މިނިސްޓަރ ގުޅުއްވައި ލެއްވުމަކީ ސަރުކާރުން އަޅުގަނޑުގެ މަސައްކަތް ބަލައިގަތްކަމުގެ ހެއްކެތް: މަސްވެރިޔާ އާދަމް

ގދ. ފަރެސްމާތޮޑާއަށް ނިސްބަތްވާ ކުޅަދާނަ މަސްވެރިޔާ އުމުރުން 35 އަހަރުގެ އާދަމް ރާޝިދު (އެޑަމް) ގެ ޔޫޓިއުބް އެކައުންޓް "ދަ ލައިފް އޮފް އަ ފިޝަމޭން 4076" އަށް އެއްލައްކަ ސަބްސްކްރައިބަރުން ހަމަވުމުން ޔޫޓިއުބުން ދޭ ސިލްވާ ޕްލޭ ބަޓަން ލިބުމާއި ގުޅިގެން ފިޝަރީޒު މިނިސްޓަރ އަހުމަދު ޝިޔާމް އޭނާއަށް ގުޅުއްވައި ލައްވާ ތަހުނިޔާ އާއި މަރުޙަބާ ވިދާޅުވުމަކީ އޭނާގެ މަސައްކަތް ސަރުކާރުން ބަލައިގަތްކަމުގެ ހެއްކެތް ކަމަށް އޭނާ ބުނެފިއެވެ.

އެޑަމް މިފަދައިން ބުނެފައިވަނީ މިނިސްޓަރ ޝިޔާމް ޓެގް ކުރައްވާ މިއަދު އެކްސްގައި ކުރި ޕޯސްޓެއްގައެވެ.

"ޝުކުރިއްޔާ،މިނިސްޓަރ ،އަޅުގަނޑަށް ގުޅުއްވައި ހިތްވަރުދެއްވިކަމީ ލިބުނު ވަރަށްބޮޑު އުފަލެއް. އަދި އަޅުގަނޑު މި ކުރާ މަސައްކަތް އިތުރަށް ކުރިއަށް ގެންދަން ލިބުން ބޮޑު ހިތްވަރެއް ވެސްމެ. އަދި މިއީ ސަރުކާރުގެ ފަރާތުން މިފަދަ މަސައްކަތްތައް ބަލައިގަންނަ ކަމުގެ ހެއްކެއް."

އާދަމް ރާޝިދު (އެޑަމް)ގެ ޕޯސްޓުގައި ބުނެފައިވެއެވެ.

އެޑަމްގެ މި ކާމިޔާބީ އާއި ގުޅިގެން މިނިސްޓަރ ޝިޔާމް ވެސް ވަނީ އެކްސް މެދުވެރިކުރައްވާ އެޑަމްއަށް މަރުޙަބާ އާއި ތަޙްނިޔާ ވިދާޅުވެ ޕޯސްޓެއް ކުރައްވާފައެވެ.

އެ ޕޯސްޓުގައި މިނިސްޓަރ ވިދާޅުވީ  ދިވެހިރާއްޖޭގައި ކުރެވޭ މަސްވެރިކަމަކީ ތިމާވެއްޓާއި ރައްޓެހި ދެމެހެއްޓެނިވި ގޮތެއްގައި ކުރެވޭ މަސްވެރިކަމެއްކަން އެޑަމް (އާދަމް ރާޝިދު) ގެ ހިތްގައިމު ވީޑިއޯތަކުން ބޭރުދުނިޔެއަށް ޔަޤީންކޮށްދޭ ކަމަށާއި، ފަރުދީގޮތުން ތިޔަކޮށްދެއްވާ ޤައުމީ މަސައްކަތްޕުޅަކީ ޝުކުރު ޙައްޤު ފަޚުރުވެރިވާ މަސައްކަތްޕުޅުތަކެއް ކަމަށެވެ.

މީގެ އިތުރުން މިނިސްޓަރ ވިދާޅުވެފައި ވަނީ އެޑަމް އާ ދެކެވޭ ވާހަކަތަކުން ވީޑިއޯތައް އުފެއްދެވުމުގެ މަސައްކަތްޕުޅު ކުރެއްވުމުގައި  ގޮންޖެހުންތަކެއް އެބަހުރިކަން ފާހަގަކުރެއްވޭ ކަމަށާއި އެކަންކަމަށް އަލިމަގެއް ހޯދައިދިނުމުގައި ވުޒާރާގެ ފުރިހަމަ އެއްބާރުލުން އަރުވާނެކަމަށެވެ.

‏"ވަރަށް ބޮޑަށް މަރުހަބާ ! ދިވެހިރާއްޖޭގައި ކުރެވޭ މަސްވެރިކަމަކީ ތިމާވެއްޓާ ރައްޓެހި ދެމެހެއްޓެނިވި ގޮތެއްގައި ކުރެވޭ މަސްވެރިކަން އެޑަމްގެ ހިތްގައިމު ވީޑިއޯތަކުން ބޭރުދުނިޔެއަށް ޔަޤީންކޮށްދޭ. ފަރުދީގޮތުން ތިޔަކޮށްދެއްވާ ޤައުމީ މަސައްކަތްޕުޅަކީ ޝުކުރު ޙައްޤު ފަޚުރުވެރިވާ މަސައްކަތްޕުޅުތަކެއް.  އެޑަމް އާ ދެކެވޭ ވާހަކަތަކުން ވީޑިއޯތައް އުފެއްދެވުމުގެ މަސައްކަތްޕުޅު ކުރެއްވުމުގައި  ގޮންޖެހުންތަކެއް އެބަހުރި. އެކަންކަމަށް އަލިމަގެއް ހޯދައިދިނުމުގައި ވުޒާރާގެ ފުރިހަމަ އެއްބާރުލުން އަރުވާނަން."

އާދަމް ރާޝިދު ޓެގު ކުރައްވާ މިނިސްޓަރ އެކްސްގައި ވިދާޅުވެފައި ވެއެވެ.

އާދަމް ރާޝިދުގެ ޔޫޓިއުބް އެކައުންޓް "ދަ ލައިފް އޮފް އަ ފިޝަމޭން 4076" މެދުވެރިކޮށް އޭނާ ގެންދަނީ މަސްވެރިކަމުގެ އިތުރުން ރާއްޖޭގެ ކަނޑުފަޅުގެ ރީތިކަމާއި ޗާލުކަން މުޅި ދުނިޔެއަށް ދައްކައި ދެމުންނެވެ.