މެލޭޝިއާ އަދި ދެކުނުއިރު އޭޝިޔާގައި ފަތުރުވެރިކަން ޕްރޮމޯޓްކުރުމަށް މާޓާ ފެއާގައި ރާއްޖެއިން ބައިވެރިވެއްޖެ

މޯސްލިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ކުއަލަ ލަމްޕޫރްގައި ބާއްވާ މެލޭޝިއަން އެސޯސިއޭޝަން އޮފް ޓުއާ އެންޑް ޓްރެވަލް އޭޖެންޓްސް (މާޓާ) 2024ގައި ބައިވެރިވެ ރާއްޖެ ޕްރޮމޯޓް ކުރުމުގެ މަސައްކަތް ފަށައިފިއެވެ.

މެލޭޝިޔާ އަދި ދެކުނުއިރު އޭޝިޔާގެ ގައުމު ތަކުން ބައިވެރިވެގެން މި މަހުގެ 22 އިން 24 އަށް ކުރިއަށް ގެންދާ މި ފެއާގައި އެމްއެމްޕީއާރުސީއާއެކު ފަތުރުވެރިކަމުގެ ސިނާއަތުގެ 13 ކުންފުންޔެއް ބައިވެރިވެ މިސަރަހައްދުގައި ދިވެހިރާއްޖެއަކީ އެންމެ ހިއްގައިމު މަންޒިލްގެ ގޮތުގައި ޕްރޮމޯޓްކުރަމުންދާ ކަމަށް އެމްއެމްޕީއާރްސީން ބުނެއެވެ.

މާޓާ 2024އިން ފަތުރުވެރިންނަށް ތަފާތު ދަތުރުފަތުރުގެ ތަޖުރިބާތަކާ ބެހޭ މައުލޫމާތު ކިޔައިދިނުމަށް ގިނަ ފުރުސަތުތަކެއް ލިބިގެންދެއެވެ.

އެމްއެމްޕީއާރްސީން ބުނި ގޮތުގައި، މި ފެއާގައި ބައިވެރިވުމުގެ މަގްސަދަކީ އެމްއެމްޕީއާރުސީގެ ސްޓްރެޓެޖީތަކާ އެއްގޮތަށް ރާއްޖޭގެ ބްރޭންޑް އަދި ޑެސްޓިނޭޝަން ޕްރެސެންސް އިތުރަށް ވަރުގަދަކުރުމާއި، މާކެޓުގެ މުހިންމު ފަރާތްތަކާ ގުޅިގެން ރާއްޖޭގެ ފަތުރުވެރިކަމުގެ ދާއިރާ އިތުރަށް ހަރުދަނާ ކުރުމެވެ. މީގެ އިތުރުން، މާޓާގައި ބައިވެރިވުމަކީ މި މާކެޓުގެ ފަތުރުވެރިންނަށް އަމާޒުކޮށްގެން، ހަލާލު ފަތުރުވެރިކަން ޕްރޮމޯޓްކުރުމަށް އަގުހުރި ފުރުސަތުތަކެއް ލިބިގެންދާ ކަމެއް ކަންވެސް ފާހަގަކޮށްފައިވެއެވެ.

އެމްއެމްޕީއާރުސީގެ އަމާޒަކީ ތިން ދުވަހުގެ މުއްދަތަށް ކުރިއަށްދާ މި ފެއާގައި ދިވެހިރާއްޖޭގެ މުއްސަނދި ސަގާފަތާއި ތަރިކައަށް އަލިއަޅުވާލައި، ދެކުނުއިރު އޭޝިއާގައި ދިވެހިރާއްޖެއަކީ އެންމެ އެދެވޭ ޗުއްޓީ މަންޒިލެއްގެ ގޮތުގައި ޕްރޮމޯޓް ކުރުން ކަމަށް ބުނެފައިވެއެވެ.

އެގޮތުން ރާއްޖޭގެ އުފެއްދުންތަކުގެ ޑިސްޕްލޭތަކުން ރާއްޖޭގެ ކުޅަދާނަ ފަންނުވެރިކަން ދައްކައިދީ، ސްޓޭންޑްގައި ބާއްވާ ޕްރެޒެންޓޭޝަންގައި ރާއްޖޭގެ ތާރީޚާއި ސަގާފަތް ކިޔައިދީ މި ޕްރެޒެންޓޭޝަންގައި ބައިވެރިވާ ފަރާތްތަކަށް އަދާރަން ކްލަބް ރަންނަޅި އަދި އަދާރަން ސެލެކްޓް ހުދުރަންފުށިއިން ސްޕޮންސަރ ކުރާ ރާއްޖޭގައި ހިލޭ ޗުއްޓީ ހޭދަކުރުމުގެ ފުރުސަތު ލިބިގެންދާނެ ކަމަށް އެމްއެމްޕީއާރްސީން ބުނެފައިވެއެވެ.

