އަލްހާންގެ ޑޯޓުޑޯވެސް ވަރަށް ތަފާތު!

ދިވެހިރާއްޖެއަށް މަލްޓި ޕާޓީ ޑިމޮކްރަސީ ތައާރަފްވެގެން ބޭއްވިގެންދިޔަ ހުރިހާ އިންތިޚާބެއްގައިވެސް ކެނޑިޑޭޓުން ދޮރުން ދޮރަށް ހިނގުމަކީ ވަރަށް މުހިންމު ކަމެކެވެ. މި ހަރަކާތުގެ މައިގަނޑު އަމާޒަކީ ވޯޓުލާ ފަރާތްތަކާއި ކެނޑިޑޭޓުން ސީދާ ބައްދަލުކޮށް، ވައުދުތަކާއި ސިޔާސަތުތައް އޮޅުން ފިލުވައިދީ އެ ފަރާތްތަކާއި ސީދާކޮށް ބައްދަލުކުރުމެވެ.

އަންނަ މަހުގެ ހަވަނަދުވަހު ބޭއްވުމަށް ތާވަލްކުރެވިފައިވާ ރައްޔިތުންގެ މަޖިލީހުގެ އިންތިޚާބަށްވެސް ޑޯޓުޑޯ ހަރަކާތްތައް ވަނީ ހުރިހާ ފަރާތްތަކުން މެކުހަށް ޖަހާފައެވެ. ނަމަވެސް ފަަހަަކަށް އައިސް އާންމުންގެ ގިނަ ފަރާތްތަކުން އުފުލަމުންދާ ޝަކުވާ އަކީ ކެމްޕެއިންގެ ނަމުގައި ބައެއް ފަރާތްތަކުން ގެތަކަށް އައިސް، އާންމު ދިރިއުޅުމަށް އުނދަގޫ ކުރަމުންދާކަމަށެވެ.

އެހެނަސް، ހެންވޭރު އުތުރު ދާއިރާއަށް ޖުމްހޫރީ ޕާޓީގެ ޓިކެޓުގައި ވާދަކުރައްވާ އަލްހާން ފަހުމީ ވަނީ މިކަންވެސް ތަފާތުކުރައްވާފައެވެ. އަލްހާނާއި އެބޭފުޅާގެ ޓީމުން ގެންދަވަނީ ޕާސަނަލައިޒްޑް ޑޯޓުޑޯ ހަރަކާތްތަކެއް ހިންގަވަމުންނެވެ.

ވޮއިސްއަށް ދެއްވި ޚާއްސަ ބަސްދީގަތުމެއްގައި އަލްހާން ފަހުމީ ވިދާޅުވީ އެބޭފުޅާ ޑޯޓުޑޯ ކެމްޕެއިން ޖައްސަވަމުން ގެންދަވަނީ ރައްޔިތުންގެ އަރިހުން އެޕޮއިންޓްމެންޓް ހެއްދެވުމަށް ފަހުގައިކަމަށެވެ. އެގޮތުން ދާއިރާގެ ރައްޔިތުން ގުޅުއްވުމުން، އެ ފަރާތްތަކަށް ފަސޭހަ ވަގުތެއްގައި އެފަރާތްތަކުގެ ގެތަކަށް ވަޑައިގަންނަވާކަމަށެވެ. އެގޮތަށް އަމަލު ކުރުމުން ޑޯޓުޑޯތަކުގެ އަސަރުތައް މާ ވަރުގަދަކަމަށް އަލްހާން ވިދާޅުވިއެވެ.

އަލްހާން މި ބަސްދީގަތުމުގައި ވަނީ ދާއިރާގެ އެހެން ކެނޑިޑޭޓުން ޑޯޓުޑޯ ކެމްޕެއިން ހިންގަވަމުން ގެންދަވާ ގޮތާއި މެދު ކަންބޮޑުވުން ފާޅުކުރައްވާފައެވެ. އެގޮތުން އެފަރާތްތައް ޑޯޓުޑޯ ހިންގަވަމުން ގެންދަވަނީ ޝޯ އޮފްއެއް ގޮތަށްކަމަށް އަލްހާން ވިދާޅުވިއެވެ.

"ގޭގެ އަހުލުވެރިންގެ ހާލު ރަނގަޅަށް ނުބަލައި، ފޮޓޯގަނޑެއް ނަގާލާފަ އެބޭފުޅުން ނިންމާލަނީ"، އަލްހާން ވިދާޅުވިއެވެ.

އަލްހާންގެ މި ތަފާތު ޑޯޓުޑޯ ސްޓައިލާއި މެދު ހެންވޭރު އުތުރުގެ ރައްޔިތުންގެ ފަރާތުން ރަނގަޅު ތަރުހީބެއް ލިބެމުންދާކަމަށް އަލްހާންގެ ކެމްޕެއިން ޓީމުން ވަނީ ހާމަކޮށްފައެވެ. ޑިމޮކްރަސީ ކުރިއަރަމުންދާ ދުވަސްވަރު، މިފަދަ ކެމްޕެއިންތަކަކީ ކިތަންމެހާވެސް މުހިންމު ކެމްޕެއިންތަކެކެވެ.