ދެން ކައުންސިލުތަކަށް ބަޖެޓު ނެތިކަން ކަންކަން ނުކުރެވޭ ވާހަކަ ނުދެއްކޭނެ: ޔާސިރު

އަންނަ އަހަރަށް ލަފާކުރާ ދައުލަތުގެ ބަޖެޓުގައި ކައުންސިލުތަކަށް ކަނޑައެޅި ބަޖެޓުން، ހދ. ކުޅުދުއްފުށި ކައުންސިލަށް 49.2 މިލިއަން ރުފިޔާ ލިބޭނެ ކަމަށް ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުއްލަތީފު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި، އަންނަ އަހަރަށް ލަފާކުރާ ދައުލަތުގެ ބަޖެޓު ބަހުސަށް ވާހަކަ ދައްކަވަމުން ޔާސިރު ވިދާޅުވީ، އަންނަ އަހަރުގެ ބަޖެޓަކީ ކައުންސިލުތަކުން ބޭނުންވާ ކަންކަން ކުރެވޭނެ ބަޖެޓެއް ކަމަށެވެ.

އެގޮތުން 37.5 ބިލިއަން ރުފިޔާގެ ދައުލަތުގެ ބަޖެޓުގައި ކައުންސިލުތަކަށް 1.6 ބިލިއަން ރުފިޔާ ކައުންސިލުތަކަށް ދޭން ނިންމާފައިވާއިރު، ދެން ކައުންސިލުތަކަށް ބަޖެޓު ނެތިކަން ކަންކަން ނުކުރެވޭ ވާހަކަ ނުދެއްކޭނެ ކަމަށެވެ.

''މިބަޖެޓުން ކުޅުދުއްފުށި ކައުންސިލަށް ގްރައުންޑްގެ ގޮތުގައި 49.2 މިލިއަން ރުފިޔާ ލިބޭނެ. މިއީ އެބޭފުޅުން އެމްޑީޕީ މެންބަރުން ފޮނުވި ސަބަބަކީ. މީގެކުރިން ކައުންސިލުންވެސް ކިޔަމުން ދިޔައީ ފައިސާ ނެތިގެން ކަންތައްތައް ނުވާ ވާހަކަ. ދެނެއް ކުރިޔަށް އޮތް އަހަރުގައި ކުޅުދުއްފުށީ ކައުންސިލަކަށް ނުޖެހޭނެ އެރަސުގެ ހިނަވާގެ ނޭޅިގެން އުޅޭކަށެއް. މަސްމާރުކޭޓު ތަރައްގީކުރަން ފައިސާ ނެތިގެން އުޅޭކަށެއް. މިއީ އެމްޑީޕީއަށް ވޯޓްދިން ސަބަބަކީ.'' ޔާސިރު ވިދާޅުވިއެވެ.

ޔާސިރު ވިދާޅުވީ، ލާމަރުކަޒީ ނިޒާމު ފުނިޑިގެން ދަނިކޮށް، އެނިޒާމު ފައްކާކޮށް، ކައުންސިލަރުންގެ ދައުރު އިތުރު ކުރުމާއެކު ކައުންސިލުތަކުގެ އެންމެ ބޮޑު ކަންބޮޑުވުން ކަމަށްވައި، ޒިންމާދާރުވެރިޔާ އައްޔަން ކުރުމުގައި ކައުންސިލުގެ ބަސް ބުނެވޭ ގޮތަށް މިހާރު އޮތުމަކީ ރައްޔިތުން އެދޭ ކަމެއް ކަމަށެވެ.