަރުކާރުގެ އިދާރާތަކުގެ އިދާރީ މައްސަލައަކުން ލިޔެކިޔުން ފުރިހަމަނުވެ އޮތް ބިދޭސީއަކު ޑީޕޯޓް ނުކުރާނެކަމުގެ ޔަގީންކަން މިނިސްޓަރު ވަނީ ދެއްވާފައެވެ.

މި އޮޕަރޭޝަނަކީ ރާއްޖޭގައި ވަޒަންވެފައިވާ ބިދޭސީންގެ ފުރިހަމަ މައުލޫމާތު ދެނެގަނެ، ގައުމުގެ ސަލާމަތާއި ރައްކާތެރިކަން ކަށަވަރުކުރުމަށް ކުރިއަށްގެންދާ މުހިންމު މަސައްކަތެކެވެ.