އިގުތިސާދީ ކުރިއެރުމާއެކު ފިޗުން ބީ.އެމް.އެލްގެ މާލީ ދުޅަހެޔޮކަން ބަލައިގެންފި

ދިވެހިރާއްޖޭގެ މާލީ ހާލަތާއި ބޭރުގެ ގޮންޖެހުންތައް މެނޭޖްކުރުމުގައި ބޭންކް އޮފް މޯލްޑިވްސް (ބީ.އެމް.އެލް) އިން އަދާކުރާ މުހިންމު ދައުރަށް ބަލައި، ފިޗް ރޭޓިންގްސްއިން ބީއެމްއެލް އަށް ކްރެޑިޓް ރޭޓިންގ ދީފިއެވެ.

ފިޗުން ބީ.އެމް.އެލްގެ 'ލޯންގް-ޓާމް އިޝުއަރ ޑިފޯލްޓް ރޭޓިންގް' (އައިޑީއާރު) އަށް ދީފައިވަނީ 'ސީސީސީ-' އެވެ. އަދި ބޭންކުގެ އައުޓްލުކް ވަނީ 'ސްޓޭބަލް' ނުވަތަ އެއްވަރެއްގައި ހިފެހެއްޓިފައިވާ އައުޓްލުކްއެއްގެ ގޮތުގައި ކަނޑައަޅާފައެވެ. މީގެ އިތުރުން، ބޭންކުގެ 'ލޯކަލް ކަރަންސީ ލޯންގް-ޓާމް އައިޑީއާރު' އަށް 'ސީސީސީ+' ދީފައިވާއިރު، މިއީ ރާއްޖޭގެ ސޮވަރިން ރޭޓިންއަށްވުރެ ދެ ދަރަޖަ މަތީ ރޭޓިންއެކެވެ.

މި ރޭޓިންއަކީ 3 ޖޫން 2026 ގައި ފިޗުން ރާއްޖޭގެ ސޮވަރިން ރޭޓިން 'ސީސީ' އިން 'ސީސީސީ-' އަށް މަތިކުރުމާ ގުޅިގެން ދީފައިވާ ރޭޓިންއެކެވެ. ރާއްޖޭގެ ރޭޓިން މަތިކުރީ އޭޕްރީލް 2026 ގައި ދައްކަންޖެހޭ 500 މިލިއަން ޑޮލަރުގެ ސުކޫކް ކާމިޔާބުކަމާއެކު އަނބުރާ ދެއްކުމާއި، އާމްދަނީ އިތުރުކުރުމަށް ގެނައި އިސްލާހުތަކާއި ބޭރު ފައިސާއާ ބެހޭ ގާނޫނު ތަންފީޒުކުރަން ފެށުމާ ގުޅިގެންނެވެ.

ބީ.އެމް.އެލް ގެ ރޭޓިންއާ ގުޅޭގޮތުން ފިޗުން ފާހަގަކޮށްފައިވަނީ، ބޭންކުގެ ޖުމްލަ ރޭޓިންއަކީ ގައުމުގެ ސޮވަރިން ރޭޓިންގެ މައްޗަށް ބިނާވެފައިވާ އެއްޗަކަށް ވީނަމަވެސް، ބޭންކުގެ އަމިއްލަ މާލީ ހާލަތު ވަރުގަދަ ކަމަށެވެ. އަދި ރާއްޖޭގެ ބޭންކިން ދާއިރާގައި ބީއެމްއެލްގެ ހިއްސާ ބޮޑުކަމާއި، ބާޒާރުގައި އޮތް ވަރުގަދަ މަގާމާއި ވާދަވެރިކަމަށް ލިބިފައިވާ ކުރިއެރުންތައް އެ އޭޖެންސީން ފާހަގަކުރިއެވެ.

ބީ.އެމް.އެލް އަކީ ރާއްޖޭގެ އެންމެ ބޮޑު ބޭންކަށްވާއިރު، އާންމު ފަރުދުންނާއި، ވިޔަފާރިތަކަށް އެހީތެރިވުމުގައި އެ ބޭންކުން މަރުކަޒީ ދައުރެއް އަދާކުރެއެވެ. މުޅި ރާއްޖެއަށް ފެތުރިފައިވާ ބޭންކުގެ ވިއުގައާއި ޑިޖިޓަލް ވަސީލަތްތަކަކީ ގައުމުގެ މާލީ އަދި އުމްރާނީ ތަރައްގީގެ މުހިންމު ބައެކެވެ.

ފިޗުން ވަނީ ބޭންކުގެ ރައުސްމާލުގެ ވަރުގަދަކަންވެސް ފާހަގަކޮށްފައެވެ. މިއީ ބޭންކަށް ލިބޭ ފައިދާއިން ރައުސްމާލު އިތުރުކުރުމާއި، ހަރުދަނާ ރިސްކް މެނޭޖްމަންޓާއި ޑިވިޑެންޑް ޕޮލިސީގެ ނަތީޖާކަމަށް ފިޗުން ބުނެއެވެ. މީގެ ސަބަބުން އިގްތިސާދީ ކުރިއެރުމަށް އެހީތެރިވަމުންވެސް، ކުއްލި ހާލަތްތަކަށް ބޭނުންވާ މާލީ ރައްކާތެރިކަން ދެމެހެއްޓުމަށް ބޭންކަށް މަގުފަހިވެއެވެ.

ބީ.އެމް.އެލް ގެ ސީއީއޯ އަދި މެނޭޖިންގ ޑައިރެކްޓަރ މުޙައްމަދު ޝަރީފް ވިދާޅުވީ، މި ރޭޓިންއަކީ ކުދި ޖަޒީރާ ގައުމެއްގެ އިގްތިސާދަށް ކުރިމަތިވާ ގޮންޖެހުންތަކާއެކުވެސް، ބޭންކުގެ މާލީ ދުޅަހެޔޮކަމާއި ހަރުދަނާކަން ހުރި މިންވަރު ދައްކުވައިދޭ ހެތްކެއް ކަމަށެވެ.

ބީއެމްއެލްއަށް ލިބުނު މި ރޭޓިންގެ ސަބަބުން، ރާއްޖޭގެ އިގްތިސާދީ ކުރިއެރުމަށް އެހީތެރިވާ އިތުބާރު ހުރި މާލީ އިދާރާއެއްގެ ގޮތުގައި އެ ބޭންކުގެ މަގާމު އިތުރަށް ވަރުގަދަވެގެންދެއެވެ.