ވައްކަމުގެ ތުހުމަތުގައި ހައްޔަރު ކުރުމުން، ބުނީ ވަނީ ޖެހިގެން ހުރި ގޭގެ ޓިނު ރަނގަޅުކުރަން ކަމަށް!

މާލޭގެ ގެއަކުން ވައްކަން ކުރަން އުޅުނު ކަމުގެ ތުހުމަތު ގައި މީހަކު ހައްޔަރުކޮށްފިއެވެ.

މި މައްސަލައިގައި ހައްޔަރުކޮށްފައިވަނީ ހއ. ހޯރަފުށި، ބަގީޗާގެ، އަލީ ވިސާމް 39އ، އެވެ. ކްރިމިނަލް ކޯޓުން ވަނީ އޭނާ 15 ދުވަހަށް ބަންދު ކުރުމަށް އަމުރު ކޮށްފައެވެ.

އޭނާގެ ބަންދު އަމުރުގައިވާގޮތުން އޭނާ ވައްކަން ކުރަން ވަދެ އުޅޭކަން ޓޯކީން ގޮވައި މައުލޫމާތު ދިނުމުން، ފުލުހުން ސީނަށް ގޮސް މައުލޫމާތު ސާފު ކުރިއިރު،  އެތަނުގައި ތިބި މީހުން ގާތުގައި އޭނާ ބުނީ އޭނާ އެތަނަށް އެރީ އެގެއާއި ޖެހިގެން ހުރިގޭގެ ފުރާޅުގެ ޓިނު ރަނގަޅު ކުރުމަށް ކަމަށް އެމީހުން މައުލޫމާތު ދިން ކަމަށެވެ.

އެކަމަކު މިކަމާ ގުޅިގެން ފުލުހުން އޭނާ އާ ސުވާލު ކުރުމުން އޭނާ ބުނީ އެތަނަށް އެރީ އެގޭ ފުރާޅަށް އޭނާގެ ފޯނު ވެއްޓިގެން ކަމަށްވެސް ބުނެފައުވެއެވެ.

މީގެ އިތުރުން، ބަންދު އަމުރުގައިވާގޮތުން، އޭނާ އަކީ މި ބާވަތުގެ ކުށުގެ ރެކޯޑު އޮންނަ މީހެކެވެ. އެގޮތުން އޭނާ ވަނީ މީގެ ކުރިން 24 ފަަހަރު ހައްޔަރުކޮށް 15 ފަހަރު ބަންދުކޮށްފައެވެ.