އެއްވެސް ލިޔެކިޔުމެއްނެތި 161 މިލިއަންރުފިޔާ އެކިއެކި ފަރާތްތަކަށް ހުރީ ދޫކޮށްފައި: މެމްބަރ ފަލާޙް

އެއްވެސް ލިޔެކިޔުމެއް ނެތި ރޯޑް ޑިވަލޮޕްމަންޓް ކޯޕަރޭޝަން (އާރްޑީސީ) ގެ ކުރީގެ މެނޭޖުމަންޓުން 161 މިލިއަން ރުފިޔާ އެކި ފަރާތްތަކުގެ އެކައުންޓުތަކަށް ޖަމާކޮށްފައިވާ ކަމަށް އިނގުރައިދޫ ދާއިރާގެ މަޖިލިސް މެމްބަރ އިބްރާހިމް ފަލާހް ވިދާޅުވެއްޖެއެވެ.

ޕީޕަލްސް ނޭޝަނަލް ކޮންގްރެސް (ޕީއެންސީ) އިން މިރޭ ބޭއްވި ހަރުގެ ޖަލްސާގައި ވާހަކަފުޅު ދައްކަވަމުން ފަލާޙް ވިދާޅުވީ މިކިޔަނީ 161 ރުފިޔާގެ ވާހަކަ ނޫންކަމަށާއި އެއީ ބިލިޔަން ރުފިޔާގެ ވާހަކަ ކަމަށެވެ.

ފަލާހް ވިދާޅުވީ މިދައްކަނީ ހަމަ ސަރުކާރަކުން މިގައުމުގެ ރައްޔިތުންނާ ދޭތެރޭ ކޮށްފައި ހުރި ދެރަވަރު ކަންތައް ތަކުގެ ވާހަކަ ކަމަށެވެ.

ފަލާޙް ވިދާޅުވީ މިފަދަ ވާހަކަތައް ދައްކަންޖެހެނީ އަދުގެ ސަރުކާރާ މެދު ރައްޔިތުންގެ މެދުގައި ނަފްރަތު އުފެއްދުމަށް ބައެއް ސިޔާސީ ވެރިން ޓީވީތަކަށް އަރައިގެން މިސަރުކާރަކަށް ކަމެއްނުވެއޭ ކިޔައިގެން ދައްކަވަމުން ގެންދަވާ ދޮގު ވާހަކަތަކަށް ރައްދެއްދިނުމުގެ ގޮތުންކަމަށެވެ.

"ތިބޭފުޅުން ނިކަން ވިސްނަވާ 2008 ވަނައަހަރުން ފެށިގެން ވެރިކަމަށް އައި އެއްވެސް ސަރުކާރަކުން ވެރިކަމަށް އަންނަތާ ފުރަތަ 7 މަސް 8 މަސް ދުވަސްތެރޭގައި އަލަށް ފަށައިގެން އެއްވެސް ޕްރޮޖެކްޓެއް ނުހުންނާނެ ނިންމިފައެއް"

މިރޭގެ ޖަލްސާގައި ފަލާޙް ވިދާޅުވިއެވެ.

މިރޭގެ ޖަލްސާގައި ވާހަކަފުޅު ދައްކަވަމުން މެމްބަރު ފަލާޙް އިތުރަށް ވިދާޅުވީ މިސަރުކާރަށް ރައްޔިތުން ކުރާތާއީދު ވަރަށް ސާފުކޮށް ފެންނަން އެބޮތްކަމަށާއި، އެކަން ރައީސް ޑރ.މުޢިއްޒުގެ ރިޔާސީ އިންތިޚާބުން ސާފުވާކަމަށެވެ. އަދި އިދިކޮޅު ފަރާތްތަކުން ދައްކަމުންދާ ވާހަކަތަކަކީ އެއީ ހަޤީޤަތްކަމަކަށް އެކަމުގެ ސަބަބުން ރައްޔިތުނަށް ޤަބޫލެއް ނުކުރެވޭކަމަށެވެ.

"ފުރަތަ ރިޔާސީ އިންތިޚާބުން ރައްޔިތުން ޑރ.މުޢިއްޒު ވަރަށް ތަނަވަސް އަޣުލަބިއްޔަތަކުން އެއޮތީ އިންތިޚާބު ކާމިޔާބު ކުރައްވާފައި، ޖެހިގެން މިއައީ ރައްޔިތުންގެ މަޖިލިސް އިންތިޚާބު ، މިހާތަނަށް ދިވެހި ތާރީޚްގައި ދުވަހަކުވެސް ރައްޔިތުން ރައީސަކަށް ނުދޭވަރުގެ ތާއީދެއް މިފަހަރު މިއޮތީ ރައްޔިތުން އެމަނިކުފާނަށް ދެއްވާފައި، ދެން ކިހިނެއްތޯ ރައްޔިތުން އެވާހަކަތައް ޤަބޫލުކުރާނީ"

ފަލާހް ވިދާޅުވިއެވެ.

ފަލާހު ވިދާޅުވީ ރައީސް މުއިއްޒުގެ އިރުޝާދުފުޅުގެ ދަށުން ރައްޔިތުންގެ މަޖިލީހުގެ މެންބަރުން ރެޔާ ދުވާލު މަސައްކަތް ކުރަމުންދަނީ ރައްޔިތުންނަށް ޚިދުމަތްތެރި މަސައްކަތްތަކެއް މަޖިލީހުގެ ތެރެއިން ކުރުމަށް ކަމަށެވެ. އަދި ރައީސް މުއިއްޒު އާ މެދު ރައްޔިތުންގެ ހިތްތަކުގައި ސުވާލު އުފެއްދުމަށް އިދިކޮޅު ފަރާތްތަކުން ކުރަމުންދާ މަސައްކަތް ކާމިޔާބު ނުވާނެ ކަމަށްވެސް ފަލާހު ވިދާޅުވިއެވެ.