އެމްއެމްޕީއާރްސީން އިތުރަށް ބުނީ، މި ފެއާގެ ތެރޭގައި އެމްއެމްޕީއާރުސީއިން ދިވެހިރާއްޖޭގެ ސްޓޭންޑަށް ޒިޔާރަތްކުރާ ފަރާތްތަކަށް ދިވެހިރާއްޖޭއާ ބެހޭ އެންމެ ފަހުގެ މައުލޫމާތު ފޯރުކޮށްދީ، އަޅުގަނޑުމެންގެ އާ އުފެއްދުންތަކާއި، ސެގްމަންޓްތަކާއި، އޮފާތަކަށް އަލިއަޅުވާލާނެކަމަށެވެ.

އަދި މި ފެއާގައި އިންޑަސްޓްރީގެ ބައިވެރިންނަށް އެފަރާތްތަކުގެ ތަފާތު އުފެއްދުންތަކާއި ހިދުމަތްތައް ޕްރޮމޯޓް ކުރުމުގެ އެތައް ފުރުސަތުތަކެއް ލިބިގެންދާނެ ކަމަށާ، މަޓާ 2024ގައި އެމްއެމްޕީއާރްސީ ބައިވެރިވުމަކީ، އިންޑަސްޓްރީގެ ޕްރޮފެޝަނަލުންނާ ގުޅިގެން، އާ ޕާޓްނަޝިޕްތައް އުފެއްދުމަށް، އަދި ކުރިއަރަމުން އަންނަ ފަތުރުވެރިކަމުގެ މައިދާނުގައި އަގުހުރި ވިސްނުންތަކެއް ހޯދުމަށް ޕްލެޓްފޯމެއް ލިބިގެންދާ ކަމެއް ކަމަސްވެސް އެމްއެމްޕީއާރްސީން ބުނެފައިވެއެވެ.

މެލޭޝިޔާ މާކެޓަކީ ރާއްޖެއަށް ގިނަ ފުރުސަތުތަކެއް އޮތް މާކެޓެކެވެ. 2023 ވަނަ އަހަރު 26 ވަނަ ޓޮޕް ސޯސް މާކެޓްގެ ގޮތުގައި ރޭންކް ކުރެވުނު މި މާކެޓުން 13,551 ފަތުރުވެރިން ފެނިގެންދިޔައެވެ. މާރޗް 2024 އާ ހަމައަށް ރާއްޖެއަށް ވަނީ ދެކުނުއިރު އޭޝިއާއިން 3,063 ފަތުރުވެރިން ޒިޔާރަތްކޮށްފައެވެ. އެމްއެމްޕީއާރުސީއިން މެލޭޝިޔާ އަދި ދެކުނުއިރު އޭޝިޔާއިން ދިވެހިރާއްޖޭއަށް އަންނަ ފަތުރުވެރިންގެ އަދަދު އިތުރު ކުރުމަށް މި މާކެޓަށް އަމާޒުކޮށްގެން ތަފާތު ގިނަ މާކެޓިންގ ހަރަކާތްތައް ހިންގުމަށް ރާވާފައިވާ ކަމަށް ބުނެފައިވެއެވެ.

އެގޮތުން ޓްރެވަލް ޓްރޭޑާއެކު ޑިޖިޓަލް އަދި ސޯޝަލް މީޑިއާ ކެމްޕޭންތައް ބޭއްވުމާއި، ބޮޑެތި ފެއަރތަކުގައި ބައިވެރިވުމާއި، ރާއްޖޭގެ ތަމްރީނު ޕްރޮގްރާމްތައް ހިންގުމާއި، އައުޓްޑޯ ކެމްޕޭންތައް ބޭއްވުމާއި، މިފަދަ ގިނަ ހަރަކާތްތައްވެސް މިއަހަރު ތެރޭގައި ކުރިއަށް ދާނެ ކަމަށާ މި މާކެޓިންގ ހަރަކާތްތަކަކީ މެލޭޝިއާ އަދި ދެކުނުއިރު އޭޝިޔާގެ މާކެޓުގައި މި ސަރަހައްދުން އަންނަ ފަތުރުވެރިން އިތުރުކޮށް، ބޮޑު ކުރިއެރުމެއް ހޯދުމަށް ލިބޭ ވަރަށް ރަނގަޅު ފުރުސަތެއް ކަމަށް އެމްއެމްޕީއާރްސީން ބުނެފައިވެއެވެ.