ކުދި ވިޔަފާރިތަކަށް ބީއެމްއެލް މެދުވެރިކޮށް ޑޮލަރު ލިބުމާއި، ސަބްސްކްރިޕްޝަން ދެއްކުން އަންނަ މަހުން ފެށިގެން ފަހިވާނެ: ރައީސް

ރާއްޖޭގެ އުފެއްދުންތެރިންނާއި ކުދި އަދި މެދުފަންތީގެ ވިޔަފާރިތަކަށް ބޭންކް އޮފް މޯލްޑިވްސް (ބީއެމްއެލް) ގެ ގޭޓްވޭ މެދުވެރިކޮށް، ދުނިޔޭގެ ކޮންމެ ތަނަކުން ވެސް ޔޫއެސް ޑޮލަރުން ފައިސާ ބަލައިގަނެވޭނެ އިންތިޒާމު އަންނަ ނޮވެމްބަރު މަހުގެ އެއްވަނަ ދުވަހުން ފެށިގެން ހަމަޖެހިގެންދާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނު ކުރައްވައިފިއެވެ.

ރައީސުލްޖުމްހޫރިއްޔާ މިކަން ހާމަކުރެއްވީ "މޯލްޑިވްސް އެކްސްޕޯ 2026" ގެ އިނާމު ދިނުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.

މި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ރާއްޖޭގެ އުފެއްދުންތެރިކަމާއި ކުދި ވިޔަފާރިތަކަށް ރާއްޖެއިން ބޭރުން ފައިސާ ލިބިގަތުމުގައި ވަރަށް ގިނަ ގޮންޖެހުންތައް ހުރިކަމަށެވެ. އަދި އެކަމަށް އަވަސް ހައްލެއް ގެނައުމަށް މިހާރު ތައްޔާރުވެފައިވާ ކަމަށް އެމަނިކުފާނު ވިދާޅުވިއެވެ.

މީގެއިތުރުން، އެ ގޮތަށް ޑޮލަރުން ލިބޭ ފައިސާ ބޭނުންކޮށްގެން ބޭރުން މުދަލާއި ޚިދުމަތް ހޯދުމުގެ މަގުވެސް ތަނަވަސްވެގެންދާނެ ކަމަށް ރައީސް ފާހަގަކުރެއްވިއެވެ.

ވިޔަފާރިތަކަށް ބޭނުންވާ މުހިންމު ޑިޖިޓަލް ވަސީލަތްތަކަށް ފައިސާ ދެއްކުމުގައި ހުރި ދަތިތަކަށް އަލިއަޅުއްވާލައްވަމުން ރައީސް އިތުރަށް ވިދާޅުވީ، އެ ވިޔަފާރިތަކުން ބޭނުންކުރާ އެކިއެކި ޚިދުމަތްތަކަށް ދައްކަންޖެހޭ ސަބްސްކްރިޕްޝަން ފަދަ ޕޭމަންޓްތައް އެއްވެސް ދަތިކަމެއް ނެތި ދެއްކޭނެ އިންތިޒާމުވެސް ނޮވެމްބަރު 1 އިން ފެށިގެން ހަމަޖެހިގެންދާނެ ކަމަށެވެ.

މީގެ އިތުރުން ކުދި އަދި މެދު ފަންތީގެ ވިޔަފާރިތަކުގެ އުފެއްދުންތެރިކަމުގެ ބޭނުމަށް،1 ޖެނުއަރީ 2027 އިން ފެށިގެން، އެތެރެކުރާ ރޯ މެޓީރިއަލުން ނަގާ އިމްޕޯޓް ޑިއުޓީ 0 ޕަސެންޓަށް ބަދަލުކުރުމަށް ނިންމަވާފައިވާކަމުގައި ވެސް ރައީސުލްޖުމްހޫރިއްޔާ ވިދާޅުވިއެވެ. އަދި މިކަންކަން ތަންފީޒުކުރުމަށް ބޭނުންވާ ގާނޫނީ ބަދަލުތައް ގެނައުމުގެ މަސައްކަތްތައް ކުރެވެމުންދާކަމަށްވެސް އެމަނިކުފާނު ވަނީ ވިދާޅުވެފައެވެ.

ހަމަމިއާއެކު، ޓެކްސް އޮފްސެޓް ކުރުމާއި ޖީއެސްޓީ ތްރެޝޯލްޑަށް ބަދަލު ގެންނަވާނެކަން އެމަނިކުފާނު އިޢުލާންކުރެއްވިއެވެ. ސަރުކާރުން ކުދި އަދި މެދު ފަންތީގެ ވިޔަފާރިތަކަށް ދޭންޖެހޭ ފައިސާއިން، އެ ފަރާތްތަކުން ސަރުކާރަށް ދައްކަންޖެހޭ ޓެކްސް އޮފްސެޓް ކުރެވޭނެ (ކަނޑައިދެވޭނެ) ގޮތް ހަމަޖެހިފައިވާކަމަށާ، ޖީއެސްޓީ ރަޖިސްޓްރީ ކުރުމުގެ ތްރެޝޯލްޑް، 1 މިލިއަން ރުފިޔާއިން 1.5 މިލިއަން ރުފިޔާއަށް ޖެނުއަރީ 1 އިން ފެށިގެން ބޮޑުކުރެވޭނެކަމުގައި އެމަނިކުފާނު ހާމަކުރެއްވިއެވެ.

ރައީސުލްޖުމްހޫރިއްޔާ ވިދާޅުވީ މި ލުއިތައް ދެވިގެން ދިޔުމުން، ރާއްޖޭގެ ކުދި އަދި މެދުފަންތީގެ (އެމްއެސްއެމްއީ) ދާއިރާގައި މަސައްކަތްކުރާ އެތައް ފަރާތްތަކަކަށް ކުރިމަތިވެފައިވާ ގިނަ ދަތިތަކަށް ހައްލު ލިބި، މަސައްކަތްތައް އިންތިހާއަށް ފަސޭހަވެގެންދާނެ ކަމަށެވެ.