ރައީސް މުޢިއްޒު، ޔާމީނާއި ބައްދަލު ނުކުރައްވަނީ އެއީ ޤާނޫނީ ގޮތުން ރަނގަޅުކަމެއް ނޫންވީމާ: ޝަހީބު

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ކުރީގެ ރައީސް ޔާމީނާއި ބައްދަލު ނުކުރައްވަނީ، އެމަނިކުފާނަކީ ޝަރުޢީ ބަންދެއްގައި ހުންނެވި ބޭފުޅަކަށް ވާތީ އެއީ، ގާނޫނީ ގޮތުން ރަނގަޅު ކަމެއް ކަމަށް ދެކެވަޑައިނުގަންނަވާތީ ކަމަށް ރައީސުލްޖުމްހޫރިއްޔާގެ އޮފީހުގެ އިސް ތަރުޖަމާނު މުޙައްމަދު ޝަހީބު ވިދާޅުވެއްޖެއެވެ.

މިއަދު ނޫސްވެރިންގެ ބައްދަލުވުމުގައި، ނޫސްވެރިއެއް ވަނީ، ސިޔާސީ އެހެން ޕާޓީތަކުގެ ލީޑަރުންނާއި ކުރީގެ ރައީސުންނާ، ރައީސް މުޢިއްޒު، ބައްދަލު ކުރައްވާއިރު، ރައީސް ޔާމީނާއި ބައްދަލު ނުކުރައްވާ ސަބަބާއި ގުޅޭގޮތުން ސުވާލު ކޮށްފައެވެ.

އެ ސުވާލަށް ޖަވާބު ދެއްވަމުން ޝަހީބު ވިދާޅުވީ، ރައީސް ޔާމީން ގެއަށް ބަދަލު ކުރެއްވީ ސިޔާސީ އެއްވެސް ހަރަކާތެއްގައި ބައިވެރި ނުވެވޭ ގޮތަށް ކަމަށެވެ. އެހެންކަމުން، އެކަން އެހެން އޮއްވާ، ރައީސް މުޢިއްޒު ޔާމީނާއި ބައްދަލު ކުރެއްވުމަކީ ރަނގަޅު ކަމެއްގެ ގޮތުގައި ދެކެވަޑައިނުގަންނަވާ ކަމަށް އޭނާ ވިދާޅުވި އެވެ.

"ސިޔާސީ އެއްވެސް ހަރާކާތެއްގައި ބައިވެރި ނުވެވޭ ގޮތަށް ޝަރުޠުކުރައްވާފައިވާ ރައީސް ޔާމީނު ގެއަށް ބަދަލުކުރައްވައި ލުއިދެއްވީވެސް. އެހެންވީމާ އެކަންތައް އެހެން އޮއްވައި، ރައީސް ޔާމީނާއި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައްދަލު ކުރައްވައި ނުވަތަ މަޝްވަރާކުރައްވައި، ނުވަތަ ފޯނުންވެސް އެކަހަލަ ކަމެއް ކުރެއްވުމަކީ، ޤާނޫނީ ގޮތުން ރަނގަޅުކަމެއްގެ ގޮތުގައި ދެކެވަޑައެއް ނުގަންނަވާ."

ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕަރސަން މުޙައްމަދު ޝަހީބު

ޝަހީބު ވިދާޅުވި ގޮތުގައި ރައީސް މުއިއްޒު، ރައީސް ޔާމީނާ ބައްދަލު ކުރައްވާނީ އިތުރު ލުއިތަކެއް ލިބި އެކަމަށް ޖާގަ އޮތް މިންވަރަކުންނެވެ.

މީގެ އިތުރުން، ރައީސް ޔާމީންގެ އަނބިކަނބަލުން ފާޠިމަތު އިބްރާހީމާއި ރައީސް ޑރ. މުޙައްމަދު މުއިއްޒު ބައްދަލުކުރެއްވިތޯ ސުވާލުކުރެއްވުމުން ޝަހީބު ވިދާޅުވީ، އެފަދަ ބައްދަލުވުމެއް ކުރިއަށް ދިޔަކަން އެނގިވަޑައިނުގަންނަވާ ކަމަށެވެ.