ލަންކާގައި ވަގަށް ހިންގަމުންދިޔަ ޓީވީ ސްޓޭޝަނެއް ރެއިޑްކޮށް، ދިވެއްސަކު ހައްޔަރުކޮށްފި

ލަންކާގެ ރަތުމަލާނާ އިންޓަނޭޝަނަލް އެއާޕޯޓް ކައިރީގައި އޮންނަ ހައި-ސެކިއުރިޓީ ޒޯނެއްގައި ސިއްރުން ހިންގަމުންދިޔަ ޣައިރުޤާނޫނީ ޓީވީ އަދި ރޭޑިއޯ ޓްރާންސްމިޝަން ސެންޓަރެއް ފުލުހުން ރެއިޑްކޮށް ދިވެއްސަކު ހައްޔަރުކޮށްފިއެވެ.

’ނިޔުސް ވަޔާ‘އިން ހާމަކޮށްފައިވާގޮތުން، މައުންޓް ލެވީނިއާ ޑިވިޜަނަލް ކްރައިމް އިންވެސްޓިގޭޝަން ބިއުރޯއިން ޓެލެކޮމިއުނިކޭޝަން އިދާރާތަކުގެ އެހީތެރިކަމާއެކު ހިންގި މި އޮޕަރޭޝަނުގައި ދެ މީހަކު ވަނީ ހައްޔަރުކޮށްފައެވެ. ފުލުހުން ބުނި ގޮތުގައި ހައްޔަރުކުރި މީހުންގެ ތެރޭގައި 55 އަހަރުގެ ދިވެއްސަކު ވެސް ހިމެނެއެވެ. އަދި އެމީހާއަކި ލަންކާގެ ކަލުބޯވިލާ ސަރަހައްދުގައި ދިރިއުޅޭ މީހެއް ކަމަށްވެސް ބުނެފައިވެއެވެ. ނަމަވެސް އިތުރު ތަފްސީލެއް ނުދެއެވެ.

މި ސިއްރު ސެންޓަރު ހިންގަމުން ގޮސްފައިވަނީ އާޓިޑިޔާ ސަރަޙައްދުގައި، ޓްރެވަލް ކުންފުންޏެއްގެ ނަމުގައެވެ.

މި ތަނުން ގާތްގަނޑަކަށް 50 މިލިއަން ލަންކާ ރުޕީސްގެ އަގުހުރި މުދާ ފުލުހުންގެ ބެލުމުގެ ދަށަށް ގެންގޮސްފައިވެއެވެ. އޭގެ ތެރޭގައި ސެޓެލައިޓް ރިސީވަރުތަކާއި، ސެޓެލައިޓް ޑިޝްތަކާއި، ގިނަ އަދަދެއްގެ ކޮމްޕިއުޓަރުތަކާއި، ސްޓާލިންކް ޔުނިޓެއްގެ އިތުރުން ޓްރާންސްމިޝަނަށް ބޭނުންކުރާ އެހެނިހެން ވަސީލަތްތައް ހިމެނެއެވެ.

ފުލުހުންގެ ތަޙުޤީޤުން އެނގިފައިވާ ގޮތުގައި، މި އޮޕަރޭޝަން ހިންގާފައިވަނީ އަމިއްލަ ޓެލެކޮމް ކުންފުންޏެއްގެ ޑޭޓާ ބޭނުންކޮށްގެން ސެޓެލައިޓް މެދުވެރިކޮށް ޓީވީ ޗެނަލްތައް ޑައުންލޯޑް ކުރުމަށްފަހުގައެވެ. އަދި އެ ޗެނަލްތައް ލަންކާއާއި ލަންކާއިން ބޭރުގެ ކަސްޓަމަރުންނަށް ޣައިރުޤާނޫނީ ގޮތުގައި ފޯރުކޮށްދެމުން ގޮސްފައިވާ ކަމަށް ފުލުހުން ތުހުމަތު ކުރެއެވެ.

މި މައްސަލައިގެ އިތުރު ތަޙުޤީޤުތައް ލަންކާ ފުލުހުން މިހާރު ދަނީ ކުރިއަށް ގެންދަމުންނެވެ.