ދިމްޔާތުގައި ހުރީ އަމިއްލަ ޚަރަދު ގައި، ދައުލަތުގެ ފައިސާ ހަރަދުކޮށްފައެއް ނުހުންނާނެ: ރައީސް މުއިއްޒު

ދިމްޔާތުގައި ހުންނެވި ދުވަސްވަރު ދިމްޔާތަށް ހަރަދުކުރެއްވީ އަމިއްލަފުޅަށް ކަމަށާއި، ދައުލަތުގެ އެންމެ ރުފިޔާއެއްވެސް ދިމްޔާތަށް ޚަރަދު ނުކުރައްވާ ކަަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިފަދައިން ވިދާޅުވީ ރައީސް އޮފީހުން ކުރިއަށްގެންދާ، ރައީސްގެ ޖަވާބު ޕްރޮގްރާމްގައި ށ.ފުނަދޫ، ނީލްވިލާ، އާމިނަތު ނަޖްމާ، ރައީސް ދެކަނބަލުންގެ ފަރިއްކޮޅަށާއި، އަމިއްލަފުޅު ގޭގެ ޚަރަދުބަރަދަށް ދައުލަތުން އެތައް މިލިއަން ރުފިޔާއެއް ހޭދަކޮށްފިކަމަށް ފަތުރާ ވާހަކައިގެ ހަގީގަތާމެދު ކުރި ސުވާލަށް ޖަވާބު ދެއްވަމުންނެވެ.

ރައީސް ޑރ.މުއިއްޒު ވިދާޅުވީ ދިމްޔާތުގައިި ހުންނެވި ދުވަސްތަކަށް ދައުލަތުން 25 މިލިއަން ހަރަދު ކުރިކަމަށް ބުނާ ވާހަކައަކީ ކަނޑައެޅިގެން ދޮގު ވާހަކައެއް ކަމަށެވެ. ދައުލަތުން ހަރަދު ކުރާ ގޮތަށް ހަމަޖެހިފައި އޮންނަ ނަމަވެސް، އެއްވެސް ކަމެއްގައި، އަމިއްލަ އަތުން ނޫނިއްޔާ ގެޔަަށް ހަރަދުކުރަން ބޭނުންފުޅުނުވި ސަބަބަކީ ދުވަހަކުވެސް މިފަދަ ވާހަކައެއް ބުނުމަށް ވެސް މީހަކަށް ފުރުސަތު ނުދިނުން ކަމަށް ރައީސް ޑރ.މުއިއްޒު ވިދާޅުވިއެވެ.

"އެއްކަމަކަށް ދެން ތިވިދާޅުވީ އަޅުގަނޑު ގޭގައި އަޅުގަނޑު ހުރި ދުވަސްތަކަށް 25 މިލިއަން ހަރަދު ކުރިކަމަށް. އެއީ ކަނޑައެޅިގެން ދޮގު ވާހަކައެއް. އަޅުގަނޑު ގޭގައި ހުރީ އަޅުގަނޑު އަމިއްލަ ހަރަދުކޮށްގެން. ދައުލަތުގެ އެންމެ ރުފިޔާއެއްވެސް ހަމަ އެއްވެސް ހަރަދެއް ނުހުންނާނެ ގެޔަށް ކޮށްފައެއް. އަދި އެއްވެސް ކަމަކަށް ހަރަދެއް ނުވެސް ކުރުވަން."

ރައީސް ޑރ.މުއިއްޒު ވިދާޅުވިއެވެ.

މީގެ އިތުރުންވެސް ރައީސް ޑރ.މުއިއްޒު ވިދާޅުވީ، ބުއްދީގެ ގޮތުން ބަލާއިރުވެސް، 100 ދުވަސްތެރޭ ކެއުމަށް 30 މިލިއަން ރުފިޔާ ހަރަދު ކުރުމަކީ ގަބޫލު ކުރަން ދަތި ވާހަކައެއް ކަމަށެވެ. މުލިއާގޭގެ ބަޖެޓްގައި ވެސް ކެއުމަށް އޮންނަނީ އަހަރަކު 7 ލައްކަ ރުފިޔާކަން ފާހަގަކުރައްވަމުން އެމަނިކުފާނު ވިދާޅުވީ، 100 ދުވަސްތެރޭ 30 މިލިއަން ރުފިޔާ ހަރަދުވާނީ ދުވާލަކު އެތައް ލައްކަ ރުފިޔާ އެއް ހަރަދުކޮށްގެންކަމަށެވެ.

"ބުއްދީގެ ގޮތުން ބަލާއިރުވެސް، ބުއްދީގެ ހަމަތަކުން ބަލާއިރުވެސް، ގަބޫލުކުރަން ދަތި ވާހަކައެއް 30 މިލިއަން ރުފިޔާ 100 ދުވަސްތެރޭ ކެއުމަށް ހަރަދު ކުރުން. މުލިއާގޭގެ ބަޖެޓްގައި ވެސް ކެއުމަށް އޮންނަނީ އަހަރަކު 7 ލައްކަ ރުފިޔާ. އަހަރަކު 7 ލައްކަ ރުފިޔާ. ދެން 30 މިލިއަން ދުވާލަކު އެތައް ލައްކަ ރުފިޔާ އެއް ހަރަދުކޮށްގެން ނޫންތޯ 100 ދުވަސްތެރޭ 30 މިލިއަން،"

ރައީސް ޑރ.މުއިއްޒު ވިދާޅުވިއެވެ.

ރައީސް ޑރ.މުއިއްޒު ވިދާޅުވީ މިއީ މި ސަރުކާރުގެ މަސައްކަތްތައް ދެފުށް ފެންނަ ގޮތަށް ރައްޔިތުންނަށް ސާފުކޮށް އެނގޭތީ، އިދިކޮޅުން އެކަމަށް ދައްކާނެ ވާހަކައެއް ނެތުމުން ހަދައިގެން އުޅޭ ސްޓްރެޓެޖީކަމަށެވެ. މީގެ ތެރޭގައި އިދިކޮޅު ފަރާތްތަކާއި ރެޖިސްޓަރ ނުކޮށް ހިންގާ ނޫސްތަކާއި ފޭސްބުކް ޕޭޖްތައް ހިމެނޭ ކަމަށް ވެސް އެމަނިކުފާނު ވިދާޅުވިއެވެ.

ކުރިއާއި ހިލާފަށް އެއްވެސް ހަގީގަތެއް ނެތް ވަރަށް ބައިވަރު ވާހަކަތައް ފަތުރަމުންދާކަން ފާހަގަކުރައްވަމުން ރައީސް ޑރ.މުއިއްޒު ވަނީ އެފަދަ ވާހަކައެއް އިވިއްޖެ ނަމަ، ކަންކަމުގެ ހަގީގަތް ބެލުމަށް އެދިވަޑައިގެންފައެވެ.