އޭޑީއެޗްޑީ ކުދިންނަށް ދޭންޖެހޭ ބޭހެެއް މަނާ ލިސްޓުން އުނިކުރަން ކޮމެޓީން ފާސްކޮށްފި

މަސްތުވާތަކެތީގެ ގާނޫނު އޮތްގޮތުން އެޓެންޝަން ޑެފިސިޓް ހައިޕާއެކްޓިވިޓީ ޑިސްއޯޑާ (އޭޑީއެޗްޑީ) ހުންނަ ކުދީންނަށް ދޭންޖެހޭ މުހިއްމު ބޭހެއް އެތެރެ ނުކުރެވޭކަމަށް މޯލްޑިވްސް ފުޑް އެންޑް ޑްރަގް އޮތޯރިޓީން ފާހަގަކުރުމުން މަނާ ބޭސް ލިސްޓުން އެ ބޭސް އުނިކުރަން ރައްޔިތުންގެ މަޖިލީހުގެ ކަމާގުޅޭ ކޮމެޓީން މިއަދު ނިންމައިފި އެވެ.

ނުކުޅެދުންތެރިކަން ހުންނަ ކުދިންނަށް ޤާނޫނީ ގޮތުން ލިބިދޭންޖެހޭ އިނާޔަތްތައް ލިބުމުގައި އިހުމާލުވެފައިވާތީ އެކަމާ ގުޅިގެން ހުށަހަޅާފައިވާ ޕެޓިޝަންއާ ގުޅޭގޮތުން، ރައްޔިތުންގެ މަޖިލީހުގެ ޕެޓިޝަން ކޮމިޓީގައި އެމްއެފްޑީއޭގެ ސީނިއާ ފާމަސިސްޓް އައިޝަތު ޖަލީލާ ވަނީ އޭޑިއެޗްޑީ ހުންނަ ކުދިން ބޭނުންކުރާ ވަރަށް މުހިއްމު ބޭހެއް ރާއްޖެ އެތެރެނުކުރެވޭކަން ފާހަގަކުރައްވާ ފައެވެ. އެ ބޭހަކީ މިތައިލްފެނިޑޭޓް އެވެ. ޖަލީލާ ވިދާޅުވީ އެ ބޭސް އެތެރެނުކުރެވެނީ މަސްތުވާތަކެތީގެ ޤާނޫނުގެ ޖަދުވަލްގެ މާއްދާއެއްގައި ރާއްޖެ އެތެރެކުރުން މަނާ ބާވަތެއްގެ ގޮތުގައި އޮންނާތީއެވެ.

ނަމަވެސް އޭރު އޮތީ ގާނޫނަށް އިސްލާހު ހުށައަޅާފަ އެވެ. އަދި އެ އިސްލާހު ފާސްކުރުމާއި ގުޅޭގޮތުން ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީން ދިޔައީ މަސައްކަތް ކުރަމުންނެވެ. އެ ކޮމެޓީން މިއަދު ވަނީ މަނާ ބޭސް ލިސްޓުން މިތައިލްފެނިޑޭޓް އުނިކުރަން ފާސްކޮށްފަ އެވެ. އެ ގޮތަށް ފާސްކުރީ މެންބަރުންގެ އިއްތިފާގުންނެވެ.

ހާއްސަ އެހީއަށް ބޭނުންވާ މީހުންނަށް ދޭންޖެހޭ ބައެއްކަހަލަ ބޭސްތައް ރާއްޖެއިން ނުލިބޭ މައްސަލައަކީ އެފަދަ ފަރާތްތަކުގެ ބެލެނިވެރިން ފާހަގަކުރަމުން އަންނަ ޝަކުވާ ބޮޑު މައްސަލައެކެވެ. އެފަދަ ބޭސްތައް ނުލިބުމުގެ ހާއްސަ އެހީއަށް ބޭނުންވާ ބައެއް ފަރާތްތަކަށް ދޭންޖެހެނީ، އެއާ އެއްފަދަ އެހެން ބޭސްތައްކެވެ. އެކަމުގެ ސަބަބުން އެފަދަ ކުދިން ބެލެހެއްޓުމުގައި އާއިލާތަކަށް އިތުރު ތަކްލީފްތަކެއް ކުރިމަތިވެއެވެ. އޭގެ ތެރޭގައި އެފަދަ ފަރާތްތަކުގެ އުޅުމަށް އަންނަ ބަދަލުތައް ފާހަގަކޮށްލެވެއެވެ.

ހާއްސަ އެހީއަށް ބޭނުންވާ ކުދިންނަށް ބޭނުންވާ ބައެއްކަހަލަ ބޭސްތައް ރާއްޖެއިން ނުލިބޭތީވެ، އެފަދަ ބައެއް ބޭސްތައް ގެންނަނީ ރާއްޖެއިން ބޭރުންނެވެ. ހާއްސަ އެހީއަށް ބޭނުންވާ ފަރާތްތަކުގެ ބައެއް ކަހަލަ ބޭސްތައް ރާއްޖެއިން ލިބުން ދަތިވިނަމަވެސް، އެސްޓީއޯއިން އެފަރާތްތަކަށް ބޭނުންވާ ބޭސްތައް ގެނެސްދޭކަން ފާހަގަކޮށްލެވެއެވެ.