ނިމިފައިވާ މަޝްރޫޢުތަކުގެ ޚިދުމަތް ނުފެށެނީ ބައެއް ލިޔެކިޔުންތައް މަދުވެގެން: ޑރ.މުއްޠަލިބި

އެކި ރަށްރަށުގައި ކުރިއަށް ގެންގޮސް ނިންމާފައިވާ ފެނާއި ނަރުދަމާގެ މަޝްރޫޢުތައް ނިމިފައިވީ ނަމަވެސް، އެ ޚިދުމަތް ދޭން ނުފެށެނީ ޔުޓިލިޓީ ރެގިއުލޭޓަރީ އޮތޯރިޓީއަށް ހުށަހަޅަންޖެހޭ ލިޔުންތައް މަދުވެގެން ކަމަށް އިމާރާތް ކުރުމާ ބެހޭ ވަޒީރު ޑރ. އަބްދުالله މުއްޠަލިބް ވިދާޅުވެއްޖެއެވެ.

މަޖިލީހުގެ މިއަދުގެ ޖަލްސާގައި ބައެއް މެންބަރުން ވަނީ އެ ރަށްރަށުގައި ކުރިއަށް ގެންގޮސް ނިމިފައިވާ މަޝްރޫޢުތަކުގެ އެ ޚިދުމަތް ރައްޔިތުންނަށް ދޭން ނުފެށޭތީ އެކަމާ ކަންބޮޑުވުން ފާޅުކުރައްވައި ވަޒީރާ ސުވާލު ކުރައްވާފައެވެ.

އެ ސުވާލުތަކަށް ޖަވާބު ދެއްވަމުން ވަޒީރު ވިދާޅުވީ، ގިނަ ރަށްރަށުގެ މަސައްކަތް އޭރު ހަވާލުކޮށްފައި އޮތީ ޔޫއާރްއޭއިން ނަގަން ޖެހޭ ހުއްދަތައް ނުނަގައި، ޑިޒައިންތައް ފައިނަލް ނުކޮށް، އަމިއްލަ ފަރާތްތަކަށް ފެނަކައިން ސަބް ކޮންޓްރެކްޓްކޮށްގެން ކަމަށެވެ.

އަދި އެފަދައިން ސަބް ކޮންޓްރެކްޓް ކޮށްފައި ހުރީ ވެސް ޓެންޑާ ބޯޑުން ނަގަންޖެހޭ ހުއްދަތައް ނުނަގައި ކަން މުއްތަލިބު ފާހަގަކުރެއްވިއެވެ.

އެހެންކަމުން، މަސައްކަތް ނިންމައި ކޮމިޝަން ކުރެވުނު ނަމަވެސް ޔޫއާރްއޭއަށް ބޭނުންވާ ބައެއް ލިޔެކިޔުންތައް ކޮންޓްރެޓަރުގެ ފަރާތުން ހަމަނުވާތީ، ހުއްދަ ނުލިބިގެން ޚިދުމަތް ދޭން ފެށިފައި ނުވާ ކަމަށެވެ.

އަޅުގަނޑުމެން އެންވަޔަމަންޓް މިނިސްޓްރީއާއެކު މަސައްކަތް މިކުރަނީ ޔޫއާރްއޭގެ އުސޫލުތައް ތަންކޮޅެއް ފަސޭހަ ކޮށްލައިގެންވެސް ރައްޔޮތުންނަށް ވީހާވެސް އަވަހަށް ޚިދުމަތް ދެވޭނެ ގޮތެއް ހޯދަން. އިރާދަކުރެއްވިއްޔާ މާ ލަސްތަކެއް ނުވެ ޚިދުމަތްދެވެން ފަށާނެ

ވަޒީރު ޑރ. އަބްދުالله މުއްޠަލިބު

މީގެ އިތުރުންވެސް މިއަދުގެ މަޖިލީހުގެ ޖަލްސާގައި ވަޒީރު ވަނީ، އަންނަ އަހަރުގެ ނިޔަލަށް ރާއްޖޭގެ ހުރިހާ ރަށަކަށް ފެނާއި ނަރުދަމާގެ ޚިދުމަތް ދިނުމަތް ފޯރުކޮށްދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަމާޒެއް ކަމަށާއި މިހާރު މަސައްކަތްތައް ކުރިއަށްދާގޮތުން އެކަން ހާސިލް ކުރެވޭނެ ކަމަށް ވިދާޅުވެފައެވެ.