"ދަނބިދޫ ސްކޫލުގެ ބެލެނިވެރިންގެ މިވަގުތުގެ އެންމެ ބޮޑު ޑިމާންޑަކީ ޕްރިންސިޕަލް ބަދަލުކުރުން"

ދަނބިދޫ ސްކޫލްގެ މަރާމާތުކުރުމަށް އިޙްމާލުވެފައިވާ ކަމަށާއި ސްކޫލުގައި ޓީޗަރުން ހަމަނުވާކަމަސް ބުނެ ލ.ދަނބިދޫ ސްކޫލުގެ ބެލެނިވެރިން ސްކޫލު ބަންދުކޮށް އިހްތިޖާޖް ކޮށްފި އެވެ.

ދަނބިދޫ ސްކޫލުގައި ކުރިއަށްދިޔަ އިޙްތިޖާޖާއި ގުޅޭގޮތުން ކައުންސިލްގެ ނައިބު ރައީސް ހުސެއިން ފަޒީލް "ވޮއިސްއަށް" ވިދާޅުވީ ބެލެނިވެރިން އިހްތިޖާޖް ކުރަންފެށީ ސްކޫލުގައި ޓީޗަރުން މަދުވުމުންނާއި ސްކޫލުގެ ބައެއް ކުލާސް ރޫމުތަކަކީ ދަރިވަރުންނަށް ކިޔަވަން ތިބެން ރައްކާތެރި ތަނަކަށް ނުވާތީ ކަމަށެވެ.

"އަސްލު ބެލެނިވެރިން އިޙްތިޖާޖު ކުރަނީ ސްކޫލުގެ ބައެއް ކުލާސްރޫމުތަކުގެ ސީލިންގ ދަރިވަރުންގެ ބޮލަށް ވެއްޓޭ ހިސާބަށް ގޮސްފައި ވުމުންނާއި ދަރިވަރުންނަށް ކިޔަވައިދޭނެ ޓީޗަރުން ހަމަނުވާތީ." ފަޒީލް ވިދާޅުވިއެވެ.

ފަޒީލް އިތުރަށް ވިދާޅުވީ އިޙްތިޖާޖު މިހާހިސާބަށް ދިޔައިރު އެޑިޔުކޭޝަން މިނިސްޓަރީގެ ފަރާތުން އިހްތިޖާޖު ކުރަމުންގެންދާ ބެލެނިވެރިންނާއި ބައްދަލުކޮށްފައިވާ ކަމަށާއި، ސްކޫލުގައި މަރާމާތު ކުރަން ޖެހޭ ތަންތައް މަރާމާތު ކޮށްދެއްވާނެ ކަމަށް މިނިސްޓްރީން މިހާރު ބުނެފައިވާކަމަށެވެ.

އަދި ދަރިވަރުންނަށް ކިޔަވައި ދިނުމަށް ލ.ގަމު ސްކޫލުގައި މަސައްކަތް ކުރައްވާ އެކޮނޮމިކްސް ޓީޗަރަކު އެއް ހަފްތާއަށް އެސްކޫލަށް ފޮނުވައި ދެއްވާނެކަމަށް ވެސް އެޑިޔުކޭޝަން މިނިސްޓްރީން ބުނެފައިވާ ކަމަށެވެ.

ފަޒީލް އިތުރަށް ވިދާޅުވި ގޮތުގައި މިހާރު ސްކޫލު ބެލެނިވެރިންގެ އެންމެ ބޮޑު ޑިމާންޑަކީ މީގެ ދެއަހަރު ކުރިން ފެށިގެން އެ ބެލެނިވެރިން އެދެމުންދާ ފަދައިން މިވަގުތު އެ ސްކޫލުގެ ޕްރިންސިލަކަށް ހުންނެވި ފަރާތް ވަކިކުރުން ނުވަތަ އެހެން ސްކޫލަކަށް ބަދަލުކޮށް ދިނުމެވެ.

"އަސްލު ބެލެނިވެރިން ދެކެނީ ސްކޫލުގެ ކަންތައްތައް އެހާހިސާބަށް ދިޔައީ ޕްރިންސިޕަލްގެ ސަބަބުން ކަމަށް އެހެންވެ މިވަގުތު އިޙްތިޖާޖުގެ ބައިވެރިންގެ އެންމެ ބޮޑު ޑިމާންޑަކީ ޕްރިންސިޕަލް ވަކިކުރުން ނުވަތަ އެހެން ތަނަކަށް ބަދަލުކުރުން " ކައުންސިލްގެ ނައިބު ފަޒީލް ވިދާޅުވިއެވެ.

އާބާދީގައި ހާހަކަށް ވުރެ ގިނަ މީހުން ދިރިއުޅެމުންގެންދާ ލ.ދަނބިދޫ ސްކޫލުގައި މަރާމާތުގެ އެއްވެސް މަސައްކަތެއް ނުކުރެވޭތާ ފަސްވަރަކަށް އަހަރުވެދާނެކަމަށް ފަޒީލް ވިދާޅުވިއެވެ.