އަމިއްލަ ކެންޑިޑޭޓުންނާ ދެކޮޅަށް އެންޓިކެމްޕެއިން

ކުރިއަށް އޮތް ރައްޔިތުންގެ މަޖިލީހުގައި އަމިއްލަ ގޮތުން ވާދަކޮށް ކެމްޕެއިން ކުރަމުންދާ ކެންޑިޑޭޓުންނާ ދެކޮޅަށް ހިންގާ އެންޓި ކެމްޕެއިން ހަރަކާތްތަކެއް މާލެތެރެއިން ފެންނަން ފަށައިފިއެވެ. އެގޮތުން މާލެތޭރޭގައި އަމިއްލަ ކެންޑިޑޭޓުންގެ އަގު ވަށްޓާލުމަށާއި ރައްޔިތުންގެ ހިތުގައި އެމީހުންނަކީ އެއްވެސް އަގެއް ނެތް ބައެއްކަން އަނގައިދޭ ލިޔުންތައް ލިޔެ ބެނާތަށް ހަރުކުރުންފަދަ ކަންކަން ދަނީ ފާހަގަ ކުރެވެމުންނެވެ.

އެއް ބެނާއެއްގައި ރައީސް ނަޝީދު ވިދާޅުވާކަމަށް ލިޔެފައި ވެއެވެ. " އަމިއްލަގޮތުން މަޖިލީހަށް ހޮވޭ މެމްބަރުންނަށް ކޮށްދެވޭނެ ކަމެއް ނޯންނާނެ" މިބެނާއާއިމެދު ވާހަކަދެއްކި އެކަކު ބުނެފައި ވެއެވެ. އެބެނާގައިވަނީ ތެދު ހަގީގަތެވެ. އެހެންމީހަކުބުންޏެވެ. އަމިއްލަގޮތުން މަޖިލީހަށް ހޮވުނަސް މަޖީލީހުގައި މައްސަލަތަކާއިމެދު ދާއިރާގެ ރައްޔިތުންގެ އަޑު އުފުލައި ވާހަކަ ދައްކައި ބިލްތަކަށް ވޯޓްދެވޭނެ ނޫންހެއްޔެވެ. ތަފާތަކީ ޕާޓިން އަންގާހައިގޮތަކަށް އެއީ ކަނޑައެޅިގެން ނުބައެއް ހިމެނޭކަމަކަށްވިޔަސް ވޯޓްދޭން މަޖްބޫރު ހާލަތަކަށް އަމިއްލަ ކެންޑިޑޭޓް ނުދިއުމެވެ.

ކުރީގެ ރައީސުންނަށްވެސް މަޖީލީހަށް ކުރިމަތިލުމުގެ ހައްގު މިހާރު އޮނައިރު އަމިއްލަ ކެންޑިޑޭޓުންނަކީ އެއްވެސް އަގެއް ނެތް ބަޔެއްކަމަށް ބުނުމަކީ ވަރަށް ބޮޑު އެތިކަލް މައްސަލައެއް ކަމަށް ބައެއް މީހުން ދެކެއެވެ.

އަމިއްލަ ކެންޑިޑޭޓުންގެ ވީކްނަސްވެސް މީހުން ފާހަގަ ކުރެއެވެ. ޕާޓީގެ ނުވަތަ ވަކި މީހެއްގެ އަޅަކަށް ނުވިޔަސް ވޯޓަކާއިޖެހޭއިރު އޮންނަނީ ބިޑް ހުށަހެޅި މެމްބަރުން ލާރީގައި ޖެހިފައެވެ.

ސޯޝަލް މީޑިއާގެ ހަރަކާތްތަކުގެތެރެއިން އެހެން ކަމެއްވެސް ފާހަގަ ކުރެވެއެވެ. އެއީ "މަގޭ އެމްޕީ" އޭ ކިޔައިގެން ޓްރާންސްޕޭރަންސީ މޯލްޑިވްސް އިން ހިންގާ ކެމްޕެއިނެކެވެ. އެކެމްޕެއިންގައި މީހުންނަށް އެހީތެރިވެދޭން މަސައްކަތްކޮށްފައި ހުންނަނީ ކަޅުފައިސާއާއި ކަރޮޕްޝަންގެ ތުހުމަތުން ފަސްބައި ހަޑިވެފައިނުވާ އެމްޕީއަކު އެމީހަކު ނިސްބަތްވާ ދާއިރާއިން ފާހަގަކުރާނީ ކިހިނެއްކަން ބުނެދިނުމަށެވެ.

އެކަމަކު އެކެމްޕެއިން ހިންގާއިރު މިދިޔަ މަޖްލިސް އިންތިޚާބުގައިވެސް މީހުން ގިނައިން ހޮވީ ފަސްބައި ހަޑިނޫން ކެންޑިޑޭޓުންނެވެ. ފަސް އަހަރު ނިމޭއިރު އެހުރިހައި އެންމެންކަހަލަ ގޮތަކަށް އެތިބީ ހޯދި ލާރިތަކުން މުއްސަނދިވެފައެވެ. މިއަދު މިލިޔަން ރުފިޔާ ކެމްޕެއިންއަށް ހޭދަނުކުރާ ކެންޑިޑޭޓަކު ނެތެވެ.