މެންބަރުންގެ މަސައްކަތް ދައްކުވައިދެނީ ސްޕޮންސާކުރައްވާ ބިލުގެ އަދަދަކުން ނޫން: މަޖިލިސް

ރައްޔިތުންގެ މަޖިލީހުގެ މެންބަރުންގެ މަސައްކަތްތަކާ ގުޅޭގޮތުން، ސައްހަނޫން މައުލޫމާތު މީސް މީޑިއާގައި ނުފެތުރުމަށް މަޖިލީހުން އެދިއްޖެއެވެ.

މަޖިލީހުގެ ބައެއް މެންބަރުން މަޖިލީހަށް ސްޕޮންސާ ކުރެއްވި ބިލްތަކާއި، ގަރާރާއި ކުއްލި މައްސަލައިގެ އަދަދު އެނގޭ ގޮތަށް މެންބަރުންގެ ފޮޓޯ އާއްމުކޮށް، އެއީ އެ މެންބަރުން މަޖިލީހުގައި ކިރައްވާ ހަމައެކަނި މަސައްކަތް ކަމަށް ދޭހަވާ ގޮތަށް މީސް މީޑިއާގައި އަންނަނީ ބައެއް ފަރާތްތަކުން ޕޯސްޓްތައް ދައުރު ކުރަމުންނެވެ.

އެކަމާ ގުޅިގެން މަޖިލީހުން މިއަދު ނެރުނު ނޫސް ބަޔާނެއްގައި ބުނީ، ރައްޔިތުންގެ މަޖިލީހާ މަތިކޮށްފައިވާ ޒިންމާތަކާއި މަސްއޫލިއްޔަތުތައް އަދާކޮށް ވީހާވެސް ހާމަކަންބޮޑު ގޮތެއްގައި ރައްޔިތުންނަށް މައުލޫމާތު ފޯރުކޮށްދިނުމަށްޓަކައި މަޖިލީހުގެ ޖަލްސާތަކާއި އެ މަޖިލީހުގެ ކޮމިޓީތަކުގެ ބައްދަލުވުންތައް ކުރިއަށް ގެންދަނީ ޢާންމުންނަށް ހުޅުވާލައިގެން ކަމަށެވެ.

”އަދި، ރައްޔިތުންގެ މަޖިލީހުގެ ގަވާއިދުގެ ދަށުން، މަޖިލީހުގެ ޖަލްސާތަކާއި ކޮމިޓީތަކުގެ ބައްދަލުވުންތައް ވަގުތުން ދުރަށް ދެއްކުމާއި، ބްރޯޑްކާސްޓްކުރުމަށް އޮތް އުސޫލުގެ މަޤްޞަދަކީ، ހޭލުންތެރިކަން އިތުރުކުރުމާއި، މަޢުލޫމާތު މުއްސަނދިކުރުމާއި ވަކި ފަރާތަކަށް ނުޖެހި ތެދު ޚަބަރު ފޯރުކޮށްދިނުމާއި، މަޖިލީހުގެ އުސޫލުތަކާއި އާދަތަކާއި، ކަންހިނގާ ގޮތަށް އަހުލުވެރިކުރުމާއި، ޢާންމު މައްސަލަތަކާއި ޤައުމުގެ އެކިއެކި ކަންކަމާ ބެހޭގޮތުން ދެކެވޭ ވާހަކަތަކާއި އަޅާ ފިޔަވަޅުތަކުގެ މަޢުލޫމާތު ފޯރުކޮށްދިނުމާއި، އަދި މަޖިލީހުގެ މަސައްކަތްތަކާ ގުޅޭގޮތުންނާއި، ސަރުކާރާއި ޤައުމު ހިންގުމުގައި ދިމާވާ ކަންކަމާ ގުޅޭގޮތުން ޢާންމުން ހޭލުންތެރިކުރުވުމެވެ.“ މަޖިލީހުގެ ބަޔާނުގައިވެއެވެ.

މީގެ އިތުރުން، މަޖިލީހުގެ ޖަލްސާތަކާއި ކޮމިޓީގެ މަސައްކަތްތައް މަޖިލީހުގެ ވެބްސައިޓްގައި ޝާއިޢުކުރަމުން ގެންދަނީ މަޖިލީހުގެ މަސައްކަތްތައް ވީހާވެސް ހާމަކަން ބޮޑު ގޮތެއްގައި ރައްޔިތުންނަށް ފޯރުކޮށްދިނުމަށް ކަމަށާ، ރައްޔިތުންގެ މަޖިލީހުގެ މެންބަރުން މިހާތަނަށް ހުށަހަޅުއްވާފައިވާ ބިލުތަކާއި ޤަރާރުތަކާއި މައްސަލަތަކާއި ވަޒީރުންނާ ކުރައްވާފައިވާ ސުވާލުތަކާއި، ޝާމިލުވެލައްވާ ކޮމިޓީތަކުގެ މަޢުލޫމާތާއި ތަފާސްހިސާބު ފެންނަން ހުންނާނެ ކަމަށް ބުނެފައިވެއެވެ.

އެހެންނަމަވެސް، އެއީ އެ މެންބަރުން މަޖިލީހުގައި ކުރައްވާ ހަމައެކަނި މަސައްކަތް ނޫންކަމުގައި ދަންނަވަމެވެ. އެގޮތުން ރައްޔިތުންގެ މަޖިލީހުގެ މުހިންމު ގިނަ މަސައްކަތްތަކެއް މަޖިލީހުގެ ކޮމިޓީތަކުގައި ކުރިއަށްގެންދެއެވެ. އަދި، ރައްޔިތުންގެ މަޖިލީހުގެ ޖަލްސާތަކާއި ކޮމިޓީތަކުގައި ކުރައްވާ މަސައްކަތްތައް ނިމިގެންދާނީ މަޖިލީހުގެ ހުރިހާ މެންބަރުންގެ ބައިވެރިވުމާ އެކުގައެވެ. ރައްޔިތުންގެ މަޖިލީހުގެ މެންބަރުން މަޖިލީހުގައި ކުރައްވާ މަސައްކަތް ދައްކުވައިދެނީ ހަމައެކަނި މެންބަރުން މަޖިލީހަށް ސްޕޮންސަރކުރައްވާ ބިލުގެ ޢަދަދުން ނޫންކަމާއި، އެކި މަރުޙަލާތަކުގައި މަޖިލީހުގެ މެންބަރުންގެ ބައިވެރިވުމާއި މަޝްވަރާ އޮންނަކަން ފާހަގަކުރަމެވެ.

މަޖިލިސް

އެހެންކަމުން، ރައްޔިތުންގެ މަޖިލީހުގެ މަސައްކަތްތަކާ ގުޅޭގޮތުން މަޖިލީހުގެ އިދާރާއިން ޢާންމުކުރަމުން ގެންދާ މަޢުލޫމާތުތައް ނަހަމަގޮތުގައި ބޭނުންކޮށް ޢާންމުންނަށް އޮޅުންއަރާގޮތަށް އެ މަޢުލޫމާތުތައް ބޭނުން ނުކުރުމަށާއި، މަޖިލީހުގެ މަޢުލޫމާތު ހިއްސާކުރާއިރު ޒިންމާދާރުކަމާއެކީ މަޢުލޫމާތު ހިއްސާކުރުމަށާ، އަދި މަޢުލޫމާތު ޢާންމުކުރުމުގެ ކުރިން އެ މަޢުލޫމާތަކީ ތެދު މަޢުލޫމާތެއްކަން ކަށަވަރުކުރުމަށް މަޖިލީހުން ވަނީ އެދިފައެވެ.