ނައިބު ރައީސްގެ ޔުގެންޑާ ދަތުރުފުޅަށް ޚަރަދުވީ 983،000 ރުފިޔާ

ރައީސުލްޖުމުހުރިއްޔާ ޑރ.މުހައްމަދު މުއިއްޒުގެ ނައިބު އަލްއުސްތާޛު ހުސެއިން މުޙައްމަދު ލަޠީފް ޔޫގެންޑާ އަށް ކުރެއްވި ރަސްމީ ދަތުރުފުޅުގެ ޚަރަދު ތަފްސީލް ރައީސުލްޖުމްހޫރިއްޔާގެ އޮފީހުން މިއަދު ހާމަ ކޮށްފިއެވެ.

މިދިޔަ މަހުގެ 17 އިން 24 ގެ ނިޔަލަށް ނާއިބު ރައީސް ކުރެއްވި މި ދަތުރުފުޅަކީ ނޮން-އައިލެންޑް މޫވްމަންޓް (ނާމް) ގެ 19 ވަނަ ސަމިޓްގެ ގައުމުތަކުގެ އިސްވެރީންގެ ބައްދަލްވުމުގައި ބައިވެރިވެވަޑައިގަތުމަށާއި ގްރޫޕް އޮފް 77 އެންޑް ޗައިނާ -- ޖީ77 ދަށުން ބާއްވާ ތިންވަނަ ސައުތު ސަމިޓް ގައި ބައިވެރިވެވަޑައިގަތުމަށް ކުރެއްވި ދަތުރުފުޅެކެވެ.

ރައީސުލްޖުމުހޫރިއްޔާގެ އޮފީހުން އާއްމުކުރައްވާފައިވާ މަޢުލޫމާތުތަކުން އެނގޭ ގޮތުގައި ނައިބު ރައީސްގެ މި ދަތުރުފުޅުގައި ބިޒުނަސް ކްލާސް ޓިކެޓުގައި ތިން ބޭފުޅަކު ދަތުރު ކުރައްވާފައިވެއެވެ.

ބިޒްނަސް ކްލާސް ތިން ޓިކެޓް - 346،657.02 ރުފިޔާ

އިކޮނޮމިކް ކްލާސް ހަތް ޓިކެޓް - 304،190.34 ރުފިޔާ

ޕޮކެޓް މަނީ (10 ބޭފުޅަކަށް) - 95،232.00 ރުފިޔާ

ފަރިއްކޮޅު ހަރަދު - 48،736.74 ރުފިޔާ

ސްޓޮޕްއޯވާ - 18،494.00 ރުފިޔާ

އިންސިޑެންޓަލް ހަރަދު - 441.27 ރުފިޔާ

އެކަމަޑޭޝަން - 169،280.76 ރުފިޔާ

ނައިބު ރައީސްގެ 7 ދުވަހުގެ މި ދަތުރުފުޅަށް ދައުލަތުގެ ބަޖެޓުން ޖުމުލަ ޚަރަދުވެފައިވަނީ 983،032.13 ރުފިޔާއެވެ.

ރައީސުލްޖުމުހުރިއްޔާ ޑރ.މުހައްމަދު މުއިއްޒު ވެރިކަމަށް ވަޑައިގެން ނިންމަވާފައިވަނީ، އެމަނިކުފާނާއި އެމަނިކުފާނުގެ ނައިބު ރާއްޖެއިން ބެރަށް ކުރައްވާ ހުރިހާ ދަތުރުފުޅެއްގެ ޚަރަދު ތަފްސީލް އާއްމުކުރެއްވުމަށެވެ.

މިހާތަނަށް ރައީސް ޑރ.މުހައްމަދު މުއިއްޒާއި، ނައިބު ރައީސް ހުސެއިން މުޙައްމަދު ލަޠީފު ރާއްޖެއިން ބޭރަށް ކުރެއްވި ހުރިހާ ދަތުރުފުޅެއްގެ ޚަރަދު ތަފްސީލް އާއްމުކުރައްވާފައިވާކަން ފަހަގަކޮށްލެވެއެވެ.