ރަށުމެދުގައި ހުރި އިންޖީނުގެތައް ބަދަލުކުރުމުގެ ބޮޑުބައެއް އަންނަ އަހަރު ނިންމާނަން: ޑރ. އަޒުވަރު

ރާއްޖޭގެ އެކި ރަށްރަށުގެ މެދުތެރޭގައި ހުރި އިންޖީނުގެތައް މީހުން ދިރިނޫޅޭ ސަރަހައްދުތަކަށް ބަދަލުކުރުމުގެ މަސައްކަތް މިހާރުވެސް ވަރަށް ބާރަށް ކުރިއަށްދާކަމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) ގެ މެނޭޖިންގ ޑިރެކްޓަރ ޑރ. އަޒުވަރު ވިދާޅުވެއްޖެއެވެ.

ފެނަކަ ކޯޕަރޭޝަންގެ ހިދުމަތްތައް ސްޓެލްކޯގެ ދަށަށް ބަދަލުކުރުމުގެ މަރުހަލާގައި މަސައްކަތް ކުރި މުވައްޒަފުންގެ އަގުވަޒަން ކުރުމުގެ ގޮތުން ބޭއްވި ހަފްލާގައި ވާހަކަދައްކަވަމުން ޑރ.އަޒުވަރު ވިދާޅުވީ ރަށްރަށުގެ މީހުން ދިރިއުޅެމުންދާ ސަރަހައްދުގައި ހުރި އިންޖީނުގޭތައް ނަގައި މީހުން ދިރިނޫޅޭ ސަރަހައްދަށް ބަދަލުކުރުމަކީ އެކުންފުނިން ވަރަށް ބޮޑު އިސްކަމެއް ދީގެން ކުރަމުން އަންނަ މަސައްކަތެއް ކަމަށެވެ. އެގޮތުން މި މަސައްކަތުގެ ބޮޑު ބައެއް، އަންނަ އަހަރުގެ ނިޔަލަށް ނިންމުމަށް އަމާޒު ހިފާފައިވާ ކަމަށެވެ.

އެގޮތުން ސަރުކާރުގެވެސް އަމާޒަކީ ވީ އެންމެ އަވަހަކަށް އެފަދަ އިންޖީނުގެތައް މީހުން ދިރިއުޅޭ ސަރަހައްދުތަކާ ދުރަށް ބަދަލުކުރުން ކަމަށާއި، އަންނަ އަހަރުގެ ނޮވެމްބަރު މަހާ ހަމައަށް އޭގެ ތެރެއިން ބޮޑު ބައެއްގެ މަސައްކަތްތައް ނިންމުންކަމަށް ވިދާޅުވިއެވެ.

މި ހަފްލާގައި ވާހަކަފުޅު ދައްކަވަމުން އަޒްވަރު ވިދާޅުވީ، ސެޕްޓެމްބަރު 30 އިން ނޮވެމްބަރު 6 ގެ ނިޔަލަށް ކުންފުނީގެ ގިނަ އަދަދެއްގެ މުވައްޒަފުން ކުރި ބުރަ މަސައްކަތުން، ކަނޑައެޅިފައިވާ ތާރީހަށް އެ މަސައްކަތް ކާމިޔާބުކަމާއެކު ނިންމާލެވިފައިވާ ކަމަށެވެ.

މި ބަދަލާއެކު ރާއްޖޭގެ ޔުޓިލިޓީ ދާއިރާގައި މުޅި ރާއްޖެއަށް ހިދުމަތް ފޯރުކޮށްދިނުމުގައި ސްޓެލްކޯގެ ދައުރާއި ޒިންމާ ކުރިއަށްވުރެ ބޮޑުވެގެންދާނެކަން ފާހަގަކުރައްވައި ޑރ. އަޒުވަރު ވިދާޅުވީ، ކަންކަން ކުރިއަށް ގެންދިއުމަށް އަޅަންޖެހޭ ފިޔަވަޅުތައް އަޅައި، އެ ކުންފުނިން އަދާކުރަންޖެހޭ ދައުރު ފުރިހަމައަށް އަދާކުރަންޖެހޭ ކަމަށެވެ. އަދި ސަރުކާރާއި ރައްޔިތުން ކުރާ އުންމީދުތައް އިތުބާރާއެކު ހާސިލުކޮށްދިނުމަށްޓަކައި، ކުންފުނީގެ ހުރިހާ މުވައްޒަފުން، ހާއްސަކޮށް އިސް ސަފުގައި ތިއްބެވި ބޭފުޅުން ސްޓްރެޓީޖިކަލީ އަދި ހުއްޓުމެއްނެތި މަސައްކަތްކުރެއްވުމަށް އެދިވަޑައިގެންނެވިއެވެ.

މީގެއިތުރުން، އިތުބާރު ހުރި ހިދުމަތެއް ލިބޭ ތަނެއްގެ ގޮތުގައި ސްޓެލްކޯގެ ބްރޭންޑް މިހާރުވެސް ހިފެހެއްޓިފައިވާކަން ފާހަގަކުރައްވަމުން އެމްޑީ ވިދާޅުވީ، ފެނަކައިގެ އިންވެސްޓްމަންޓްތަކާއެކު ދިވެހިރާއްޖޭގެ އެންމެ ބޮޑެތި ކުންފުނިތަކުގެ ތެރޭގައި ހިމެނިގެން ކުރިއަށްދާއިރު، ރައްޔިތުންނާއި ސަރުކާރުން ކުރާ އުންމީދުތައް ހަގީގަތަކަށް ހެދުމުގެ ޒިންމާގެ ބޮޑުކަން އިހްސާސްކުރެއްވޭ ކަމަށެވެ.

އަދި މިއީ ކުންފުނީގެ އެންމެހައި މުވައްޒަފުންގެ ކޮނޑުގައި އެޅިފައިވާ ޤައުމީ ޒިންމާއެއް ކަމަށާއި، މި ލަނޑުދަނޑިތައް ހާސިލުކުރުމަށް އެންމެން އެކަތިގަނޑެއްގެ ގޮތުގައި ގުޅިގެން މަސައްކަތްކުރުން މުހިންމު ކަމަށް ޑރ. އަޒުވަރު ވިދާޅުވިއެވެ.

ސްޓެލްކޯގެ ތެރޭގައި މިހާރުވެސް ހިފަހައްޓަމުންދާ ރަނގަޅު އުސޫލުތައް ދަމަހައްޓައިފިނަމަ، ދިމާވާ ގިނަ ކަންކަމަށް ދާއިމީ ހައްލެއް ލިބިގެންދާނެކަން ފާހަގަކުރައްވަމުން އަޒުވަރު ވިދާޅުވީ މި މަރުހަލާ ކާމިޔާބުކަމާއެކު ނިންމައި ހިދުމަތްތަކާ ހަވާލުވުމަށްފަހު، ދެން އޮތް އެންމެ ބޮޑު މަސައްކަތަކީ ރަށްރަށުގެ ފެންވަރުގައި ރައްޔިތުން އެދޭފަދަ ފުރިހަމަ ހިދުމަތެއް ފޯރުކޮށްދިނުން ކަމަށް ވިދާޅުވިއެވެ.