މެލޭޝިއާއިން ރާއްޖެއަށް 561 ސްކޮލަޝިޕްގެ ފުރުސަތު ދެނީ

މެލޭޝިއާއިން ދިވެހި ދަރިވަރުންނަށް 561 ސްކޮލަޝިޕް ފުރުސަތު ދިނުމުގެ އެއްބަސްވުމެއްގައި މިއަދު ސޮއިކުރެވިއްޖެއެވެ. މި އެއްބަސްވުމުގައި ސޮއިކުރެވުނީ ހަޔަރ އެޑިޔުކޭޝަން މިނިސްޓްރީގައި ބޭއްވުނު ރަސްމިއްޔާތެއްގައި، އެޑިޔުކޭޝަން މެލޭޝިއާ ގްލޯބަލް ސާވިސްއާ އެކުގައެވެ.

މި އެއްބަސްވުމުގެ ދަށުން ހަ ދާއިރާއަކުން ސްކޮލަޝިޕް ފުރުސަތުތައް ލިބޭނެއެވެ. އޭގެ ތެރޭގައި އާރޓްސް އެންޑް ހިއުމެނިޓީސްއަށް 75 ފުރުސަތު، އިންޖިނިއަރިންގ އެންޑް ޓެކްނޮލޮޖީއަށް 150 ފުރުސަތު، އަދި ސޯޝަލް ސައިންސަސް އެންޑް މެނޭޖްމަންޓަށް 255 ފުރުސަތު ހިމެނެއެވެ. އަދި ލައިފް ސައިންސަސް އެންޑް މެޑިސިންދާއިރާއިން 63 ފުރުޞަތާއި، ނެޗުރަލް ސައިންސަސްގެ ދާއިރާއިން 11 ފުރުޞަތު ދިނުމަށް ހަމަޖެހިފައިވާއިރު، އެހެނިހެން ދާއިރާތަކުންވެސް އިތުރު 7 ފުރުޞަތު ދިނުމަށްވަނީ މިއަދު އެއްބަސްވެފައެވެ.

ހަޔަރ އެޑިޔުކޭޝަން މިނިސްޓަރު ޑރ. މަރިޔަމް މާރިޔާ ވިދާޅުވީ މި އެއްބަސްވުމަކީ ދިވެހި ދަރިވަރުންނަށް ފެންވަރު ރަނގަޅު މަތީ ތަޢުލީމާއި ތަމްރީނު ހާސިލުކުރުމަށް ލިބޭ "ރަނުގެ ފުރުސަތެއް" ކަމަށެވެ. އަދި މިއީ ތަޢުލީމީ ދާއިރާގެ ކުރިއެރުމާއި، ދެ ޤައުމުގެ ތަޢުލީމީ މަރުކަޒުތަކުގެ ތަރައްޤީއަށް ދެވޭ އިސްކަމުގެ ނިޝާނެއް ކަމުގައިވެސް އޭނާ ފާހަގަކުރެއްވިއެވެ.

މި ސްކޮލަޝިޕްތަކުގެ ދަށުން ދަރިވަރުންގެ ކޯސްފީއަށް މާލީ އެހީ ދިނުމުގެ އިތުރުން، ވިސާ އަދި އިދާރީ ކަންކަން ހަމަޖެއްސުމުގައިވެސް މެލޭޝިއާގެ އިދާރާތަކުން އެހީތެރިކަން ފޯރުކޮށްދޭނެ ކަމަށް ގްލޯބަލް ސާވިސްއިން ބުނެފައިވެއެވެ.

މެލޭޝިއާއަކީ އެންމެ ގިނަ އަދަދެއްގެ ދިވެހި ދަރިވަރުން މަތީ ތަޢުލީމު ހާސިލުކުރަމުންދާ އެއް ޤައުމެވެ. މިހާރުވެސް 1700 އަށްވުރެ ގިނަ ދިވެހި ދަރިވަރުން އެ ޤައުމުގައި ކިޔަވަމުންދާކަން ފާހަގަކުރެވެއެވެ.