ރައީސުލްޖުމްހޫރިއްޔާ އަންނަނީ އެމަނިކުފާނުގެ ބާރުތައް ދޫކުރައްވައި ރައްޔިތުންނާއި ހަވާލުކުރައްވަމުން: އިބްރާހީމް

ރައީސުލްޖުމްހޫރިއްޔާ ޑރ މުޙައްމަދު މުޢިއްޒު، އެމަނިކުފާނަށް ލިބިދީފައިވާ  ބާރުތައް ދޫކުރައްވައި، ރައްޔިތުންނާއި އެ ބާރުތައް ހަވާލުކުރައްވަމުންދާ ކަމަށް މައްޗަންގޮޅީ އުތުރު ދާއިރާގެ މެންބަރު އިބްރާޙީމް މުޙައްމަދު (އިއްބެ ޖަނާބު) ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި، އެންޓިކޮރަޕްޝަން ކޮމިޝަނުގެ ގާނޫނަށް އިސްލާހު ގެނައުމުގެ ބިލަށް ބަހުސް ކުރައްވަމުން އިއްބެ ވިދާޅުވީ، އަދުގެ މަޖިލީހުން ކުރަމުންދާ މަސައްކަތަކީ، ކުރީގެ އެމްޑީޕީ މެޖޯރިޓީ އޮތް މަޖިލީހުން ރައީސުލްޖުމްހޫރިއްޔާއަށް ދިން ބާރުތައް ހަނިކޮށް، މަޖިލީހުގެ އިޚްތިޔާރުގެ ތެރެއަށް ގެނައުމުގެ މަސައްކަތް ކަމަށެވެ.

މީގެ މިސާލަކީ، އަޅުގަނޑުމެންނަށް ފެނިގެންދިޔަ ބާ ކައުންސިލްގެ ބާރުތައްވެސް ރައީސުލްޖުމްހޫރިއްޔާގެ އަތްޕުޅުން ދޫކޮށްލެއްވި މަންޒަރު. އެހެންވީމާ ހަގީގަތަކީ ރައީސުލްޖުމްހޫރިއްޔާ އެމަނިކުފާނުގެ ބާރުތައް ދޫކުރައްވައި، ރައްޔަިތުންނާއި ހަވާލުކޮށް، މިކަންކަން ބެލެންސްވެ އިންސާފުގެ ނިޒާމަކުން ދާނެ ގޮތުގެ މައްޗަށް ކަންކަން ބައްޓަންކޮށް ތަރުތީބު ކުރަމުންދާ މަންޒަރު މިފެންނަނީ

މައްޗަންގޮޅީ އުތުރު ދާއިރާގެ މެންބަރު އިބްރާޙީމް މުޙައްމަދު (އިއްބެ ޖަނާބު)

މީގެ އިތުރުން އިއްބެ ވަނީ، އިއްޔެގެ މަޖިލީހުގެ ޖަލްސާގައި ހޯމް މިނިސްޓަރ އަލީ އިހްސާން، ދެއްކެވި ބައެއް ވާހަކަފުޅުތަކަށްވެސް އަލިއަޅުވާ ލައްވާފައެވެ.

އެގޮތުން، މިދިޔަ ސަރުކާރުގައި 60 ރަށެއްގައި ޕޮލިސް ސްޓޭޝަން އަޅަން ހަވާލު ކުރި އިންޑިއާގެ އިންދިރާ ޕްރްޖެކްޓްސް ކުންފުނިން، އެ ސަރުކާރުގެ އިކޮނޮމިކް މިނިސްޓަރު ފައްޔާޒު އިސްމާއިލްގެ އާއިލީ މަސްލަހަތު އޮންނަ ބިގް ކުންފުނީގެ ހިއްސާ ގަތުމަށް ފަހު މާލޭގޭ ގަލޮޅުގައި ހުންނަ މޫނިމާގެ އިމާރާތް ކުރަމުންދާކަމަށް އިހްސާން ވިދާޅުވެފައިވާކަން ފާހަގަކުރެއްވިއެވެ.

އަދި އެފަދަ މައްސަލަ ތަކަކީ އޭސީސީން ބަލަންޖެހޭ މައްސަލަތައް ކަމަށް ވިދާޅުވެ އޭނާ ވަނީ އެ މައްސަލަތައް ބެލުމަށް އޭސީސީއަށް ގޮވާލައްވާފައެވެ:

މިއާއެކު މެންބަރު އިއްބެ ވަނީ، އޭސީސީގެ ގާނޫނަށް ގެންނަ އިސްލާހަކީ މުހިންމު އިސްލާހެއްކަން ފާހަގަކުރައްވައި އެ ބިލުގެ މަސައްކަތް ވޭހާވެސް އަވަށް ނިންމުމަށް އެދިލައްވާފައެވެ.