ޕްރޮކިއުމަންޓު އައު އުސޫލުގެ ދަށުން މެދުފަންތީގެ ވިޔަފާރިތަކަށް އިސްކަންދެނީ

ދައުލަތުގެ ޕްރޮކިއުމަންޓް ނިޒާމަށް ގެނައި އައު އުސޫލުގެ ދަށުން ޕްރޮކިއުމަންޓްގެ ކަންކަމުގައި މެދުފަންތީގެ ވިޔަފާރިތަކަށް އިސްކަންދިނުމަށް ނިންމައިފިއެވެ.

މިކަމާ ގުޅިގެން ދައުލަތުގެ ޕްރޮކިއުމަންޓްގައި ވަކި ފަރާތްތަކާއި ދާއިރާތަކަށް އިސްކަންދިނުމާބެހޭ އުސޫލަށް މުހިންމު އިސްލާހްތަކެއް ގެނެސްފައިވާއިރު މި އިސްލާހް މިހާރު ވަނީ ސަރުކާރުގެ ގެޒެޓުގައި ޝާއިއުކޮށްފައެވެ. ސަރުކާރުން ބުނީ މި އިސްލާހުތަކުގެ މައިގަނޑު މަގުސަދަކީ ދައުލަތުގެ ޕްރޮކިއުމަންޓްގެ މުއާމަލާތްތަކުގައި ރާއްޖޭގައި ރަޖިސްޓްރީކޮށްފައިވާ އެންމެ ކުދި، ކުދި އަދި މެދު ފަންތީގެ (އެމް.އެސް.އެމް.އީ) ވިޔަފާރިތަކުގެ ބައިވެރިވުން އިތުރުކޮށް، އެ ފަރާތްތަކަށް ލިބޭ ފުރުސަތުތައް ތަނަވަސްކޮށްދީ،  އެފަދަ ވިޔަފާރިތަކަށް ދެމެހެއްޓެނިވި ގޮތެއްގައި ތަރައްޤީވުމުގެ ޤާބިލުކަން ފަހިކޮށްދިން ކަމަށެވެ.

އަލަށް ގެނެސްފައިވާ އިސްލާހްގައިވާގޮތުން 5 މިލިއަން ރުފިޔާއަށް ވުރެ ކުޑަ އަގުގެ ޕްރޮކިއުމަންޓްތަކަށް ކުރިމަތިލާ ފަރާތްތަކުގެ ތެރޭގައި ކުދި އަދި މެދު ފަންތީގެ ވިޔަފާރިތައް ހިމެނޭނަމަ، އެ ކެޓަގަރީގެ ފަރާތްތަކުގެ ތެރެއިން އެންމެ މަތިން މާކްސް ހޯދާ ފަރާތަކަށް އެ މަސައްކަތެއް ހަވާލުކުރަން ޖެހެއެވެ. މި ބަދަލުގެ ސަބަބުން  ދައުލަތުގެ ޕްރޮކިއުމަންޓްތަކުގެ އެމް.އެސް.އެމް.އީ ގެ ދައުރު ފުޅާވެ އެފަދަ ވިޔަފާރިތައް ކުރިއެރުމަށް މަގުފަހިވެގެންދާނޭކަމަށް ސަރުކާރުން ވަނީ ބުނެފައެވެ.

އިމާރާތްކުރުމުގެ ދާއިރާގެ މަޝްރޫއުތަކަށްވެސް މި އުސޫލުގެ ދަށުން ވަނީ އާ އުސޫލުތަކެއް ކަނޑައަޅާފައެވެ. އެގޮތުން 500,000 ރުފިޔާއަށް ވުރެ ކުޑަ އަގުގެ އިމާރާތްކުރުމުގެ މަޝްރޫއުތައް މިހާރު ހާއްސަކުރެވިފައިވަނީ ނޭޝަނަލް ކޮންޓްރެކްޓާސް ރަޖިސްޓްރީގެ ގްރޭޑް 7 ގައި ހިމެނޭ ކޮންޓްރެކްޓަރުންނަށެވެ. އަދި 500,000 ރުފިޔާއާއި 10 މިލިއަން ރުފިޔާއާ ދެމެދުގެ މަޝްރޫއުތައް ހާއްސަކުރެވިފައިވަނީ އެ ރަޖިސްޓްރީގެ ގްރޭޑް 4، 5، 6 އަދި 7 ގެ ކޮންޓްރެކްޓަރުންނަށެވެ. މިއީ ކުދި އަދި މެދު ފަންތީގެ ކޮންޓްރެކްޓަރުންނަށް ލިބޭ ފުރުސަތުތައް އިތުރުކުރުމަށް އެޅުނު މުހިންމު ފިޔަވަޅަކަށް ވާނޭކަމަށް ސަރުކާރުން ބުނެއެވެ.

ދައުލަތުގެ ޕްރޮކިއުމަންޓް ނިޒާމަށް މެދުފަންތީގެ ވިޔަފާރިތަކަށް ފަހިވާނެ ބަދަލެއް ގެނެސްފައިވާއިރު، ރައީސް ޑރ. މުޢިއްޒު މިފަހުން ވިޔަފާރިވެރިންނާ ބައްދަލުކޮށް ވަކިން ޚާއްސަކޮށް ކުދި އަދި މެދުފަންތީގެ ވިޔަފާރިވެރިންގެ ކަންބޮޑުވުންތައް ހައްލުކޮށްދެއްވާނެކަމުގެ ޔަޤީންކަން ވަނީ ދެއްވާފައެވެ.

ފިނޭންސުން ބުނީ މިއަދު ގެޒެޓްކުރެވުނު މި އިސްލާހުތަކުގެ ސަބަބުން ދައުލަތުގެ ޕްރޮކިއުމަންޓް ނިޒާމުގެ ތެރެއިން ކުދި އަދި މެދު ފަންތީގެ ވިޔަފާރިތަކުގެ ހިއްސާ ބޮޑުވެ، ރާއްޖޭގެ އިގްތިސާދީ ދާއިރާގައި ހުރިހާ ފަރާތްތަކެއްގެ ބައިވެރިވުން އިތުރުވެގެންދާނެ ކަމަށެވެ. އަދި މި ސިޔާސަތުގެ ސަބަބުން ރާއްޖޭގެ އަމިއްލަ ސިނާއަތްތަކުގެ ގާބިލުކަން އިތުރުވެ، މުޅި ރާއްޖޭގައި ހުރި ކުދި ވިޔަފާރިތަކަށް އާ ފުރުސަތުތަކެއް ހުޅުވިގެންދާނޭކަމަށް ފިނޭންސުން ވަނީ ބުނެފައެވެ.