އޮޑިޓް އޮފީހުން ހުށަހެޅިގޮތަށް 134 މިލިއަން ރުފިޔާގެ ބަޖެޓެއް ފާސްކޮށްދީފި

އޮޑިޓަރ ޖެނެރަލްގެ އޮފީހުން ހުށަހެޅިގޮތަށް އެންމެފަހުން 134.3 މިލިއަން ރުފިޔާގެ ބަޖެޓެއް އެއޮފީހަށް ހަމަޖައްސައިދީފިއެވެ.

ރައްޔިތުންގެ މަޖިލީހުން މިއަދު ވަނީ އޮޑިޓަރ ޖެނެރަލްގެ އޮފީހަށް އަންނަ އަހަރަށް ލަފާކުރި 134.3 މިލިއަން ރުފިޔާގެ ބަޖެޓް ފާސްކޮށްދީފައެވެ. އޮޑިޓަރ ޖެނެރަލްގެ އޮފީހުން ހުށަހެޅިގޮތަށް އެއްވެސް އުނި އިތުރެއްނެތި ބަޖެޓް ފާސްކޮށްފައިވަނީ 51 މެމްބަރުންގެ އިއްތިފާގުންނެވެ.

އޮޑިޓް އޮފީހުގެ ބަޖެޓް ކުޑަކަން އެ އޮފީހުން އަބަދުވެސް ފާހަގަކުރެއެވެ. އެގޮތުން އެންމެފަހުން ބޭއްވި މަޖިލީހުގެ ކޮމިޓީގައިވެސް އޮޑިޓް އޮފީހުގެ ވެރިން ވަނީ އެކަން ފާހަގަކޮށްފައެވެ.

އޮޑިޓް އޮފީހަށް އަންނަ އަހަރަށް ކަނޑައެޅިބަޖެޓްގެ 61.4 މިލިއަން ރުފިޔާ މުއައްޒަފުންގެ ހޭދައަށް އެކަށައެޅިއިރު ދަތުރުފަތުރަށް ވަނީ 10 މިލިއަނަށްވުރެ ގިނަ ރުފިޔާ ހަމަޖައްސާފައެވެ. އަދި އޮފީސް ހިންގުމުގެ ހަރަދުގެ ގޮތުގައި ގާތްގަނޑަކަށް 13 މިލިއަން ރުފިޔާ ވަނީ ހަމަޖައްސާފައެވެ.

އޮޑިޓަރ ޖެނެރަލްގެ އޮފީހަށް އަންނަ އަހަރު ބަޖެޓް އިތުރުކޮށްދީފައިވާއިރު، އެ އޮފީހުން މިހާރުވެސް ދަނީ ގިނަ އޮޑިޓްތަކެއް ކުރަމުންނެވެ. އޮޑިޓް އޮފީހުން އަންނަ އަހަރު 81 އޮޑިޓެއް ކުރާނޭކަމަށް އެ އޮފީހުން ވަނީ ބުނެފައެވެ. މީގެ ތެރެއިން ބައެއް އޮޑިޓްތައް އައުޓްސޯސްކޮށް ކުރަމުންދާއިރު، ކުރަންޖެހޭ މަސައްކަތްތަކާ ބަލާފައި މުއައްޒަފުންނާއި އިންސާނީ ވަސީލަތްތައް ނެތުމަކީ އޮޑިޓް އޮފީހަށް އޮތް ގޮންޖެހުމެއްކަމަށް އެއޮފީހުން އަބަދުވެސް ފާހަގަކުރެއެވެ.