އިދިކޮޅުން ކައުންސިލްތަކުގެ ދައުރު ތަރުޖަމާކުރަނީ ރައްޔިތުންނަށް އޮޅޭގޮތަށް: ހަލީމް

އިދިކޮޅު ފަރާތްތަކުން ކައުންސިލްތަކުގެ ދައުރު ތަރުޖަމާކުރަނީ ރައްޔިތުންނަށް އޮޅޭގޮތަށްކަމަށް މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް ހަލީމް ރޭ ވިދާޅުވެއްޖެ އެވެ.

ޕީއެންސީން ގަލޮޅު ޖަގަހަ ހުޅުވުމުގެ ގޮތުން ރޭ ބޭއްވި ޖަލްސާގައި ހަލީމް ވަނީ ކައުންސިލްތަކުގެ ދައުރަކީ ކޮބައިކަން، ޤާނޫނުގައި ބަޔާންކޮށްފައި އޮންނަގޮތް ވަރަށް ރަނގަޅަށް ތިލަކޮށް ސާފްކޮށްދެއްވާފައެވެ. ހަލީމް ވިދާޅުވީ ކައުންސިލްތަކަކީ ސަރުކާރު ޖަވާބުދާރީކުރުވުމަށް މަތިކޮށްފައި އޮންނަ މުއައްސަސާއެއްގެ ގޮތުގައި ލާމަރުކަޒީ ޤާނޫނުގައި ފެންނަން ނެތްކަމަށާއި، މިކަމުގައި އިދިކޮޅު ފަރާތްތަކުން ރައްޔިތުންގެ ލޮލުގައި އަނދުން އަޅުވުމަށް އެކި ގޮތްގޮތުން މަސައްކަތް ކުރަމުން ގެންދާކަމަށެވެ.

އެގޮތުން ޤާނޫނުގައި ކައުންސިލްތަކުގެ ދައުރެއްކަމަށް ބަޔާންކުރަނީ އިޖުތިމާއީ ގޮތުންނާ އިގްތިސާދީ ގޮތުންނާ ސަގާފީ ގޮތުން ދިވެހިރާއްޖޭގެ ރަށްރަށުގައި ދިރިއުޅޭ ރައްޔިތުންގެ ދިރިއުޅުމުގެ ފެންވަރު މަތިކޮށް، ރައްޔިތުން ބާރުވެރިކޮށް އަމިއްލަ ރައްޔިތުންނާ އެންމެ ގާތުން ފުޅާދާއިރާއެއްގެ ހިދުމަތް ލިބޭނެ މަގުފަހިކޮށްދިނުމަށް ކަމަށް ހަލީމް ވިދާޅުވިއެވެ.

ފަހަރެއްގަވެސް ކައުންސިލްތަކަކީ އިދިކޮޅު ފަރާތްތަކުން ބުނަމުންދާގޮތަށް ސަރުކާރު ޖަވާބުދާރީ ކުރުމަށް އޮންނަ މުއައްސަސާއެއްކަމަށް ބަޔާންކޮށްފައި ނުވާކަމަށް ހަލީމް ފާހަގަކުރެއްވިއެވެ.

އެހެންވީމަ މިކަމުގަ އަޅުގަނޑުމެންގެ ސަރުކާރާ ގުޅިގެން މިމަސައްކަތް ކުރުވާނެ ކޮށްދެއްވާނެ ކެންޑިޑޭޓުން ހޮވުމަކީ އަޅުގަނޑުމެންގެ މަގްސަދު. އަދި މިކަމުގަ އަޅުގަނޑުމެންގެ އިއްޒަތްތެރި ރައީސުލްޖުމްހޫރިއްޔާ މި މާލެ ސަރަހައްދަށް މިދެކެވަޑައިގެން މި ކުރައްވާފަ ތަސައްވުރު ހަގީގަތަކަށް ހައްދަވާނީ ހަމަޔަގީނުންވެސް މިއުސޫލުން މިބޭނުމަށް މަސައްކަތް ކުރައްވާ ކެންޑިޑޭޓުން ހޮވައިގެންކަން އަޅުގަނޑު ޔަގީންކަމާ އެކު ފާހަގަކޮށްލަން

އިބްރާހިމް ހަލީމް

ސިޓީ ކައުންސިލްގެ ބާރުތައް ހިމެނޭ މާއްދާގައިވެސް ބަޔާންކޮށްފައިވަނީ، ތަރައްޤީގެ އެކި އެކި މަޝްރޫއުތައް ރާވާ ހިންގުމުގައި ސަރުކާރުގެ މިނިސްޓްރީތަކަށް ރައްޔިތުންގެ ފަރާތުން ލަފަޔާ މަޝްވަރާ ދިނުމާއި ސަރުކާރުގެ މިނިސްޓްރީތަކުން ކައުންސިލްގާ ހިންގާ މަޝްރޫޢުތައް ހިންގާ ނުހިންގާގޮތް ބެލުމުގައި އެހީތެރިވެދީ އެ މިނިސްޓްރީތަކަށް ޖަވާބުދާރީވެ، މިނިސްޓްރީތަކުން ކަނޑައަޅާ ގޮތަކަށް ގަވައިދުން ރިޕޯޓް ހުށަހެޅުން ކަމަށް ހަލީމް ވިދާޅުވިއެވެ.

ހަލީމް ވިދާޅުވީ ކައުންސިލްތަކުން ރައްޔިތުންނަށް ހިދުމަތްތައް ދޭން މަތިކޮށްފައި އޮންނައިރު، ސަރުކާރާ އިދިކޮޅު ކެނޑިޑޭޓުން ކައުންސިލްތަކަށް ހޮވިއްޖެނަމަ، ސަރުކާރުން ރައްޔިތުންނަށް ވީ ވައުދުތައް ތަންފީޒުކުރުމުގައި ހުރަސްތަކާ ކުރިމަތިލާން ޖެހޭނޭކަމަށެވެ. އެކަން މިހާރުވެސް ފެންނަމުންދާކަން އޭނާ ފާހަގަކުރެއްވިއެވެ.

ރޭގެ ޖަލްސާގައި ޕީއެންސީ ގަލޮޅު ކެމްޕޭން ޖަގަހަ ހުޅުވައިދެއްވީ ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދެވެ. މި ޖަލްސާގައި ޕީއެންސީގެ ފަރާތުން މާލެ ސިޓީގެ މޭޔަރު ކެނޑިޑޭޓް ކުރީގެ ޗީފް އޮފް ޑިފެންސް ފޯސް މޫސާ އަލީ ޖަލީލާއި، މާލެސިޓީގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސާކަމޖުގެ މަޤާމަށް ވާދަކުރައްވާ ކެނޑިޑޭޓް، އައިޝަތު އަލައިކާ އަދްނާންގެ އިތުރުންވެސް މާލެސިޓީގެ މަގާމްތަކަށް ކުރިމަތިލައްވާފައިވާ އިތުރު ކެނޑިޑޭޓުން ބައިވެރިވިއެވެ.