ސާދަ ފަނަރަ އަހަރުގެ ކުދިންނަކީ އިސްލާމްދީނުގައިވާ އަދަބުތަކުން ބަރީއަވާނެ ބައެއްނޫން: ޝައިޚް ނިޝާން

އުމުރުން ސާދަ ނުވަތަ ފަނަރަ އަހަރު ވެފައިވާ ކުދިންނަކީ އިސްލާމް ދީނުގައި ކަނޑައެޅިފައިވާ އަދަބުތަކުން ބަރީއަވާނޭ ކުޑަކުދިންނެއް ނޫން ކަމަށް ޝައިޚް އާދަމް ނިޝާން ބިން އަލީ އާދަމް ވިދާޅުވެއްޖެއެވެ.

ޝައިޚް ނިޝާން މިފަދައިން ވިދާޅުވީ، އއ.ރަސްދޫގައި އުމުރުން 13 އަހަރާއި 14 އަހަރުގެ ކުޑަ ދެ ކުއްޖަކު، އެ ރަށުގެ މިސްކިތުގެ ވުޟޫ ކުރާ ބައިގައި އެހެން ކުޑަކުއްޖަކަށް ގަނާކޮށް، އަނިޔާ ކުރި މައްސަލަ ފެންމަތިވުމާއި ގުޅިގެން ފޭސްބުކް ގައި ކުރެއްވި ޕޯސްޓެއްގައެވެ.

ޝައިޚް ނިޝާން ވިދާޅުވީ، އިސްލާމްދީނުގައި ތޭރަ ސާދަ ފަނަރަ އަހަރުގެ ކުދިންނަކީ ޤަލަން އުފުލިގެންވާ ކުޑަކުދިންނެއް ނޫން ކަމަށެވެ. އަދި 18 އަހަރު ވުމުން ނޫނީ ބޮޑުމީހަކަށްވެ މުކައްލަފަކަށްވެ ތިމާކުރާ ކަންކަމަށް އަދަބު ނުލިބޭގޮތަށް ކަނޑައަޅައި ނުވަތަ އަދަބު ލުއިކޮށްފައި އޮންނަ އޮތުމަކީ ކަނޑައެޅިގެން ﷲގެ ޝަރީޢަތާއި ޚިލާފު ބާޠިލު ޙުކުމެއް ކަމަށް ވެސް ޝައިޚް ވަނީ ވިދާޅުވެފައެވެ.

ހަމައެއާއިއެކު، މީހާ ބާލިޣްވުމުން ނުވަތަ ޢައުރަ ގުނަވަނުގެ ވަށައިގެން އިސްތަށިފެޅުމުން ނުވަތަ ފަނަރަ އަހަރުވުމުން އޭނާ މުކައްލަފަކަށްވާއިރު، އޭނާގެ ޢަމަލުތައް ފޮތުގައި ލިޔެވި، އޭނާ ކުރާ ކުށްތަކަށް ޝަރީޢަތުގައި ކަނޑައެޅިފައިވާ އަދަބު ދޭ ގޮތަށް ﷲ ގެ ޝަރީއަތުގައިވާކަން ފާހަގަކުރައްވާ ޝައިޚް ނިޝާން ވިދާޅުވީ، މުޖްތަމަޢުގައި ސާދަ ފަނަރަ އަހަރުގެ ކުދިންނަކީ އިސްލާމްދީނުގައި ކަނޑައެޅިފައިވާ އަދަބުތަކުން ބަރީއަވާނޭ ކުޑަކުދިންނެއް ނޫން ކަމަށެވެ.

އެހެންކަމުން ޝައިޚް ވިދާޅުވީ، މި އުމުރުގައި މީހެއް ނުވަތަ ކުއްޖެއްގެ ގައިގާ ތަޅާ އަނިޔާކޮށްފިނަމަ، އިސްލާމީ ޝަރީޢަތުގައި އޮތީ ޤިޞާޞްގެ ގޮތުގައި، ހަމަ އެތެޅިގޮތަށް ތަޅައި އެބަޔަކަށް އަދަބު ދިނުން ކަމަށެވެ.

