5 މިލިއަން ގަސް ޕްރޮގްރާމްގެ ދަށުން 4 ލައްކައަށްވުރެ ގިނަ ގަސް އިންދައިފި

ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅުތަކުގެ ތެރޭގައި ހިމެނޭ ފަސް މިލިއަން ގަސް އިންދުމުގެ ޕްރޮގްރާމުގެ ދަށުން މިހާތަނަށް 4 ލައްކައަށްވުރެ ގިނަ ގަސް އިންދާފައިވާކަމަށް މިނިސްޓްރީ އޮފް ޓޫރިޒަމް އެންޑް އެންވަޔަރަމަންޓުން ބުނެފިއެވެ.

ތިމާވެއްޓާ ބެހޭ ވުޒާރާއިން މިއަދު ބުނީ، 5 މިލިއަން ގަސް އިންދުމުގެ ޕްރޮގްރާމުގެ ދަށުން މިއަދުގެ ނިޔަލަށް 498،968 ގަސް އިންދާފައިވާކަމަށެވެ.

ފަސް މިލިއަން ގަސް އިންދުމުގެ ޕްރޮގްރާމުގެ ދަށުން 5،219،456 މިލިއަން ގަސް އިންދުމަށް ވަނީ ނިންމާފައެވެ. މި ޕްރޮގްރާމުގައި ގަސް އިންދުމުގައި ބޮޑަށް އިސްކަންދެނީ ރާއްޖެއިން ނެތެމުންދާ އަދި މަދުކަމަށް ފާހަގަކުރެވޭ ގަސްގަހެވެ. މި ޕްރޮގްރާމުގެ ދަށުން ސަރުކާރު ހިއްސާވާ ބޮޑެތި ކުންފުނިތަކުން ވަނީ ގަސް އިންދުމަށް ނިންމާފައެވެ.

މިގޮތުން އެޗްޑީސީ އާއި އެމްޕީއެލުން އެއް މިލިއަން ގަސް އިންދުމަށް ނިންމާފައިވާއިރު، އެސްޑީއެމް ފާމުން 750،000 ގަސް އަދި އާރުއޭސީއެލް އިން 60،000 ގަސް އަދި ސްޓެލްކޯއިން 500،000 ގަސް އިންދުމަށް ވަނީ ނިންމާފައެވެ. މީގެ އިތުރުން އެހެނިހެން ފަރާތްތަކުން 1.3 މިލިއަނަށްވުރެ ގިނަ ގަސް އިންދުމަށް ވަނީ ހަމަޖެހިފައެވެ.

މި ޕްރޮގްރާމުގެ ދަށުން އެޗްޑީސީ، ސްޓެލްކޯ އަދި އެމްޕީއެލުން މިހާރުވެސް ވަނީ ގިނަ އަދަދެއްގެ ގަސް އިންދާފައެވެ. ފަސް މިލިއަން ގަސް އިންދުމުގެ މި ޕްރޮގްރާމް ކުރިއަށްގެންދިއުމަށް ހަމަޖެހިފައިވަނީ، 5 އަހަރުތެރޭގައި އަދަދު ހަމަކުރާ ގޮތަށެވެ. މި ޕްރޮގްރާމް ރަސްމީކޮށް ފަށާފައިވަނީ މިދިޔަ އަހަރުގެ ޖޫންމަހުގެ 5 ވަނަ ދުވަހު ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ.

މިއީ، ރާއްޖޭގެ ނާޒުކު ތިމާވެށީގެ ނިޒާމުތައް ހިމާޔަތްކުރުމަށާއި، މޫސުމަށް އަންނަ ބަދަލުތަކުގެ ސަބަބުން މިހާރުގެ ޖީލުތަކާއި، އަންނަން އޮތް ޖީލުތަކުގެ ލާބައާއި މަންފާއަށްޓަކައި މޫސުމަށް އަންނަ ބަދަލުތަކުންކުރާ ނޭދެވޭ އަސަރުތަކުން އަރައިގަތުމަށް ކުރަމުން ގެންދާ މަސައްކަތްތަކުގެ ތެރެއިން ކުރެވިގެންދާ ކަމެއް ކަމަށް ސަރުކާރުން ބުނެއެވެ.