ހިދުމަތް ރަނގަޅު ކުރުމަށް ސްޓެލްކޯއިން ސްކާޑާ ސިސްޓަމް ތައާރަފްކޮށްފި

ކަސްޓަމަރުންނަށްދޭ ހިދުމަތް ރަނގަޅު ކުރުމަށް ސްޓެލްކޯއިން ސްކާޑާ ސިސްޓަމް ތައާރަފްކޮށްފިއެވެ.

ސްޓެލްކޯއިން ބުނީ މިއީ ކަރަންޓުގެ ހިދުމަތް ނިޒާމީ ގޮތެއްގައި ރަނގަޅުކޮށް ވަރުގަދަ ކުރުމަށް ބޮޑު އިސްކަމެއް ދިނުމުގެ ގޮތުން ތައާރަފް ކުރި ހިދުމަތެއް ކަމަށެވެ.

ސްޓެލްކޯއިން ފާހަގަކުރި ގޮތުގައި، އެ ކުންފުންޏަށް އެންމެ ގިނައިން ހުށަހަޅާ ޝަކުވާއަކީ ކަރަންޓް ބިލް ބޮޑުވުމާއި ތަކުރާރުކޮށް ކަރަންޓް ކަނޑައިގެން ދިއުމުގެ ޝަކުވާ ކަމަށާއި، އެއާއިއެކު، މައްސަލަތައް ހައްލުކުރުމަށް ފަސޭހަ ގޮތެއް ނެތުމުން އަބަދުވެސް ކުންފުންޏަށް ޝަކުވާތައް އަމާޒުވަމުން އަންނަ ކަމަށެވެ.

ހަމައެއާއިއެކު، ޓެކްނިކަލް މަސައްކަތްތަކުގައި ކަރަންޓް ކަނޑާލާ ވަގުތުތަކުގައި ކަރަންޓުގެ ހިދުމަތް އަލުން ހޯދުމަށް ހޭދަވާ ދިގު މުއްދަތެވެ. މިކަމުގެ އެންމެ އުނދަގޫ ކަމަކީ ރަށެއްގައި ވަޔަރ ކެނޑިގެން ނުވަތަ އިންޖީނު ފޭލްވުމުން ކަރަންޓް ކަނޑާލުމުން ކަރަންޓް އަލުން ގުޅުވުމަށް ހޭދަވާ ވަގުތަކީވެސް ކުރިމަތިލާން ޖެހޭ ބޮޑު ގޮންޖެހުމެއްކަން ސްޓެލްކޯއިން ފާހަގަކުރިއެވެ.

ސްޓެލްކޯއިން ބުނީ، މިފަދަ މައްސަލަތައް ހަލުވިކަމާއެކު ހައްލުކޮށް، ހިދުމަތް ފޯރުކޮށްދިނުމުގައި ފަސޭހަ ގޮތްތަކެއް ކަށަވަރުކުރުމަށް އެ ކުންފުނިން ކުރަމުން އަންނަ މަސައްކަތްތަކުގެ ތެރެއިން ކުންފުނީގެ މައި އޮފީހުގެ ތެރޭގައި މިހާރު ގާއިމް ކުރަމުންދާ ސެންޓްރަލް ސްކާޑާ ސިސްޓަމަކީ، މިފަދަ ހުރިހާ މައްސަލަތަކަށް އަވަސް ހައްލެއް ހޯދުމަށް މަގުފަހިކޮށްދޭ އަގުހުރި އެސެޓެއްކަން ސާބިތުވާނެ ކަމަށެވެ.

މި ސިސްޓަމް މެދުވެރިކޮށް، ކުންފުނީގެ ހިދުމަތް ބޭނުންކުރާ 35 ސަރަހައްދަކުން ކަރަންޓް ސްޓްރީމްތައް އެއް ނެޓްވޯކަކަށް ގުޅުވައިދޭއިރު، އެކަން ފެށުމާއެކު އާންމުންނަށް ކަރަންޓް އިގްތިސާދު ކުރުމުގެ ފުރުސަތު ލިބިގެންދާނެ ކަމަށާއި، ކަރަންޓް މެދުކެނޑުމުގެ މައްސަލަތައް ވެސް ކުރު މުއްދަތެއްގެ ތެރޭގައި އަވަހަށް ހައްލު ކުރެވުމުގެ އިތުރުން، މި ސިސްޓަމާއިއެކު އެއް ލޮކޭޝަނެއްގައި ހުރެގެން ކަރަންޓްގެ ހިދުމަތް މޮނީޓާ ކުރެވޭނެ ކަމަށް ސްޓެލްކޯއިން ބުނެއެވެ.

އެކި އެކި މަރުހަލާތަކަށް ބަހާލައިގެން ކުރިއަށްގެންދާ މި މަސައްކަތުގައި ބޮޑަށް ބަލަނީ އެކި ރަށްރަށުގައި ބަހައްޓާފައިވާ ފީޑަރތަކަށް ކޮންމެ ރަށެއްގެ ކަރަންޓުގެ ލޯޑް ނުވަތަ ބޭނުންކުރާ މިންވަރު ރީޑްކުރުމުގެ ގާބިލުކަން ދިނުމަށެވެ.

ސްޓެލްކޯއިން މައުލޫމާތު ދޭ ގޮތުގައި، މި ފީޑަރުން ވަގުތުން ރށްރަށުގައި ކަރަންޓު ބޭނުންކުރާ މިންވަރު ފޯކާސްތް ކޮށްދޭނެ އެވެ. އަދި ޔޫސޭޖް ލެވެލް ދަށްވަމުންދާކަން ދައްކުވައިދޭނެއެވެ. އަދި މިހާރު ސިސްޓަމަށް ވެސް އޮޕަރޭޓް ކުރަމުންދާ ހުރިހާ އިންޖީނެއްގައި ކޮންމެ ޕެރެމީޓަރެއް ވަގުތުން އެއްކުރުމާއި މޮނިޓަރ ކުރުމަށް މަގުފަހިކުރުމުގެ މަސައްކަތް ވެސް ކުރިއަށްދާ ކަމަށް ސްޓެލްކޯއިން މައުލޫމާތު ދެއެވެ.