އެއާޕޯޓުން ބީއެމްއެލްގެ ފައިސާ ސޫޓުކޭހެއް ފޭރިގަނެފި

މޫނު ނިވާކޮށްގެން ތިބި ބަޔަކު އެއާޕޯޓުން ބޭންކް އޮފް މޯލްޑިވްސް ފައިސާ ސޫޓުކޭހެއް ފޭރިގަނެފިއެވެ.

ފޭރިގަނެފައިވަނީ ވެލާނާ އިންޓަރނޭޝަނަލް އެއާޕޯޓްގެ އައު ޓާމިނަލަށް ވަންނަން ދިޔަ ބޭންކް އޮފް މޯލްޑިވްސްގެ ދެ މުއައްޒަފެއްގެ އަތުންނެވެ.

ފުލުހުން ވަނީ މިފަދަ ހާދިސާއެއް ހިގާފައިވާކަން ކަށަވަރުކޮށްދީފައެވެ. ފުލުހުން ބީއެމްއެލް މުއައްޒަފުން އަތުން ފައިސާހުރި ސޫޓުކޭސް ފޭރިގަނެފައިވަނީ މޫނު ނިވާކޮށްގެންތިބި ބައެކެވެ. މި ހާދިސާ ފުލުހުންނަށް ރިޕޯޓްކޮށްފައިވަނީ ފަތިހު 04:45 ގައެވެ.

ފުލުހުން މިހާރު އަންނަނީ މި މައްސަލަ ތަހްގީގް ކުރަމުންނެވެ.

މި ހާދިސާގައި ފޭރިގަތް ސޫޓުކޭހުގައި ހުރީ ކިހާ ފައިސާއެއްކަމާއި، މިކަމާ ގުޅޭގޮތުން ބީއެމްއެލުން އަދި ވަކި އެއްޗެއް ނުބުނެއެވެ.

އާއްމުގޮތެއްގައި ބީއެމްއެލުން އެއާޕޯޓަށް ފައިސާ ގެންދަނީ އެއާޕޯޓް އެކްސްޗޭންޖް ކައުންޓަރުތަކުން ކުރާ މުއާމަލާތްތަކުގެ ބޭނުމަށާއި، އޭޓީއެމްތަކަށް ޖަމާކުރުމަށެވެ. މިގޮތުން ބީއެމްއެލުން ފައިސާ އުފުލާއިރު، ރައްކާތެރި ފިޔަވަޅެއްގެ ގޮތުން ފުލުހުން އަބަދުވެސް ހަރަކާތްތެރިވެއެވެ. ނަމަވެސް މި ހާދިސާހިނގިއިރު ފުލުހުން ތިބިކަމެއް ނުވަތަ ނޫންކަމެއް ކަށަވަރެއް ނުވެއެވެ.