މިއާއި އެކު ޝައިޚް ނިޝާން ވަނީ މިކަމުގެ ދަލީލެއްވެސް ހިއްސާ ކުރައްވާފައެވެ. އެއީ:

ޝެއިޚުލް އިސްލާމް ابن تيمية – رحمه الله - ވިދާޅުވެފައިވެއެވެ. "އަތުން ނުވަތަ ދަނޑިބުރިޔަކުން ނުވަތަ ޗާބޫކަކުން ވިޔަސް (މީހެއްގެ) މޫނުމަތީގައި ނުވަތަ ގައިގާ ޖަހައިފިނަމަ، ޚުލަފާއުއް ރާޝިދުންނާއި (4 ޚަލީފާއިންނާއި) އެނޫންވެސް ދެން ތިއްބެވި ޞަޙާބީންނާއި އަދި ތާބިޢީ ބޭކަލުންގެ ކިބައިން ޘާބިތުކޮށް ފެންނަން އޮތީ އެކަމުގައި ޝަރުޢުވެގެންވަނީ ޤިޞާޞް ހިފުން ކަމަށެވެ. އަދި އެއީ އިމާމް އަޙްމަދާއި އެނޫންވެސް ފިޤްހު ޢިލްމުވެރިން ބަޔާންކުރައްވާފައިވާ ގޮތެވެ. ރަސޫލު الله صلى الله عليه وسلمގެ ސުންނަތުގައިވެސް އައިސްފައިވަނީ އެގޮތަށެވެ. އެހެންކަމުން (މިމައްސަލައިގާ) ޞައްޙަ ރަނގަޅު ގޮތަކީ އެއީއެވެ."

(مجموع الفتاوى: 28/379 – މިފަތުވާގެ ޚުލާޞާ ތަރުޖަމާއެއް)

ރަސްދޫގައި ރޭގައި ކުޑަ ކުއްޖަކަށް އަނިޔާކުރި މައްސަލަ ވަރަށް ސީރިއަސް މައްސަލައެއްގެ ގޮތުގައި ފުލުހުން ބަލަމުން އަންނައިރު، ފުލުހުން ވަނީ އަނިޔާކުރިކަމަށް ތުހުމަތު ކުރެވޭ 13 އަހަރާއި 14 އަހަރުގެ ކުއްޖަކު ދެނެގަނެފައެވެ.

މިކަމާއި ގުޅިގެން ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާން ވިދާޅުވީ، މި މައްސަލައިގައި  ޤާނޫނީ ގޮތުން ކުރަން ޖެހޭކަންކަން ކުރަމުން އަންނަ ކަމަށާއި، މިފަދަ ކަންކަން މުޖުތަމައުގައި ހިންގާ ފަރާތްތަކާއިމެދު އެޅެންއޮތް އެއްމެ ހަރުކަށި ފިޔަވަޅު އެޅިގެންދާނެ ކަމަށެވެ.

ސޯޝަލް މީޑިއާގައި ދައުރުވަމުންދާ ވީޑިއޯގައި ކުޑަ ކުއްޖާ އަށް އަނިޔާ ކުރާ މަންޒަރުތައް ފެންނައިރު، މިއީ ބަލަން އުދަނގޫ އަދި ކުޑަކުއްޖާގެ ކަރާމާތަށް އުނިކަން އަންނާނެ ފަދަ މަންޒަރުތަކަކަށް ވުމާއި އެކު މި ވީޑިއޯ އެކަކު އަނެކަކަށް ހިއްސާ ނުކުރުމަށާއި ސޯޝަލް މީޑިއާ ތެރޭގައި ދައުރު ނުކުރުމަށް ފުލުހުން ވަނީ އެދިފައެވެ.

ފުލުހުން ބުނީ އަނިޔާ ލިބުނު ކުއްޖާއަށް ބޭނުންވާ ސައިކޯ ސޯޝަލް ސަޕޯޓު ފޯރުކޮށްދިނުމުގެ މަސައްކަތް ކަމާބެހޭ އިދާރާތަކާއި ގުޅިގެން ކުރަމުން އަންނަ ކަމަށެވެ.

މި މައްސަލަ އާއި ގުޅިގެން، އެތައް ބަޔަކު އަންނަނީ މިކަމުގައި ޝާމިލްވާ ފަރާތްތަކަށް ހައްގު އަދަބު ދިނުމަށް ގޮވާލަމުންނެވެ.