ވޯލްޑް ގަވަރމަންޓް ސަމިޓުގައި ބައިވެރިވެވަޑައިގަތުމަށް ރައީސް ޔޫއޭއީއަށް ފުރާވަޑައިގެންފި

ކޮންމެއަހަރަކު އެއްފަހަރު ޔުނައިޓެޑް އެރެބި އެމެރޭޓްސްގެ ދުބާއީގައި ބާއްވަމުންދާ ވޯލްޑް ގަވަރމަންޓް ސަމިޓުގައި ބައިވެރިވެވަޑައިގަތުމަށް ރައީސުލްޖުމުހޫރިއްޔާ ޑ.މުހައްމަދު މުއިއްޒު ޔޫއޭއީއަށް ފުރާވަޑައިގެންފިއެވެ.

ރައީސުލްޖުމުހޫރިއްޔާ ޑރ.މުހައްމަދު މުއިއްޒުގެ މި ދަތުރުފުޅަކީ  ޔޫ.އޭ.އީގެ ނައިބް ރައީސް، ބޮޑުވަޒީރު، ޔޫ.އޭ.އީގެ މިނިސްޓަރ އޮފް ޑިފެންސް، އަދި ދުބާއީގެ ވެރިޔާ، ޝައިޚް މުޙައްމަދު ބިން ރާޝިދު އަލް މަޚްތޫމްގެ ދަޢުވަތަކަށް ކުރައްވާ ރަސްމީ ދަތުރުފުޅެކެވެ.

މިއަހަރުގެ ވޯލްޑް ގަވަރމަންޓް ސަމިޓު ބޭއްވުމަށް ހަމަޖެހިފައިވަނީ މި މަހުގެ 12 އިން 14 އަށެވެ. މި ފަހަރުގެ ސަމިޓަށް ކަނޑައަޅާފައިވާ ޝިއާރަކީ "ޝޭޕިންގ ފިއުޗަރ ގަވަރމަންޓްސް" އެވެ.

މި ސަމިޓުގައި ސަރުކާރުތަކުންނާއި ބައިނަލްއަޤްވާމީ އެކިއެކި ޖަމުޢިއްޔާ ޖަމާޢަތްތަކާއި ޕްރައިވެޓް ސެކްޓަރ އަދި އެކި ދާއިރާތަކަށް ޚާއްސަ ލީޑަރުން ބައިވެރިވެ މުސްތަޤްބަލަށް ހުރި ގޮންޖެހުންތަކާ ގުޅޭގޮތުން މަޝްވަރާކޮށް، ކުރިއަށް އޮތް ޖީލުތަކުގައި އަންނަ ސަރުކާރުތައް ބާރުވެރިކުރުމަށް ކުރަންހުރި ކަންކަމާއި ގުޅޭގޮތުން މަޝްވަރާތައް ކުރެވޭނެއެވެ.

މި އަހަރުގެ ވޯލްޑް ގަވަމެންޓު ސަމިޓުގައި ރައީސް ޑރ.މުޢިއްޒު ތަޤުރީރުކުރެއްވުމަށް ވަނީ ހަމަޖެހިފައެވެ.  މިއީ މި ސަމިޓުގައި ދިވެހި ރައީސަކު ތަޤުރީރުކުރައްވާ ފުރަތަމަ ފަހަރުކަމަށް ވެގެންދާނެއެވެ.

ރައީސުލް ޖުމުހޫރިއްޔާ ޑރ.މުއިއްޒުގެ މި ދަތުރުފުޅުގެ ތެރެއިން ފެބްރުވަރީ 13 ވަނަ ދުވަހު ދުބާއީގައި ބާއްވާ މޯލްޑިވްސް އިންވެސްޓްމަންޓް ފޯރަމުގައިވެސް ބައިވެރިވެވަޑައިގެން ތަޤުރީރު ކުރެއްވުމަށް ހަމަޖެހިފައިވެއެވެ.

"އިންވެސްޓް މޯލްޑިވްސް ފޯރަމް" އަކީ ރާއްޖޭގައި ހުރި އިންވެސްޓްމަންޓާއި، ވިޔަފާރީގެ ފުރުޞަތުތައް ބޭރުގެ އިންވެސްޓަރުންނާއި ހަމައަށް ގެންގޮސްދޭ އެންމެ މުހިންމު އެއް ޕްލެޓު ފޯމަށްވާއިރު މިފަހަރުގެ މި ފޯރަމުގައި ރާއްޖޭގެ އިންވެސްޓަރުން ހިމެނޭހެން މުޅި ޖުމުލަ 300 އިންވެސްޓަރުން ބައިވެރިވާނެކަމަށް ސަރުކާރުން ވަނީ ހާމަކުރައްވައެވެ.