އެއީ ފަނޑިޔާރުގޭގެ ބާރުތަކަށް ބަދަލުގެންނާނެކަމުގެ ބާރުގަދަ ސިގްނަލެއް
ރާއްޖޭގެ ޝަރުއީ ނިޒާމު ނުވަތަ ފަނޑިޔާރުގެ އިސްލާހްކުރާނެކަމުގެ ބާރުގަދަ ސިގްނަލެއް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ދެއްވައިފިއެވެ.
ރައީސް ސާލިހް އެމަނިކުފާނުގެ ފުރަތަމަ ރިޔާސީ ބަޔާނުގައި ވިދާޅުވީ " ކޯޓުތަކާއި ފަނޑިޔާރުން އިޞްލާޙުގެ މަގަށް ރުޖޫޢަވެގެން ނޫނީ، މިޤައުމުގެ އެއްވެސް ކަމަކަށް ހަމަޖެހުމެއް ނާންނާނެ."ކަމަށެވެ. އަދި ވިދާޅުވީ ފަނޑިޔާރުގެ އިސްލާހްކުރުމަކީ މިހާރުން މިހާރަށް ކުރަންޖެހިފައިވާ އެންމެ މުހިންމު އެއް ކަންތައްކަމުގައެވެ.
ފަނޑިޔާރުން އިސްލާހުގެ މަގަށް ރުޖޫއަވާންޖެހޭކަމަށް ރައީސް ވިދާޅުވީ ކޮންކަމަކަށް އިޝާރާތްކުރައްވާފައިކަމެއް ސާފެއް ނުވެއެވެ. މީގެކުރިން ރައީސް އަބްދުﷲ ޔާމީންގެ ސަރުކާރުގައި އެކިއެކި ކުށްތައް ސާބިތުވެ ބައެއް ސިޔާސީ ލީޑަރުން ޖަލަށްލެވިފައިވެއެވެ. އަދި ރައީސް ސާލިހް ރައީސްކަމުގެ މަގާމާ ހަވާލުވެވަޑައިގަތުމަށްފަހު އެހުރިހައި އެންމެން ކޯޓްތަކުގެތެރެއިންވަނީ ދޫކުރެވިފައެވެ.
އޮޕޮޒިޝަން ޕާޓީއެއްގެ ގޮތުގައި މިވަގުތު އޮތީ އެންމެ ޕާޓީއެކެވެ. އެއީ ކުރީގެ ރައީސް އަބްދުﷲ ޔާމީންގެ ޕީޕީއެމްއެވެ. ރައީސް ސާލިހްގެ ސަރުކާރުންވަނީ އަބްދުﷲ ޔާމީންގެ މައްޗަށް ކަރޮޕްޝަންގެ ދައުވާ އުފުލާފައެވެ. އެހެންކަމުން ތަކުރާރުވާނީ އެއްކަމެކެވެ. ކުށްވެރިވީމާ ލީޑަރަކަށްވިޔަސް ޖަލަށްދާން ޖެހުމެވެ.
އުއްތަމަފަނޑިޔާރާއި ސުޕްރީމް ކޯޓުގެ ފަނޑިޔާރުން ވަޑައިގެން ތިއްބެވި ރަސްމިއްޔާތުގައި ރައީސް ސާލިހް ވިދާޅުވީ ރައްޔިތުންނަށް އިންސާފު ލިބޭނެކަން ޔަގީންކޮށްދޭންޖެހޭކަމަށެވެ.
ފަނޑިޔާރުގެ އިސްލާހްކުރުމުގެ ބާރުގަދަ ސިގްނަލް ރައީސް ދެއްވިއިރު އެމަނިކުފާނުގެ ޕާޓީންވަނީ ފަނޑިޔާރުގެ އިސްލާހްކުރާނެގޮތުގެ އެޖެންޑާއެއް ނުވަތަ އެޕާޓީން ރާވާފައިވާގޮތުގެ ތަފްސީލު ހާމަކޮށްފައެވެ.
އެމްޑީޕީން ހުށަހަޅާފައިވަނީ ސުޕްރީމް ކޯޓުގެ ބާރުދަށްކޮށްލައި ރައްޔިތުންގެ މަޖިލީހާއި ސަރުކާރުގެ ކޮންޓްރޯލްކުރާ ތަނަކަށް ބަދަލުކޮށްލުމަށެވެ.
ގާނޫން އަސާސީގައި ޖުޑިޝަރީ ދައުލަތް ހިންގުމުގެ ވަކި ބާރަކަށް ހަދާފައިވީނަމަވެސް އެމްޑީޕީގެ ހުށަހެޅުމުގައި ވަނީ ފަނޑިޔާރުގެ ހިންގާ ޖުޑިޝަލް އެޑްމިނިސްޓްރޭޝަން (ޑީޖޭއޭ) ހިންގާ ޗީފް ޖުޑިޝަލް އެޑްމިނިސްޓްރޭޓަރ އަކީ ރައްޔިތުންގެ މަޖިލީހުގެ މިނިވަން މުއައްސަސާތަކާއިބެހޭ ކޮމެޓީން ކަނޑައަޅާމީހަކަށް ހަދައި އޭނާ ޒިންމާދާރުވާންޖެހޭ ފަރާތަކީވެސް މަޖިލީސްގެ އެކޮމެޓީކަމުގައި ހެދުމަށެވެ. މީގެއިތުރަށްވެސް ކޯޓްތަކުގެ މިހާރު ހުރި މުހިއްމު ބާރުތަކެއް ނަގައި ސިޔާސީގޮތުން އައްޔަންމިކުރާ ފަރާތަށް ނަގުލުކުރުމަށް ހުށަހަޅާފައިވެއެވެ. ލަފާކުރެވޭގޮތުން ރައްޔިތުންގެ މަޖިލީހުގެ އިންތިޚާބަށްފަހު ފަނޑިޔާރުގެއާމެދު ހިގާ ހަނގުރާ ފެށިގެން ހިގަމުންދާނެއެވެ.
އެމްޑީޕީން ރާވާފައިވާ މިޕްލޭނަކީ ގާނޫން އަސާސީއާއި ފުށުއަރާ ކަންތައްތަކެއްކަމަށް ބައެއް ގާނޫނީވަކީލުން ބުނެފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
