ރާއްޖޭގެ ތާރީހުގައި ފުރަތަމަ ފަހަރަށް ދަނޑުވެރިކަމުގެ ޤައުމީ ބޯހިމެނުން ރަސްމީކޮށް ފަށައިފި

ދިވެހިރާއްޖޭގެ ތާރީހުގައި ފުރަތަމަ ފަހަރަށް ކުރިއަށްގެންދާ ދަނޑުވެރިކަމުގެ ޤައުމީ ބޯހިމެނުމުގެ އަމަލީ މަސައްކަތް ރަސްމީކޮށް ފަށައިފި އެވެ.

މިއީ ދަނޑުވެރިކަމާއި ދިރޭތަކެއްޗާ ބެހޭ ވުޒާރާއާއި، މޯލްޑިވްސް ބިއުރޯ އޮފް ސްޓެޓިސްޓިކްސްގެ އިތުރުން، އދ. ގެ ފުޑް އެންޑް އެގްރިކަލްޗަރ އޮގަނައިޒޭޝަން (އެފްއޭއޯ) ގުޅިގެން ކުރިއަށްގެންދާ މުހިންމު ޤައުމީ ހަރަކާތެކެވެ.

ދަނޑުވެރިކަމާ ބެހޭ ވުޒާރާއިން ހާމަކުރެއްވި ގޮތުގައި، ވިޔަފާރީގެ އުސޫލުން ފުޅާ ދާއިރާއެއްގައި ދަނޑުވެރިކަން ކުރަމުން އަންނަ ރާއްޖޭގެ އެކި ރަށްރަށުން 39 ފަރާތަކުން މިހާރުވެސް ދަނީ މި ބޯހިމެނުމުގެ އަމަލީ ހަރަކާތްތަކުގައި ބައިވެރިވަމުންނެވެ.

މި ބޯހިމެނުމަކީ ރާއްޖޭގެ ދަނޑުވެރިކަމުގެ ދާއިރާއާ ގުޅުންހުރި އިތުބާރުހުރި ތަފާސްހިސާބު އެއްކުރުމަށް އެޅުނު ތާރީހީ ފިޔަވަޅެއްކަން ފާހަގަކުރައްވައި އެ ވުޒާރާއިން ވިދާޅުވީ، މިއީ ޤައުމީ ފެންވަރުގައި ކާބޯތަކެތީގެ ރައްކާތެރިކަން ކަށަވަރުކުރުމަށް ހުރި ގޮންޖެހުންތަކާއި، ދާއިރާއަށް ބޭނުންވާ މުހިންމު ކަންކަން ދެނެގަތުމަށް އެޅިގެންދިޔަ ވަރުގަދަ ބިންގަލެއް ކަމަށެވެ.

މީގެއިތުރުން، މި ދިރާސާގެ އަލީގައި ދަނޑުވެރިކަމުގެ ދާއިރާގައި ހުރި އައު ފުރުސަތުތައް ދެނެގަނެވި، އުފެއްދުންތެރިކަން އިތުރުކުރުމަށް މަގުފަހިވެގެންދާނެއެވެ. އަދި ދެމެހެއްޓެނިވި ގޮތެއްގައި މި ސިނާއަތް ތަރައްގީކޮށް، ކާބޯތަކެތީގެ ޔަގީންކަން ގާއިމުކުރުމަށްޓަކައި ހަރުދަނާ ސިޔާސަތުތައް އެކަށައެޅުމުގައި، މި ބޯހިމެނުމުން ލިބޭ މައުލޫމާތުތަކަކީ އަގުނުކުރެވޭފަދަ މުހިންމު ވަސީލަތަކަށް ވެގެންދާނެ ކަމަށްވެސް އެ ވުޒާރާއިން ފާހަގަކުރައްވައެވެ.