ބީއެމްއެލްގެ ޗެއާޕާސަންގެ މަގާމުން ޒަރީރު އިސްތިއުފާ ދެއްވައިފި

ބޭންކް އޮފް މޯލްޑިވްސް (ބީއެމްއެލް) ގެ ޑިރެކްޓަރުންގެ ބޯޑުގެ ޗެއާޕާސަން ކަމުގެ މަގާމުން ހަސަން ޒަރީރު އިސްތިއުފާ ދެއްވައިފިއެވެ.

އެމަގާމުން ޒަރީރު އިސްތިއުފާ ދެއްވާފައި މިވަނީ، މީރާގެ ކޮމިޝަނަރާ ޖެނެރަލް އޮފް ޓެކްސޭޝަންގެ މަގާމަށް އޭނާ އައްޔަން ކުރެއްވުމަށް މަޖިލިހުން ރުހުން ދީފައިވާތީ، އެ މަގާމާއި ހަވާލުވެވަޑައިގެންނެވުމަށެވެ.

ޒަރީރު ޗެއާޕާސަންގެ މަގާމަށް އައްޔަންކޮށްފައި ވަނީ މިދިޔަ މާޗް މަހުގެ 24 ގައެވެ.

ޒަރީރު އިސްތިއުފާ ދެއްވުމާއި ގުޅިގެން ބީއެމްއެލް އިން ވަނީ، ބީއެމްއެލްގައި ޒަރީރު ދެއްކެވި ހަރުދަނާ ލީޑަޝިޕަށާއި ދެއްވި އަގުހުރި ލަފަޔާއި އިރުޝާދަށް ޝުކުރު ދަންނަވައި، ކުރިމަގުގައި ކާމިޔާބަށް އެދޭ ކަމަށް ބުނެފައެވެ.

ބީއެމްއެލްގެ ހިންގާ ގަވައިދު ބުނާ ގޮތުން ބޭންކުގެ ބޯޑު އެކުލެވިގެން ވަނީ ސަރުކާރުން އައްޔަންކުރާ އަށް މެމްބަރުންނާއި އާންމު ހިއްސާދާރުންގެ ފަރާތުން ހޮވާ ތިން މެމްބަރުންނާ އެކު ޖުމްލަ 11 މެންބަރުންގެ މައްޗަށެވެ.

ބީއެމްއެލްއިން ބުނީ ޒަރީރު އިސްތިއުފާ ދެއްވުމާއެކު ބޭންކުގެ ބޯޑުގައި ތިއްބެވީ ޖުމްލަ ނުވަ ޑައިރެކްޓަރުން ކަމަށެވެ. އެއީ ސަރުކާރުން އައްޔަން ކުރައްވާ ދެ މެންބަރުންގެ މަގާމު ހުސްވުމާއި ގުޅިގެން ކަމަށް ވެސް އެ ބޭންކުން ބުނެފައިވެއެވެ.

އަދި ބޭންކުގެ އަމާޒަކީ ހުސްވެފައިވާ މަގާމުތަކަށް މެންބަރުން އައްޔަންކުރުމަށް އަންނަ ޖުލައި މަހު ތެރޭގައި ހާއްސަގޮތުން ކުރާ އާންމު ޖަލްސާއެއް ބޭއްވުމަށް ކަމަށްވެސް ބުނެފައިވެއެވެ.