ބީއެމްއެލްއިން 8 މަސް ތެރޭ 653 މިލިޔަން ޑޮލަރު ކަސްޓަމަރުންނަށް ވިއްކައިފި

މިއަހަރުގެ ފުރަތަމަ އަށް މަސް ދުވަހުގެ ތެރޭގައި ކާޑު މުޢާމަލާތްތަކާއި ޓީޓީ އާއި ދަތުރުފަތުރާއި ތަޢުލީމީ އަދި ޞިއްޙީ ބޭނުންތަކަށް ޖުމްލަ 653 މިލިޔަން ޑޮލަރު ވިއްކާފައިވާ ކަމަށް ބީއެމްއެލުން ހާމަކޮށްފިއެވެ.

އެ ބޭންކުން ބުނީ މި ޢަދަދަކީ ކޮންމެ މަހަކު އެވެރެޖްކޮށް 81 މިލިޔަނަށް ވުރެ ގިނަ ޑޮލަރު ކަމަށެވެ. ވަކިވަކި ދާއިރާތަކަށް ބެހިގެންދާ ގޮތަށް ބަލާއިރު އެންމެ ބޮޑު ޙިއްޞާއެއް ދޫކޮށްފައިވަނީ ކާޑު މުޢާމަލާތްތަކަށް ކަމަށާއި އެ ދާއިރާއަށް 304 މިލިޔަން ޑޮލަރު ހޭދަވެފައިވާ ކަމަށް ބީއެމްއެލުން ބުނެފައިވެއެވެ. އޮންލައިން ވިޔަފާރިއާއި ޑިޖިޓަލް ސަބްސްކްރިޕްޝަންތަކާއި ދަތުރުފަތުރުގެ ބުކިންގ ހެދުމާއި ރާއްޖެއިން ބޭރުގައި ކުރާ ތަފާތު ޚަރަދުތަކަށް ގިނަ ޢަދަދެއްގެ މީހުން ކާޑު ބޭނުންކުރާ ކަމަށް އެ ބޭންކުން ފާހަގަކޮށްފައިވެއެވެ.

ދެވަނައަށް އެންމެ ބޮޑު ޢަދަދެއް ކަނޑައެޅިފައިވަނީ ޓީޓީގެ ދާއިރާއަށް ކަމަށް ވާއިރު އެ ގޮތުން 214 މިލިޔަން ޑޮލަރު ނުވަތަ މަހެއްގެ މައްޗަށް 27 މިލިޔަން ޑޮލަރު ވިއްކާފައިވެއެވެ. މި ޑޮލަރު ސީދާ ދޫކުރެވެނީ ވިޔަފާރިތަކަށް ނަމަވެސް ރާއްޖެއަކީ ކާބޯތަކެއްޗާއި އަސާސީ މުދާ އެތެރެކުރުމަށް ބޭރަށް ބަރޯސާވާ ޤައުމަކަށް ވުމުން އެ ޑޮލަރުގެ ފައިދާ މުޅި ރައްޔިތުންނަށް ލިބިގެންދާ ކަމަށް ބީއެމްއެލުން ބުނެފައިވެއެވެ. ވިޔަފާރިތަކަށް ޑޮލަރު ފޯރުކޮށްދެވުމުން ބޭރުގެ ސަޕްލަޔަރުންނަށް ފައިސާ ދެއްކި މުދާ އެތެރެކުރުމުގެ ނިޒާމު މެދުނުކެނޑި ކުރިއަށް ގެންދެވޭ ކަމަށް ވެސް އެ ބޭންކުން ބުނެފައިވެއެވެ.

ރާއްޖެއިން ބޭރަށް ފުރާ ދިވެހިންނަށް ވިއްކާ 500 ޑޮލަރުގެ ބައިން މިހާތަނަށް 75 މިލިޔަން ޑޮލަރު ދޫކޮށްފައިވާ އިރު ތަޢުލީމީ ޚަރަދުތަކަށް 32 މިލިޔަން ޑޮލަރު އަދި ޞިއްޙީ ފަރުވާ އަށް 27 މިލިޔަން ޑޮލަރު ފޯރުކޮށްދީފައިވެއެވެ. ދިވެހިން ބޭރަށް ކުރާ ދަތުރުތަކުގެ ތެރޭގައި ޗުއްޓީ ދަތުރުތަކުގެ އިތުރުން އާއިލީ ޒިޔާރަތްތަކާއި ރަސްމީ އަދި ވިޔަފާރި ދަތުރުތައް ހިމެނޭ ކަމަށް ބީއެމްއެލުން ބުނެފައިވެއެވެ.

މި ޢަދަދުތަކުން ދައްކައިދެނީ ޢާންމު ދިރިއުޅުމުގެ މުޢާމަލާތްތަކާއި ޤައުމަށް ބޭނުންވާ މުދާ އެތެރެކުރުމާއި ބޭރުގައި ކިޔަވާ ދަރިވަރުންނާއި ބޭސްފަރުވާ ހޯދާ ޢާއިލާތަކަށް ޑޮލަރު ފޯރުކޮށްދިނުމުގައި ބީއެމްއެލުން އަދާކުރާ ދައުރެވެ.