ނަޝީދުގެ ވެރިކަމުގައި ދަތުރުފަތުރުގެ ޚިދުމަތް ދިން ދީބާޖާއަށް 348 މިލިއަން!
ކުރީގެ ރައީސް މުހައްމަދު ނަޝީދުގެ ވެރިކަމުގައި އުތުރު ޕްރޮވިންސްގެ ދަތުރު ފަތުރުގެ ޚިދުމަތް ދިނުމުގެ އެއްބަސްވުން ހެދި ދީބާޖާ އިންވަސްޓަމަންޓަށް 348 މިލިއަން ރުފިޔާ ދައްކަން ޖެހޭނެ ކަމަށް ދަށު ކޯޓުން ކުރި ހުކުމް ސުޕްރީމް ކޯޓުން ދަމަހައްޓައިފި އެވެ.
ދީބާޖާއަށް 348 މިލިއަން ދިނުމަށް ދަށު ކޯޓުން ހުކުމްކުރީ ކުރީގެ ރައީސް މުހައްމަދު ވަހީދުގެ ސަރުކާރުން އެ ކުންފުންޏާއި އެކު އެކުލަވާލާފައިވާ އެއްބަސްވުން ބާތިލްކުރި މައްސަލައިގައެވެ.
އެއްބަސްވުން ބާތިލް ކުރުމުން ދީބާޖާއިން ދައުލަތާއި ދެކޮޅަށް ދައުވާ ކުރީ 2.4 ބިލިއަން ރުފިޔާ ހޯދުމަށެވެ. އެހެން ނަމަވެސް ސިވިލް ކޯޓުން 2014 ވަނަ އަހަރު ހުކުމްކުރީ ދައުލަތުން ދީބާޖާ އަށް 348 މިލިއަން ރުފިޔާ ދައްކަން ޖެހޭނެ ކަމަށެވެ.
މިފަހަކަށް އައިސް އެމްޑީޕީ ސަރުކާރުގައި 2008 ވަނަ އަހަރުން ފެށިގެން 2012 ވަނަ އަހަރާއި ދެމެދު ކުރި މުއާމަލާތްތަކާއި ގުޅުން ހުރި މައްސަލަތަކުގައި އުފެދިފައިވާ ދެބަސްވުންތައް ސަރުކާރުން ދަނީ ހައްލު ކުރަމުންނެވެ.
އެގޮތުން ރައީސް އިބްރާހިމް މުހައްމަދު ސޯލިހުގެ ސަރުކާރުގެ ކޮމިއުނިކޭޝަން ސެކްރެޓަރީ ހަސަން އިސްމާއިލްގެ 90 ޕަސެންޓު ހިއްސާ އޮންނަ ކުބިޒްނަސް އިމޭޖު ގްރޫޕް (ބިގް) އަށް 30 މިލިއަން ރުފިޔާ ވަނީ ދީފައެވެ.
ބިގަށް ދެއްކި 30 މިލިއަން ރުފިޔާ އަކީ ކުރީގެ ރައީސް މުހައްމަދު ނަޝީދުގެ ސަރުކާރުން އުފެއްދެވި މޯލްޑިވްސް ނެޝަނަލް ބްރޯޑްކާސްޓިން ކޯޕަރޭޝަން (އެމްއެންބީސީ) އިން ޓީވީއެމް ހިންގިއިރު އެތަނުގެ ޕްރޮގްރާމްތައް މާކެޓްކޮށްގެން ބިގް އަށް ލިބެން ޖެހޭ 78 މިލިއަން ރުފިޔާ އެބަ އޮތް ކަމަށް ކަނޑައަޅައި އެ ފައިސާ ދެއްކުމަށް ސިވިލް ކޯޓުން ހުކުމުގައި ހިމެނޭ ފައިސާގެ ބައެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
