ސަދާގެ މަރުގެ މައްސަލައިގައި ފުރަތަމަ އަޑުއެހުން މާދަމާ

2021 ވަނަ އަހަރު، ފުވައްމުލަކު ހޮސްޕިޓަލުގައި ފަރުވާދެމުން ދަނިކޮށް ކުއްލި ގޮތަކަށް ނިޔާވި ފަސް އަހަރުގެ ސަދާ ސައުދުﷲ ގެ ކޭސްގައި، ސިއްހީ ހިދުމަތްތެރިންގެ މައްސަލަތަކެއް ފާހަގަކުރެވި، ސަދާގެ އާއިލާއިން ފުވައްމުލަކު ހޮސްޕިޓަލުގެ މައްޗަށް ކުރާ ދައުވާ ގެ ފުރަތަމަ އަޑުއެހުން ސިވިލް ކޯޓުން މާދަމާ އަށް ތާވަލުކޮށްފިއެވެ.

ސަދާގެ ބައްޕަ، ސައުދުﷲ އަޙްމަދު ފޭސްބުކްގައި ކުރި ޕޯސްޓެއްގައި ބުނީ، ސަދާ ނިޔާވި ހާދިސާ އާއި ގުޅިގެން ފުވައްމުލަކު ހޮސްޕިޓަލް އާއި ދެކޮޅަށް ކުރާ ދައުވާގެ ފުރަތަމަ އަޑުއެހުން މާދަމާ 11:00 އެބައޮތް ކަމަށެވެ. މި މަސައްކަތް ފެށީ ދިވެހި ދައުލަތުގެ ހޮސްޕިޓަލް ތަކުން ފަރުވާ ކުޑަވުމުގެ ސަބަބުންނާއި ބަލިމީހުންނާއި މެދުވާ އިހުމާލު ތަކުގެ ސަބަބުން ލިބޭ އަނިޔާ ތަކަށް ހައްލެއް ލިބޭނޭ ކަމުގެ ފުރިހަމަ އުއްމީދުގައި ކަމަށް ވެސް ސަދާގެ ބައްޕަ ވިދާޅުވިއެވެ.

"ދިވެހި ދައުލަތުގެ ހޮސްޕިޓަލް ތަކުން ފަރުވާ ކުޑަވުމުގެ ސަބަބުން އަދި އިހުމާލު ތަކުން ލިބޭ އަނިޔާ ތަކަށް ހައްލެއް ލިބޭނޭ ކަމުގެ ފުރިހަމަ އުއްމީދުގައި މި މަސައްކަތް ފެށީ އަދި އުއްމީދު ކުރަނީވެސް"

ސައުދުﷲ އަޙްމަދު ބުންޏެވެ.

ސަދާގެ ބަނޑުގައި ރިއްސައި، ވަރަށް ގަދައަށް ހޮޑުލާތީ އެ އަހަރުގެ އޮކްޓޯބަރު މަހުގެ ކުރީކޮޅު އެންމެ ފުރަތަމަ ގެންދިޔައީ ފުވައްމުލަކުގެ ފްލޫ ކްލިނިކަށެވެ. އެއީ ކޮވިޑްގެ އަލާމާތެއް ކަމަށް ބަލައި، ސަދާގެ ހާލަތު އިތުރަށް ގޯސްވާތީ ފްލޫ ކްލިނިކުން ސަދާ ފޮނުވާލީ ފުވައްމުލަކު ހޮސްޕިޓަލަށެވެ.

ސަދާ ނިޔާވީ 2021 އޮކްޓޯބަރު ތިން ވަނަ ދުވަހު ޑޮކްޓަރަށް ދެއްކުމުން ޖެހި، އިންޖެކްޝަނެއްގެ ސަބަބުން ކަމަށް އާއިލާ އިން ތުހުމަތުކޮށް، އެ މައްސަލަ ބަލައި ދިނުމަށް ހެލްތު މިނިސްޓްރީއަށް ހުށަހެޅިއެވެ. އާއިލާއިން ބުނެފައިވާ ގޮތުގައި ސަދާ މަރުވީ ހޮސްޕިޓަލުން އިންޖެކްޝަން ޖެހިތާ 5 މިނެޓް ތެރޭގައެވެ. އެ މައްސަލައާއި ގުޅިގެން މިނިސްޓްރީން ނެރުނު ރިޕޯޓުގައިވެސް އެކުއްޖާ އަށް ފަރުވާ ދިނުމުގައި ޑޮކްޓަރުންނާއި ނަރުހުން އިހުމާލުވެފައިވާ ކަމަށް ވަނީ ބުނެފައެވެ.

އެއާއިއެކު، މޯލްޑިވްސް މެޑިކަލް އެންޑް ޑެންޓަލް ކައުންސިލުން މި މައްސަލަ ބެލުމަށްފަހު ސަދާ އަށް ފަރުވާދިން ދެ ޑޮކްޓަރެއްގެ ލައިސަންސް ވެސް ސަސްޕެންޑު ކުރިއެވެ.