"ރައްކާ ކިކް އޮފް 2026" ލޯންޗުކޮށްފި

މަގުމަތީގެ ސަލާމަތާއި ރައްކާތެރިކަން ކަށަވަރު ކުރުމަށް ހާއްސަ ހަރަކާތްތަކަކާއިއެކު ފުލުހުން ކުރިއަށްގެންދާ ރައްކާ ކިކް އޮފްގެ 2026 ވަނަ ޕްރޮގުރާމުގެ ފުލުހުން އިފްތިތާހުކޮށްފިއެވެ.

މި ޕްރޮގުރާމް އިފްތިތާހުކޮށްފައިވަނީ މިއަދު އިސްކަންދަރު ކޮށީގައި ބޭއްވި ހާއްސަ ޖަލްސާއެއްގެ ތެރެއިންނެވެ. މި ޖަލްސާ ޝަރަފުވެރިކޮށްދެއްވާފައިވަނީ ކޮމިޝަނަރ އޮފް ޕޮލިސް އިސްމާއިލް ނަވީންއެވެ.

މި ރަސްމިއްޔާތުގައި، އެމްޓީސީސީއާއި، އެޗްޑީސީއާއި، އުރީދޫ މޯލްޑިވްސްއާއި، އެލައިޑް އިންޝުއަރެންސް އަދި ޝީޝާގެ އިސްވެރިންނާއި ދައުވަތު އެރުވިގެން ވަޑައިގެންނެވި އެހެނިހެން ބޭފުޅުންގެ އިތުރުން ފުލުހުންގެ ޚިދުމަތުގެ އެގްޒެކެޓިވް ބައެއް އޮފިސަރުންނާއި ކޮމިޝަންޑު އޮފިސަރުން ބައިވެރިވަޑައިގަތެވެ.

ރައްކާ ކިކް އޮފް ޕްރޮގުރާމަކީ 2014 ވަނަ އަހަރުން ފެށިގެން ކޮންމެ އަހަރަކުވެސް ފުލުހުން ހާއްސަ ސަމާލުކަމެއް ދީގެން ބައިވަރު ހަރަކާތްތަކަކާއިއެކު ކުރިއަށްގެންދާ ޕްރޮގުރާމެކެވެ. އެގޮތުން މި ޕްރޮގުރާމްގެ ދަށުން އާއްމުން ހޭލުންތެރިކުރުވުމުގެ އިތުރުން ރައްކާ ރޯޑް ޝޯތަކެއްވެސް ވަނީ ރާއްޖޭގެ އެކި ސަރަހައްދުތަކުގައި ކުރިއަށް ގެންގޮސްފައެވެ. މި ހަރަކާތުގައި މަގުމަތީގެ ސަލާމަތާއި ރައްކާތެރިކަން ގާއިމުކުރުމަށް މިއަހަރުވެސް ސްކޫލުތަކުގެ ދަރިވަރުންނާއި އާންމު ރައްޔިތުން ހޭލުންތެރިކުރުމަށް އެކި ހަރަކާތްތައް ރާވައި ހިންގުމަށް ވަނީ ނިންމައިފައެވެ. އަދި މަގުމަތީގެ ސަލާމަތާއި ރައްކާތެރިކަމާ ގުޅުންހުރި ތަމްރީނު ޕްރޮގްރާމްތައް ކުރިއަށް ގެްދިޔުމަށޤ ހަމަޖެހިފައިވާކަމަށް ފުލުހުން ބުނެއެވެ.

މި އަހަރު މި ޕްރޮގްރާމް އާއި އެކު ޓްރެފިކް ޕޮލިސް އެންޑް ރޯޑް މެނޭޖްމަންޓްގެ އައު ހޭޝްޓެގް އެއްވެސް ވަނީ އިފްތިތާހުކޮށްފައެވެ. އެގޮތުން "ރަނގަޅުކޮށްލާ' ނަމުގައި ފުލުހުން މިއަހަރު މި ފެށި ކެންޕޭނަކީ މަގުމަތީގެ ގަވައިދުތަކާއި އުސޫލުތަކަށް އާއްމުން ހޭލުންތެރިކުރުވުމާއި، މަގުމަތީގެ އެކްސިޑެންޓުތަކާއި، އެކްސިޑެންޓުތަކުން ލިބޭ ގެއްލުންތައް މަދުކުރުމަށާއި، މަގުމަތީގައި ޒިންމާދާރުކަމާއިއެކު އުޅުމުގެ ސަގާފަތެއް ބިނާކޮށް، މަގުމަތީގެ ރައްކާތެރިކަން ގާއިމްކުރުމުގައި އާއްމުންގެ ބައިވެރިވުން އިތުރުކުރުގެ މަގުސަދުގައި ފުލުހުންގެ ރޯޑް ސޭފްޓީ އެވެއާނެސް އެންޑް ޕްރިވެންޝަން ޑިޕާޓްމެންޓުން ކުރިއަށްގެންދާ ހަރަކާތެކެވެ.

މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް ފުލުހުން ކުރަމުންދާ ބުރަ މަސައްކަތަށް އާއްމުންގެ އެއްބާރުލުން ދިނުމަށް ފުލުހުން ވަނީ އެދިފައެވެ. އަދި މިއަދު މި އިފްތިތާހު ކުރެވުނު ހަރަކާތްތަކަށް އާއްމުންގެ ފުރިހަމަ ތާއީދު ދިނުމަށްވެސް ފުލުހުން އެދިފައިވެއެވެ.