މޫސުން ގޯސްވާނެ ކަމަށް ލަފާކޮށް ރާއްޖޭގެ ބައެއް ސަރަހައްދުތަކަށް ރީނދޫ ސަމާލު ނެރެފި!

ރާއްޖޭގެ ބައެއް ސަރަހައްދު ތަކަށް މޫސުން ގޯސްވާނެ ކަމަށް ލަފާކޮށް ރާއްޖޭގެ މޫސުމާއި ބެހޭ އިދާރާ (މެޓް) އިން ރީނދޫ ސަމާލު ނެރެފިއެވެ.

މިގޮތުން އެ އިދާރާއިން ރީނދޫ ސަމާލު ނެރެފައިވަނީ ޅ. އަތޮޅުން ފެށިގެން ދ. އަތޮޅަށެވެ. މެޓް އޮފީހުން ބުނާ ގޮތުގައި މިރޭ 8 އިން ފެށިގެން 12 އާއި ހަމައަށް މި ސަރަހައްދު ތަކަށް ބޯކޮށް ވާރޭ ވެހުމާއެކު ގުުގުރާނެ އެވެ. އަދި ވިލާ ގަނޑުގައި ގަޑިއަކު 40 މޭލަށް ވައި ގަދަވެ ކަނޑުތައް ގަދަވާނެ ކަމަށްވެސް އެއިދާރާއިން ލަފާ ކޮށްފައި ވެއެވެ.

ރާއްޖޭގެ އެކި ކަންކޮޅު ތަކަށް ކުރަމުން މިދާ ވިއްސާރައިގައި މާލޭގެ މަގުތައް ފެންބޮޑު ވުމުގެ ސަބަބުން މަގުތަކުން ފެން ހިންދުމަށް ސިފައިން ވަނީ ހަރަކާތްތެރި ވާން ފަށާފައެވެ.

މިހާރު ކުރަމުންމިދާ ވިއްސާރަ އަކީ ރާއްޖޭގެ އިރުމަތީގައި އުފެދިފައިވާ ކޮޅިގަނޑެއްގެ ސަބަބުން ކުރާ ވިއްސާރައެއް ކަމަށާއި މި ކޮޅިގަނޑު ރާއްޖެ ހުރަސްކޮށް އަރަބިކަނޑަށް ޖެހެމުންދާނެ ކަމަށް ލަފާ ކުރެވޭ ކަމަށް މެޓުން މައުލޫމާތުދެއެވެ.

މި ކޮޅިގަނޑުގެ ސަބަބުން ކުރިއަށް އޮތް 3 ދުވަހު ރާއްޖޭގެ އެކިހިސާބަށް ވިއްސާރަކޮށް، ވައިގަދަވެ، ކަނޑުތައް ގަދަވާނެކަމަށް ލަފާކުރެވޭކަމަށް އެ އިދާރާއިން ވަނީ ބުނެފައެވެ. އެހެންކަމުން ހުރިހާ ފަރާތްތަކުން ވެސް މޫސުމަށް ސަމާލުވުމަށް މެޓް އޮފީހުން އިލްތިމާސް ކުރެއެވެ.