ރައީސް ޔާމީން އާއި ގުޅިގެން ރައީސް މުޢިއްޒު ވެވަޑައިގެންނެވި ވަޢުދު ފުއްދަވައިފި: ސަރުކާރު

ކުރީގެ ރައީސް ޔާމީން އަބްދުލްގައްޔޫމާއި ގުޅިގެން ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވެވަޑައިގެންނެވި ވަޢުދު ފުއްދަވާފައިވާ ކަމަށް ސަރުކާރުން ބުނެފިއެވެ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ރިޔާސީ ކެމްޕޭންގެ ތެރެއިން ވެވަޑައިގެންފައިވާ އެއް ވަޢުދަކީ، ޝަރުޢީ ހަމަތަކާއި އުސޫލުތަކުގެ މަތީން ރައީސް ޔާމީން މިނިވަން ކުރެއްވުމާއި، ވެރިކަމަށް އިންތިހާބުވެ ވަޑައިގަންނަވާ ފުރަތަމަ ދުވަހު, ރައީސް ޔާމީން ގެއަށް ބަދަލު ކުރައްވަން ވެވަޑައިގެންނެވި ވަޢުދެވެ.

އެހެން ނަމަވެސް، ރައީސް ޔާމީން މިނިވަންވެވަޑައި ނުގަންނަވާތީ، ރައީސް ޔާމީނަށް ތާއީދު ކުރާ ފަރާތްތަކާއި އިދިކޮޅުން ސަރުކާރަށް އަންނަނީ ފާޑުކިޔަމުންނެވެ. އަދި ރައީސް ޔާމީންގެ ވަކީލު، ޑރ. މުހައްމަދު ޖަމީލް ވެސް ވަނީ ރައީސް ޔާމީން އަށް ލިބިލެއްވި ހުރިހާ ލުޔެއް ލިބުނީ ކުރީ ސަރުކާރުން ކަމަށް ވިދާޅުވެފައެވެ.

އެކަމާއި ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ އިސް ތަރުޖަމާނު މުހައްމަދު ޝަހީބު ވިދާޅުވީ، ރައީސް މުޢިއްޒުގެ ވަޢުދުފުޅާއި އެއްގޮތަށް އެމަނިކުފާނު އިންތިޚާބުވެވަޑައިގެންނެވި ރޭގައި، ކުރީގެ ރައީސް އަށް ދަންނަވައި، އޭގެ އަނެއް ދުވަހު އެމަނިކުފާނު ގެއަށް ބަދަލުކުރައްވާފައިވާ ކަމަށެވެ.

ބައެއް ބޭފުޅުން ސުވާލު ކުރައްވަފާނެ ކުރީ ސަރުކާރުގެ ހެޔޮފުޅު ކަމުންނޭ އެކަން ކުރެއްވީ. އެހެން ނަމަވެސް އެ ހެޔޮފުޅު ކަމުން އެކަން ކުރެއްވި ނަމަ، އޭގެ ކުރިންވެސް އެކަން ކުރެއްވީސް. އެ ފުރުސަތު ވެސް. އެހެން ނަމަވެސް، އޭރު އިންތިޚާބީ ރައީސް މުޢިއްޒު އޭރު އިލްތިމާސް ކުރެއްވުމާއި ގުޅިގެން އޭރު އެކަން ކުރެއްވީ. ހުވާކުރުމުގެ ކުރިން އެކަން ކުރެއްވި.

މުހައްމަދު ޝަހީބު

މިއާއެކު ޝަހީބު ވިދާޅުވީ، ރައީސުލްޖުމުހޫރިއްޔާ ކަމުގެ ހުވާ، ރައީސް މުޢިއްޒު ކުރެއްވި ދުވަހު ވާހަކަ ދައްކަވަމުން ޝަރުޢީ ދާއިރާއަށް ސަރުކާރުން އަތްބޭނުން އެދުވަހުން އެދުވަހަށް ނިމިގެން ގޮސްފައިވާ ކަމަށް އެމަނިކުފާނު ވިދާޅުވި ކަމަށެވެ.

އެހެންކަމުން އެދުވަހުން ފެށިގެން ސަރުކާރުން ޝަރީޢަތްތަކަށް އަތް ބޭނުން، ކޯޓުތަކަށް ނުފޫޒް ފޯރުވުން އެ އޮތީ ނިމިފައި. އެހެން ކަމުން ރައީސް ޔާމީން އާއި ގުޅިގެން ޑރ. މުޢިއްޒު ވެވަޑައިގެންނެވި ވަޢުދު އެ އޮތީ ފުދިފައި.

މުހައްމަދު ޝަހީބު

ޝަހީބު އިތުރަށް ވިދާޅުވީ، ރައީސް ޔާމީން މިނިވަންވެވަޑައިގަންނަވާނެ ދުވަހެއް އެނގިލައްވާނީ ޖުޑިޝަރީއަށް އަށް ކަމަށާ, ސަރުކާރުން އެއަށް އަތް ނުބާނުއްވާނެ ކަމަށެވެ.