މާލެއެކޭ އެއްވަރަށް ވިލިމާލެ ވެސް ތަރައްގީ ކުރާނަން: ރައީސް

މާލެ ސިޓީއެކޭ އެއްވަރަށް ވިލިމާލެ އަށްވެސް ތަރައްގީ އަންނަން ޖެހޭނެކަމަށް ގަބޫލުފުޅު ކުރައްވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައިވަނީ ވިލިމާލެ ރައްޔިތުންނާ ބައްދަލުކުރައްވަން ރޭ އެ ރަށުގައި ބޭއްވި ބައްދަލުވުމުގައި ވާހަކަފުޅު ދައްކަވަމުންނެވެ.

މި ބައްދަލުވުމުގެ ތެރެއިން ރައީސް ވިދާޅުވީ  އެމަނިކުފާނު ވެވަޑައިގެންނެވި ވައުދުތަކުގެ އިތުރަށްވެސް ގިނަ ކަންތައްތައް ކުރިއަށްގެންދާނެ ކަމަށެވެ. އަދި ވިލިމާލެއަށް އިހުމާލު ކޮށްލެވިފައި އޮންނަން ޖެހޭނެ ކަމަކަށް ގަބޫލުފުލު ނުކުރައްވާ ކަމަށާއި، ސަރުކާރު ތެރެއިން މި ރަށަށް ޔަގީނުންވެސް މާ ފުރިހަމައަށް ކަންކަން ކޮށްދެއްވާނެކަމަށެވެ.

"އަޅުގަނޑު ބޭނުންވަނީ ވިލިމާލެ ރައްޔިތުންނަށް މި ހުރިހާ ދުވަހު ނުކުރެވި، އަދި ހާސިލްކޮށް ނުދެވި ސަރުކާރުތަކުން އޮތް ހުރިހާ ކަމެއް ފުރިހަމަ ކޮށްދޭން، އަދި އިތުރަށްވެސް ކުރަން، މާލޭގެ ސިޓީގެ އެއްބައި، މާލެ ސިޓީގެ ހުރިހާ ރައްުޔިތުންނަށް އެއްވަރަކަށް ތަރައްގީ އަންނަން ޖެހޭނީ، ވިލިމާލެ ވިމަ އިހުމާލު ކޮށްލެވިފައި ތަފާތު ކުރެވިފައި އޮންނަން ޖެހޭނެ ކަމަކަށް އަޅުގަނޑު ގަބޫލެއް ނުކުރަން، އަޅުގަނޑު މޭޔަރަކަށް ހުރިއިރު އެއިރު ކުރެވުނު ވަރަކަށް ކުރެވޭތޯ ބެލިން، މިހާރު ސަރުކާރު ތެރެއިން ހަމަ ޔަގީނުންވެސް މާ ފުރިހަމައަށް ކަންކަން ވާނެ،"

ރައީސުލްޖުމްހޫރިއްޔާ ޑރ. މުހައްމަދު މުއިއްޒު

ރައީސް ވިދާޅުވީ، ވިލިމާލެ ރައްޔިތުންނަށް ވެވަޑައިގެންނެވި ވައުދުތައް ފުރިހަމައަށް ހަނދާން އެބަ ހުންނެވި ކަމަށާއި އޭގެ ތެރެއިން ބައެއް ކަންކަން ފުރިހަމަ ކުރެވި، އަނެއްބައި ކަންކަން ކުރިއަށް ހިނގަމުންދާ ކަމަށެވެ.

މި ބައްދަލުވުމުގައި އެރަށުގައި ތަރައްގީގެ އެތައް މަޝްރުއެއް ކުރިއަށް ގެންދިޔުމަށް ރައީސް ވަނީ ވައުދުވެފައެވެ. މީގެ ތެރޭގައި ހިމެނޭ އެންމެ ބޮޑު އަދި އެންމެ މުހިންމު މަޝްރޫއުތަކުގެ ތެރޭގައި ހިމެނެނީ 100 އެނދުގެ ހޮސްޕިޓަލުގެާ އިމާރާތާއި، މަގު ހެދުމުގެ މަޝްރޫއުއެވެ. މި ދެ މަޝްރޫއުވެސް ޗައިނާ ކުންފުންޏަކާއި ހަވާލުކޮށްފައިވާއިރު، ރައީސް ވިދާޅުވީ، އެ ހޮސްޕިޓަލުގެ ހުރިހާ ކަމެއް ހަމަޖެހި، ފަންޑިންގެ ހުރިހާ ކަމެއް ހަމަޖެހިފައިވާ ކަމަށާއި، އެކަމުގެ ހުރިހާ މަރުހަލާތަކެއް ރަނގަޅަށް ހިނގާ ކަމަށެވެ. އަދި ކުޅިވަރުގެ ފެސިލިޓީތައް ގާއިމް ކުރުމުގެ ތެރެއިން ސްޕޯޓްސް ކޮމްޕެލްސް އަންނަ އަހަރު ތެރޭގައި ގާއިމް ކުރުމުގެ މަސައްކަތް ފެށޭނެ ކަމަށާއި،  އެރަށުގައި މިހާރު އޮތް ދަނޑު 1200 މީހުންގެ ސީޓިން ކެޕޭސިޓީ ހިމެނޭ އިންޑޯ ހުރިހާ ކުޅިވަރުތައް ކުޅެވޭ ގޮތަށް ފީފާ ސްޓޭންޑާޑަށް އަޕްގްރޭޑް ކުރާނެކަމަށާއި އަދި ބީއެމްއެލް ޑޮލަރު އޭޓީއެމްއެއްވެސް ގާއިމްކުރާނެކަމަށް ރައީސް ވައުދުވެވަޑައިގަތެވެ.