ފްލެޓް ލިބޭ މީހުން ކަނޑައެޅުމުގެ އިންތިޒާމު ފަށައިފި

ނިމިދިޔަ އިބްރާޙިމް މުޙައްމަދު ޞާލިޙްގެ ސަރުކާރުން އެންމެފަހުވަގުތު ގެދޮރުވެރިޔާ ސްކީމުގެ ދަށުން ފުލެޓް ލިބޭނެކަމަށް ކަނޑައެޅި މީހުންގެ ލިސްޓުން ފުލެޓްލިބޭ މީހުން އަލުން ކަނޑައެޅުމުގެ މަސައްކަތް ކުރަމުން އަންނަ ކަމަށް ރައީސް ޑރ.މުހައްމަދު މުއިއްޒުގެ މި ސަރުކާރުން ހާމަކޮށްފިއެވެ.

މިކަން ހާމަކޮށްފައިވަނީ ހައުސިން  މިނިސްޓްރީން މިރޭ ނެރުނު ބަޔާނެއްގައެވެ.

އެ ބަޔާނުގައި ބުނެފައި ވަނީ ޝަރުތު ހަމަވެ އިތުރު މައްސަލައެއް ނޫޅޭ ފޯމުތަކުގެ ލިސްޓެއް އޭސީސީން ކޮމިޝަނަށް ފޮނުވާފައިވާ ކަމަށާއި، ނަމަވެސް އެއީ ހަމައެކަނި ތަހުގީގުގެ ބޭނުމަށް އެއްކުރި މައުލޫމާތުގެ އަލީގެ އެކުލަވާލާފައިވާ ލިސްޓެއް ކަމަށްވާތީ، އަލުން ފްލެޓު ލިބޭ މީހުންގެ ލިސްޓެއް އެކުލަވާލަން ނިންމާފައިވާ ކަމަށެވެ.

ރައީސް ޞާލިޙްގެ ސަރުކާރުން ހިންގި ގެދޮރުވެރިޔާ ސްކީމްގެ ދަށުން މައްސަލަ ނެތް ފަރާތްތަކަށް ފްލެޓް ދޫކުރުމުގެ ހުއްދަ އޭސީސީން ދީފައިވާއިރު 4000 ފުލެޓްގެ ތެރެއިން، ފްލެޓް ލިބޭ މީހުންގެ 59.6 އިންސައްތަ މީހުންގެ ޝަރުޠު ހަމަނުވާކަމަށް އޭސީސީގެ ތަހުގީގުންވަނީ ހާމަވެފައެވެ. އަދި ޝަރުޠު ހަމަވާކަމަށް ފާހަގަކުރެވުނީ 20.7 އިންސައްތަ ފޯމުކަމަށްވެސް އޭސީސީން ވިދާޅުވެއެވެ.

ސަރުކާރުން މިފަދައިން ބުނެ މިއަދު ބަޔާނެއް ނެރެފައި ވާއިރު ފްލެޓު ލިބޭ މީހުންގެ މައްސަލަތައް އޭސީސީން ބަލާފައި ވަނީ ގޯސްކޮށް ކަމަށް އިދިކޮޅުން ދަނީ ބުނަމުންނެވެ.

"ފްލެޓް ލިސްޓްގައި ހިމެނޭ ހައްޤުވެރި ފަރާތްތަކަށް ފްލެޓް ދޫކުރުމުގެ އިންތިޒާމްތައް ހަމަޖެހިގެންދާނީ އޭ.ސީ.ސީ އަދި އެޓަރނީ ޖެނެރަލްގެ ލަފާ ގެ މަތިން ކަމަށް ދަންނަވަމެވެ. އަދި އެކަމާ ގުޅޭ އެންމެހައި މަސައްކަތްތައް މިހާރު މިނިސްޓްރީން ކުރަމުންދާކަން މައުލޫމާތައްޓަކައި ދަންނަވަމެވެ"

ހައުސިންގ މިނިސްޓްރީން ބަޔާނުގެ އިތުރަށް އެކްސްގައި ކުރި ޕޯސްޓެއްގައި ބުނެފައިވެއެވެ.

ފުލެޓް ލިބޭނެ ފަރާތްތައް ކަނޑައެޅުމުގެ މަސައްކަތް އަލުން މިސަރުކާރުން ކުރާނެ ކަމަށް މިއަދު އިއުލާން ކުރެއްވި އިރު މާލެ ސަރަހައްދުން ދޫކޮށްފައިވާ ގޯތިތައް ދޫކޮށްފައިވާގޮތް ވެސް ތަޙްގީގު ކުރަމުން އަންނަކަމަށް އޭސީސީން ވަނީ ބުނެފައެވެ.

ސަރުކާރުގެ ފަރާތުން މިއަދު މިގޮތައް ނިންމިކަން އިއުލާން ކުރެއްވި އިރު މިހާރުގެ ރައީސުލްޖުމުޙޫރިއްޔާ ޑރ.މުހައްމަދު މުއިއްޒު ކެންޕެއިންގެ ތެރޭގައި އަދި ރައީސްކަމާއި ހަވާލުވެ ވަޑައިގެންނެވުމަށްފަހު ވެސް ވިދާޅުވެފައިވަނީ ނިމިދިޔަ ސަރުކާރުން ރަސްމީކޮށް ހަވާލުކޮށްފައިވާ އެއްވެސް ގޯއްޗެއް އަދި ފުލެޓެއް މިސަރުކާރުން އަތު ނުލައްވާނެ ކަމަށެވެ. އަދި އެގޯތި އަދި ފުލެޓް އޭގެ ހައްގުވެރި ފަރާތްތަކާއި ހަވާލުކޮށްދެއްވާނެ ކަމަށެވެ.